మామిళ్లగూడెం, జూన్ 14: రాష్ట్ర ప్రభుత్వం రైతులకు అండగా నిలిచి చేయూతనందిస్తున్నదని రాష్ట్ర వ్యవసాయ శాఖ మంత్రి తుమ్మల నాగేశ్వరరావు అన్నారు. తమ ప్రభుత్వం నుంచి వారికి అన్ని రకాల సహాయ సహకారాలు ఉంటాయని అన్నారు. ఖమ్మం జిల్లా పరిషత్ సమావేశ మందిరంలో జడ్పీ చైర్మన్ లింగాల కమల్రాజు అధ్యక్షతన శుక్రవారం జరిగిన జడ్పీ సర్వసభ్య సమావేశానికి మంత్రి హాజరయ్యారు. వ్యవసాయం, విద్య శాఖల అంశాల అజెండాల చర్చలో ఆయన మాట్లాడారు. గతంలో ఎన్నడూ లేని విధంగా అకాల వర్షాల వల్ల పంట నష్టపోయిన రైతులకు ఎకరానికి రూ.10 వేల చొప్పున పరిహారం అందించేలా ఆదేశాలు జారీ చేసినట్లు చెప్పారు. రైతులు కూడా వాతావరణ పరిస్థితులకు అనుగుణంగా పంటలను సాగు చేయాలని సూచించారు. రైతులు కూడా అధీకృత డీలర్ల వద్ద మాత్రమే విత్తనాలను కొనుగోలు చేయాలని సూచించారు. దళారులను ఆశ్రయించవద్దని సూచించారు. రైతులు రాజీపడితే దళారులు నకిలీ విత్తనాలు విక్రయించే ప్రమాదముందని అన్నారు. రైతు సంఘాల బాధ్యులు, ప్రజాప్రతినిధులతో చర్చించి రైతు భరోసా కార్యక్రమ విధివిధానాలు రూపొందిస్తామని అన్నారు. జిల్లాలో ఈ ఏడాది నుంచే గోదావరి జలాలను పారించేలా ప్రణాళికలు సిద్ధం చేస్తున్నామని అన్నారు. నిర్దిష్టమైన సమయంలో జూలూరుపాడు, పాలేరు, యాతాలకుంట వద్ద టన్నెళ్లు పూర్తి చేసి సత్తుపల్లి ప్రాంతానికి, అశ్వారావుపేట, దమ్మపేట మండలాలకు నీటిని అందిస్తామని వివరించారు. అలాగే, టన్నెళ్లు అవసరం లేని వైరా, లంకాసాగర్ జలాశయాలకు నాగార్జున సాగర్ ప్రాజెక్టు ద్వారా నీళ్లందించేందుకు శక్తివంచన లేకుండా పనిచేస్తున్నామని వెల్లడించారు.
విద్యా సంవత్సరం ప్రారంభమైనందున ప్రభుత్వ పాఠశాలల్లో అన్ని మౌలిక వసతులూ కల్పించామని మంత్రి తుమ్మల పేర్కొన్నారు. విద్యార్థులకు పాఠ్య పుస్తకాలు, ఏకరూప దుస్తులు అందించామన్నారు. ప్రైవేటు, కార్పొరేటు పాఠశాలలకు దీటుగా మెరుగైన విద్యను అందిస్తున్నామన్నారు. ఇంకా ఉపాధ్యాయుల నియామకం కోసం డీఎస్సీ నోటిఫికేషన్ కూడా ఇచ్చినట్లు గుర్తుచేశారు.
అనంతరం జడ్పీ చైర్మన్ లింగాల కమల్రాజు మాట్లాడుతూ.. రైతుల డిమాండ్కు తగినట్లుగా విత్తనాలు అందించాలని కోరారు. అన్ని ప్రభుత్వ పాఠశాలల్లో మౌలిక సదుపాయాలు కల్పించాలన్నారు. కాగా, సమావేశంలో పలువురు జడ్పీటీసీలు తమ మండలాల్లో ఉన్న సమస్యలను జడ్పీ సమావేశంలో ప్రస్తావించారు. ఆయా సమస్యల పరిష్కారానికి చర్యలు తీసుకోవాలని డిమాండ్ చేశారు. అదనపు కలెక్టర్ సత్యప్రసాద్, డీసీసీబీ చైర్మన్ దొండపాటి వెంకటేశ్వరరావు, జడ్పీ సీఈవో వినోద్, ప్రజాప్రతినిధులు, అధికారులు పాల్గొన్నారు.