మామిళ్లగూడెం, జూన్ 19: విద్యతోనే సమాజంలో సమానత్వం సాధ్యమవుతుందని ఖమ్మం కలెక్టర్ ముజమ్మిల్ ఖాన్ పేర్కొన్నారు. విద్యారంగానికి తొలి ప్రాధాన్యమిస్తామని అన్నారు. ఖమ్మంలోని ఐడీవోసీలో విద్యాశాఖపై సంబంధిత అధికారులతో నిర్వహించిన సమీక్షలో ఆయన మాట్లాడారు. విద్యాభివృద్ధి కోసం ప్రభుత్వం కృషిచేస్తోందని, పాఠశాలల్లో అవసరమైన సదుపాయాలు కల్పిస్తోందని అన్నారు. పాఠ్య పుస్తకాలు, నోట్ పుస్తకాలు, నాణ్యతతో కూడిన మధ్యాహ్న భోజనం వంటివి అందిస్తోందని అన్నారు. విద్యాశాఖ అధికారులు, ఉపాధ్యాయులు బాధ్యతతో పనిచేయాలని సూచించారు. ప్రభుత్వ పాఠశాలల్లో విద్యార్థుల శాతం పెరిగేలా చొరవ తీసుకోవాలని, ఒకవేళ విద్యార్థులు గైర్హాజరైతే అందుకు కారణాలు తెలుసుకోవాలని, తరచూ గైర్హాజరయ్యే విద్యార్థులను గుర్తించి వారి తల్లిదండ్రులతో చర్చించాలని సూచించారు. ఉపాధ్యాయుల హాజరు కూడా అంతే ముఖ్యమని, సమయ పాలన తప్పక పాటించాలని సూచించారు. విద్యార్థుల హాజరుశాతాన్ని పెంచడానికి పేరెంట్స్, టీచర్స్ మీటింగ్ (పీటీఎం)కు ప్రాధాన్యమివ్వాలని ఆదేశించారు. విద్యాశాఖ అధికారులు సోమశేఖరశర్మ, వై.రాజశేఖర్, కే.రవికుమార్, రామకృష్ణ, భూలక్ష్మి, భానుప్రకాశ్, పాపారావు, జగదీశ్ తదితరులు పాల్గొన్నారు.