మామిళ్లగూడెం, జూలై 9 : వీఆర్ఏలకు ఇచ్చిన మాట ప్రకారం జీవో నెంబర్ 81ని వెంటనే అమలు చేయాలని వీఆర్ఏల సంఘం జిల్లా నాయకులు డిమాండ్ చేశారు. వీఆర్ఏలు మంగళవారం ఖమ్మం కలెక్టరేట్ ఎదుట ధర్నా నిర్వహించిన అనంతరం కలెక్టర్ ముజమ్మిల్ ఖాన్కు వినతిపత్రం అందజేశారు. ఈ సందర్భంగా సంఘం ప్రతినిధులు మాట్లాడుతూ వీఆర్ఏలను జీవోలలో రెండు రకాల అంశాలుగా పొందుపరిచి ప్రభుత్వం ఉత్తర్వులు జారీ చేసిందన్నారు. గత కేసీఆర్ ప్రభుత్వం వీఆర్ఏలను రెగ్యులర్ చేస్తూ కారుణ్య నియామకాలకు అనుమతి ఇస్తూ జీవో 81, 85 జారీ చేసిందని తెలిపారు. జీవో ప్రకారం 61 ఏళ్లు పైబడిన వీఆర్ఏ వారసులకు కారుణ్య నియామకాలు వెంటనే చేపట్టాలని కోరారు. కార్యక్రమంలో వీఆర్ఏల సంఘ నాయకులు చిర్రా నాగేశ్వరరావు, పెంటు సాహెబ్, యాకోబు, మీరా, ఇబ్రహీం, జానీ, మోహినుద్దీన్, మీరా, రాము, వీరయ్య, రమేశ్, ఎస్డీ బాబుహుస్సేన్, ఎస్కే సైదులు తదితరులు పాల్గొన్నారు.