ఖమ్మం వ్యవసాయం, జూలై 19 : అల్పపీడన ప్రభావంతో జిల్లావ్యాప్తంగా రెండు రోజులుగా వర్షాలు కురుస్తున్నాయి. గురువారం చెదురు మదురు జల్లులకే పరిమితం కాగా.. రాత్రి నుంచి శుక్రవారం ఉదయం వరకు మోస్తరు నుంచి భారీ వర్షం కురిసింది. సాయంత్రం నగరంలో కురిసిన భారీ వర్షంతో జనజీవనానికి అంతరాయం ఏర్పడింది. ప్రభుత్వ, ప్రైవేట్ కార్యాలయాల నుంచి ఇంటికి చేరుకునేందుకు ఉద్యోగులు, సిబ్బంది నానా యాతనపడ్డారు.
విద్యార్థులు సైతం వ్యయప్రయాసలకు లోనయ్యారు. ప్రధాన వీధులు జలమయం కావడం, నాలాలు పొంగడంతో వరద నీరు రోడ్లపైకి వచ్చింది. శుక్రవారం కురిసిన వర్షానికి జిల్లావ్యాప్తంగా చెరువులు, కుంటలు, రిజర్వాయర్లకు వరద నీరు వచ్చి చేరుతోంది. ఇప్పటికే మెట్ట ప్రాంతాల్లో సాగు పనులు పూర్తి చేసుకున్న రైతులు పొలాలను దుమ్ము చేసే పనిలో నిమగ్నమయ్యారు. మరో వారం రోజులపాటు భారీ వర్షాలు కురిసే అవకాశం ఉన్నందున ఈ నెల చివరి వరకు వరినాట్లు పూర్తి చేసుకునేందుకు రైతులు సన్నద్ధమవుతున్నారు. గడిచిన 24 గంటల్లో (గురువారం ఉదయం నుంచి శుక్రవారం ఉదయం వరకు) జిల్లావ్యాప్తంగా 24.5 మిల్లీమీటర్ల వర్షపాతం నమోదైంది.
అత్యధికంగా వేంసూరు మండలంలో 64.6 మిల్లీమీటర్ల వర్షపాతం నమోదు కాగా.. సత్తుపల్లి మండలంలో 52.6 మి.మీ, కల్లూరు 45.8 మి.మీ, పెనుబల్లి 34.8 మి.మీ కాగా, మిగిలిన మండలాల్లో 10 నుంచి 25 మిల్లీమీటర్ల వర్షపాతం నమోదైంది. ఇక శుక్రవారం ఉదయం నుంచి సాయంత్రం వరకు మరో 11.5 మిల్లీ మీటర్ల వర్షపాతం నమోదైంది. అత్యధికంగా కామేపల్లి మండలంలో 43.6 మిల్లీ మీటర్ల వర్షపాతం నమోదు కాగా.. సింగరేణి, వేంసూరు మండలాల్లో 30 మి.మీ వర్షపాతం నమోదైంది. ప్రస్తుతం జిల్లాలో రెడ్ అలర్ట్ కొనసాగుతుండడంతో రాగల రెండు మూడు రోజులపాటు జిల్లావ్యాప్తంగా భారీ నుంచి అతి భారీ వర్షాలు కురిసే అవకాశం ఉంది. అవసరమైతే తప్ప ప్రజలు బయటకు రావొద్దని వాతావరణ శాఖ అధికారులు హెచ్చరికలు జారీ చేశారు.