శనివారం అర్ధరాత్రి నుంచి ఆదివారం ఉదయం వరకూ ఉమ్మడి ఖమ్మం జిలాల్లో వర్షం కురిసింది. మరికొన్ని చోట్ల ఆదివారం రాత్రి దాకా కూడా పలు మోస్తరు వర్షం కురిసింది. ఇంకొన్ని చోట్ల మోస్తరు జల్లులు పడ్డాయి. ఎట్టకేలకు వాన కురిసి నేల తడవడంతో అన్నదాతలు హర్షాతిరేకాలు వ్యక్తం చేశారు. పత్తి విత్తనాలు వేసి ఆకాశం వైపు చూసిన రైతన్నల మోములో ఈ వర్షపు జల్లులు ఆశలను మొలకెత్తించాయి. ముఖ్యంగా భద్రాద్రి జిల్లా అంతాటా వర్షం కురిసినట్లయింది. దుమ్ముగూడెం మండలం పర్ణశాలలో సీతవాగు పొంగింది. దీంతో ప్రముఖ పుణ్యక్షేత్రమైన పర్ణశాలలో చారిత్రక నారచీరెల ప్రాంతం పూర్తిగా నీట మునిగింది. ఆదివారం పర్ణశాల రామయ్య దర్శనానికి వచ్చిన భక్తులు నారచీరెల ప్రాంతాన్ని దర్శించకుండానే వెదిరిగారు. శనివారం రాత్రి నుంచి కురుస్తున్న వర్షానికి సింగరేణి ఇల్లెందు కోయగూడెం ఓసీలో బొగ్గు ఉత్పత్తికి అంతరాయం కలిగింది. 8 వేల టన్నుల మేర బొగ్గు ఉత్పత్తి నిలిచిపోయింది. కొత్తగూడెం ఏరియాలో కూడా బొగ్గు ఉత్పత్తికి అంతరాయం ఏర్పడింది.
సత్తుపల్లి ఓసీల్లోకి కూడా భారీగా వర్షపు నీరు చేరింది. అక్కడ బొగ్గు ఉత్పత్తికి ఆటంకం కలిగింది. దీంతో సింగరేణి అధికారులు బొగ్గు ఉత్పత్తి పనులను నిలిపివేశారు. సింగరేణి ప్రాంతంలో 93 మిల్లీమీటర్ల వర్షపాతం నమోదైంది. కొత్తగూడెంలో ఆదివారపు సంతలోని వ్యాపారులు, సంతకు వచ్చి వినియోగదారులు తడిసిపోయారు. దుమ్ముగూడెం మండలంలో పంట పొలాల్లోకి వర్షపు నీరు చేరింది. అదే మండలంలోని సీతారాంపురంలో భారీ వర్షానికి ఓ చెట్టు నేలకూలింది. సత్తుపల్లి డివిజన్లో 64.2 మిల్లీమీటర్ల వర్షపాతం నమోదైంది. పెనుబల్లి మండలంలో పలు లోతట్టు ప్రాంతాలు నీటమునిగాయి. వీఎం బంజర బస్టాండ్ ఆవరణ చెరువును తలపించింది. ప్రయాణికులు ఇబ్బందులకు గురయ్యారు. మణుగూరులోనూ లోతట్టు ప్రాంతాలు జలమయమయ్యాయి. ఇళ్లలోకి నీరు చేరడంతో ప్రజలు వాటిని బకెట్లతో ఎత్తి బయటకు పోశారు. – నమస్తే నెట్వర్క్ , జూన్ 23