భద్రాద్రి కొత్తగూడెం, జూన్ 1 (నమస్తే తెలంగాణ) : జిల్లావ్యాప్తంగా ఈ యాసంగిలో రైతులు పండించిన దొడ్డు రకం వడ్లు సర్కారు కొనుగోలు కేంద్రాలకు రాకుండాపోయాయి. బయట అధిక రేటు పలికిందా లేక అధికారుల నిర్లక్ష్యమో గాని గతేడాది కంటే ఈ యాసంగి వరిధాన్యం కొనుగోళ్లలో చాలా వ్యత్యాసం కొట్టొచ్చినట్లు కనబడుతున్నది. గత యాసంగిలో కొనుగోలు కేంద్రాల ద్వారా 35,127 మెట్రిక్ టన్నుల ధాన్యాన్ని ప్రభుత్వం కొనుగోలు చేసింది. ఈ ఏడాది ఇప్పటివరకు కేవలం 13,655 మెట్రిక్ టన్నుల ధాన్యం కొనుగోలు చేయడంలో ఆంతర్యం ఏమిటో అర్థంకాని విషయంగా మిగిలింది. రైతులు పంట పండించలేదా అంటే జిల్లావ్యాప్తంగా సన్నాలు, దొడ్డు వడ్లు కలిపి 1,41,020 మెట్రిక్ టన్నుల దిగుబడి వచ్చినట్లు వ్యవసాయాధికారులు లెక్కలు చెబుతున్నారు. కానీ పౌరసరఫరాలశాఖ మాత్రం మాకు అంత అంచనా రాలేదని చెబుతున్నారు. మొత్తంగా సన్నాలు 55,680 మెట్రిక్ టన్నుల దిగుబడి రాగా, దొడ్డు రకాలు 85,340 మెట్రిక్ టన్నుల దిగుబడి వచ్చింది. ఇంత మొత్తంలో దిగుబడి వస్తే కేవలం 13,655 మెట్రిక్ టన్నుల ధాన్యాన్ని కొనుగోలు చేయడంలో పౌరసరఫరాలశాఖ విఫలమైందనే చెప్పాలి. పౌరసరఫరాలశాఖ అధికారులు చెప్పిన ప్రకారం చూస్తే వ్యవసాయశాఖ అధికారుల లెక్కలు పక్కాగా తప్పినట్లే కనిపిస్తున్నది.
ప్రతి ఏటా జిల్లాలో రైతులు అధిక మొత్తంలో పంటలను సాగు చేస్తున్నారు. అదేక్రమంలో ఈ ఏడాది కూడా 61,017 ఎకరాల్లో వరిపంట వేశారు. దీనికిగాను వ్యవసాయశాఖ 1,41,000 మెట్రిక్ టన్నుల దిగుబడి వస్తుందని అంచనాలు వేశారు. దీంతో ప్రభుత్వం 136 కొనుగోలు కేంద్రాలను ప్రారంభించింది.. కానీ అందులో 66 కేంద్రాల్లో మాత్రమే కొనుగోళ్లు చేశారు. ప్రభుత్వం పెట్టిన నిబంధనలు, గిట్టుబాటు ధర రైతులకు అందుబాటులో లేకపోవడంతో బయట విక్రయాలకే ప్రాధాన్యత ఇచ్చారు. దీనిపై అధికారులు పెద్దగా పట్టించుకోకపోవడంతో రైతులు పండించిన పంట దళారుల పాలైంది. అనుమతులు లేకుండా విక్రయాలు చేస్తే కఠినచర్యలు తీసుకుంటామని గప్పాలు చెప్పే అధికారులు చోద్యం చూస్తూ ఉండిపోయారు. రైతుల వద్దకే వచ్చి దళారులు వడ్లు కొనుగోలు చేస్తుంటే అధికారులు ఎటుపోయినట్లు అని ప్రజలు ప్రశ్నిస్తున్నారు.
రైతులు పండించిన పంటను కొనుగోలు కేంద్రాల ద్వారా కొనుగోలు చేసే పౌరసరఫరాలశాఖ ఏం చేస్తుందని అని సర్వత్రా విమర్శలు వినిపిస్తున్నాయి. నిబంధనలపై రైతులకు అవగాహన కల్పించాల్సిన అధికారులు కేవలం తనిఖీలకే పరిమితంకావడంతో రైతులు దళారులవైపు చూడాల్సిన పరిస్థితి ఏర్పడింది. తేమశాతం, కొనుగోలు కేంద్రాల వద్ద పరదాలు లేకపోవడం, తదితర సరైన సౌకర్యాలు కల్పించకపోవడం వల్ల రైతులు పక్కదారిపడుతున్నారు. దీంతో ప్రభుత్వ కొనుగోలు కేంద్రాల వద్ద ధాన్యం విక్రయాలు భారీగా తగ్గిపోయాయి. యాసంగి పంటలో మొత్తంగా 13,655 మెట్రిక్ టన్నుల ధాన్యాన్ని కొనుగోలు చేశారంటే ఆశాఖ పనితీరు వేరే చెప్పనక్కర్లేదు. ఇదే కొనసాగితే రానున్నరోజుల్లో రేషన్బియ్యం పేద ప్రజలకు అందడం కష్టమే.
రైతు కష్టపడి పంట పండిస్తుంటే.. ప్రభుత్వం మాత్రం గిట్టుబాటు ధర కూడా కల్పించలేకపోతున్నది. ప్రతిసారి రైతులు మోసపోతూనే ఉన్నారు. కొనుగోలు కేంద్రాల వద్ద సౌకర్యాలు ఉండవు. అధికారులు పట్టించుకోరు. వడ్లు కొన్నామా లేదా అంతేవారికి కావాల్సింది. రైతులకు 24 గంటల్లో సొమ్ములు పడుతున్నాయా లేదా అనేది పట్టించుకోరు. అలాంటప్పుడు ఎందుకు కొనుగోలు కేంద్రాలకు రైతులు తీసుకొస్తారు. అందుకే బయట అమ్ముకుంటున్నారు.
రైతులకు అవగాహన కల్పించాలి.. సూచనలు చేయాలి. బాధ్యత గల ఉద్యోగులు ఉంటే రైతుల పరిస్థితి అర్థమవుతుంది. ఒక్కోసారి రైతులు కొనుగోలుకేంద్రాల్లో వడ్లు వేసి రెండ్రోజుల వరకు వేచిచూడాల్సిన పరిస్థితి ఉంటున్నది. అలాంటి ఇబ్బందులు ఉండకూడదు. పౌరసరఫరాల శాఖ అధికారులు రైతులకు ఇబ్బందులు లేకుండా చూడాలి.
వరి ధాన్యానికి మార్కెట్లో రేటు ఎక్కువగా ఉండడం వల్ల రైతులు వడ్లను బయట అమ్ముకున్నారు. దొడ్డు వరి తక్కువ వేశారు. సన్నాలు ఎక్కువ పండించడం వల్ల కేంద్రాలకు వడ్లు రాలేదు. మా వద్ద ఉన్న లెక్కలు ఇవే. గత ఏడాది కంటే కొనుగోళ్లు తగ్గాయి.