రఘునాథపాలెం, ఏప్రిల్ 2: ఎంతోమంది పేదలు ఎన్నో ఏళ్లుగా సాగు చేసుకుంటున్న భూములవి. పోడు చేసుకున్నందుకుగాను నాటి ప్రభుత్వం వాటిపై హక్కులు కల్పించి అసైన్డ్ చేసింది. దీంతో ఆ భూములను వారు, వారి వారసులు కాలక్రమేణా వారి తాతల కాలం నుంచి వారసత్వంగా సాగు చేసుకుంటూ వస్తున్నారు. గతంలో కేసీఆర్ ప్రభుత్వం ధరణి పోర్టల్ తెచ్చి 2016లో నాడు సాగులో ఉన్న రైతులకు ఆ అసైన్డ్ భూములకు పాస్ పుస్తకాలను పంపిణీ చేసింది. అంతేకాదు.. పెట్టుబడి సాయంగా రైతుబంధునూ అందించింది. దీంతో పేదలు ఆ భూములను సాగుచేసుకుంటూ జీవిస్తున్నారు. కానీ, ఇటీవలి కాంగ్రెస్ ప్రభుత్వం.. సదరు రైతు కుటుంబాలను రోడ్డున పడేసే పరిస్థితికి తీసుకొచ్చింది. ఒకరిద్దరు చేసిన తప్పులను బూతద్దంలో చూపిస్తూ ఆ ప్రాంత రైతుల భూములన్నీ స్వాధీన పర్చుకునేందుకు సిద్ధమైంది. అంతేకాదు.. రైతులకు తాఖీదులను జారీ చేసింది. రఘునాథపాలెం మండలం కోయచలక రెవెన్యూ పరిధి పువ్వాడ నగర్లోని 192 సర్వే నెంబర్లో రైతుల భూములను స్వాధీనం చేసుకుంటున్నట్లు అధికారులు నోటీసుల జారీ చేయడంతో పేద రైతులందరూ ఆందోళన చెందుతున్నారు.
కోయచలక రెవెన్యూ పరిధి సర్వే నెంబర్ 192లోని ప్రస్తుత పువ్వాడ నగర్ సమీపంలోని ప్రభుత్వ భూముల్లో నాటి రైతులు పోడు చేసుకొని జీవనం సాగిస్తుండేవారు. దీంతో 1959లో అప్పటి ప్రభుత్వం వందల ఎకరాలను రైతులకు అసైన్డ్గా పట్టాలు పంపిణీ చేసింది. కాగా, వాటినే సాగు చేసుకుంటూ రైతులు, వారి వారసులు జీవనం సాగిస్తున్నారు. గత 20 ఏళ్ల క్రితం కొంతమంది రైతుల నుంచి భూములను సేకరించిన నాటి కాంగ్రెస్ ప్రభుత్వం.. కొంతభూమిని స్వాధీన పర్చుకొని ప్లాట్లు చేసి ఖమ్మం నగరంలోని పేదలకు ఇందిరమ్మ పథకం కింద పట్టాలను పంచి ఇచ్చింది. కాగా, మిగిలిన రైతులు సాగు చేసుకుంటూ ఉన్నారు. అయితే మిగిలిన రైతులు సాగు చేసుకుంటుండగా గత కేసీఆర్ ప్రభుత్వం 2016లో సాగులో ఉన్న రైతులను గుర్తించి ధరణి పాస్ పుస్తకాలను జారీ చేసింది. అయితే సదరు పాసు పుస్తకాలను అందుకున్న రైతులందరి భూములను స్వాధీన పర్చుకుంటున్నట్లు రఘునాథపాలెం తహసీల్దార్ లూథర్ విల్సన్ మంగళవారం 30మంది రైతులకు నోటీసులను జారీ చేశారు. అప్పట్లో అసైన్డ్ పట్టాలు పొందిన వారిలో ఒకరిద్దరు తమ భూములను అమ్ముకున్నట్లు గుర్తించిన అధికారులు.. ఇప్పుడు సాగులో ఉన్న రైతులందరికీ నోటీసులు జారీ చేశారు. దీంతో అసలైన రైతులు ఆవేదన వ్యక్తం చేస్తున్నారు. భూములు అమ్ముకున్న వారిపై విచారణ చేయాలని, అంతేగానీ సాగులో ఉన్న రైతుల భూములను లక్కోవద్దని బాధితులు వేడుకుంటున్నారు.