ఖమ్మం సిటీ, జూలై 25 : పదేళ్ల కేసీఆర్ పాలనలో ఓ వెలుగు వెలిగిన పెద్దాసుపత్రి సమస్యల వలయంలో కొట్టుమిట్టుడుతోంది. జాతీయస్థాయిలో రెండు దఫాలుగా కాయకల్ప అవార్డులు గెలుచుకున్న ఆసుపత్రి నిధులు రాక.. నిర్వహణ లేక అస్తవ్యస్తంగా మారింది. పాత ఆసుపత్రి భవనం శిథిలావస్థకు చేరి వర్షాలతో కురుస్తోంది. పెచ్చులూడి పడుతున్నాయి. ఎప్పుడు ఏ ప్రమాదం ముంచుకొస్తుందోనని వైద్య సిబ్బంది బిక్కుబిక్కుమంటూ విధులు నిర్వర్తించాల్సి వస్తోంది.
జబ్బుతో రోగి ఆసుపత్రికి వస్తే పారిశుధ్య నిర్వహణ సరిగ్గా లేకపోవడంతో పరిసరాలను చూసి రోగం మరింత ముదిరిపోయే పరిస్థితి ఏర్పడింది. సరిగ్గా ఏడాది కిత్రం వరకు అక్కడకు వెళితే రోగాలు నయమవుతాయని అంతా భావించారు. అద్భుతమైన వసతులు, కార్పొరేట్ స్థాయిలో వైద్య సేవలు అందించడంతో ఉమ్మడి ఖమ్మం, నల్లగొండ, వరంగల్ జిల్లాలకు చెందిన వారంతా క్యూ కట్టిన సంగతి విదితమే. ఇప్పుడా భావన తొలగిపోయి.. ఖమ్మంలోని సర్కారు దవాఖానకు వెళితే కొత్త రోగాలు పుట్టుకొస్తాయని బెంబేలెత్తుతున్నారు.
ప్రస్తుత వర్షాలతో రోగాలను పారదోరాల్సిన జిల్లా సార్వజనీన ఆసుపత్రి ప్రాంగణం వర్షపు నీరు నిలిచి చెరువులను తలపిస్తోంది. అడుగు తీసి అడుగేయాలంటేనే జనం, రోగులు తీవ్ర అసౌకర్యానికి గురవుతున్నారు. రోజుకు వెయ్యి నుంచి 1,500 మధ్యలో ఓపీ, 500లకుపైగా ఇన్ పేషెంట్లు, వందల సంఖ్యలో వైద్యులు, సిబ్బంది సంచరిస్తుంటారు. ఉమ్మడి జిల్లాకే మణిహారంగా మారిన దవాఖాన అపరిశుభ్రతకు నిలయంగా మారడంతో ‘పెద్దాసుపత్రి’ ప్రతిష్ట మసకబారుతోందని పలువురు ఆవేదన వ్యక్తం చేస్తున్నారు. దుర్వాసన వెదజల్లుతున్న వార్డుల్లోనే రోగులు అవస్థలు పడుతూ చికిత్స పొందుతున్నారు. అలాగే రోగులను దవాఖానలోకి, కోలుకున్న తర్వాత ప్రాంగణంలోకి తరలించే స్ట్రెచర్లు, ఇతర పరికరాలన్నీ తుప్పుపట్టి పనికి రాకుండా పోయాయి. దీంతో రకరకాల సర్జరీలు చేయించుకున్న రోగులు నేలమీదే పాకుతూ వెళ్లాల్సిన దుస్థితి నెలకొంది.
రాష్ట్రంలో అధికారంలోకి వచ్చిన కాంగ్రెస్ ప్రభుత్వం పేదల ఆరోగ్యం పట్ల దృష్టి సారించిన పాపాన పోవడం లేదనే విమర్శలు వెల్లువెత్తుతున్నాయి. ఎనిమిది నెలలుగా కీలకమైన జిల్లా ఆసుపత్రి అభివృద్ధికి లేదా కనీస మౌలిక వసతుల కల్పనకు నయాపైసా మంజూరు చేయకపోవడం గమనార్హం. గత కేసీఆర్ సర్కార్ హయాంలో సర్వాంగ సుందరంగా రూపుదిద్దుకున్న జిల్లా ఆసుపత్రి నేడు దుర్గంధానికి కేరాఫ్గా నిలిచిందనే వ్యాఖ్యానాలు వినిపిస్తున్నాయి. ఖమ్మం ప్రభుత్వ మెడికల్ కళాశాలకు అనుసంధానించడంతో దశ మారుతుందని అంతా భావించారు.
అయితే నిధుల లేమితో మురికి కూపంగా మారడం ప్రతి ఒక్కరినీ బాధిస్తోంది. ప్రాంగణంలోని సైకిల్ స్టాండ్, క్యాంటీన్, మెడికల్ షాపు వంటి వాటిపై వస్తున్న అరకొర అద్దెలపైనే ఆధారపడి చిన్న చిన్న పనులు చేసుకోవాల్సి వస్తోంది. జిల్లాలో ముగ్గురు మంత్రులు ఉన్నప్పటికీ నిరుపేదల వైద్యానికి ఆసరాగా నిలుస్తోన్న దవాఖానకు ఎలాంటి ఉపయోగం లేకుండా పోయిందనే విమర్శలు వస్తున్నాయి. ఇటీవలే కళాశాల ప్రిన్సిపాల్ డాక్టర్ రాజేశ్వర్రావు, ఆసుపత్రి సూపరింటెండెంట్ డాక్టర్ ఎల్.కిరణ్కుమార్లు ఈ విషయాన్ని కలెక్టర్ ముజామ్మిల్ ఖాన్ దృష్టికి తీసుకెళ్లినట్లు సమాచారం. ప్రతిపాదనలతో రావాలని ఆయన ఆదేశించినట్లు తెలిసింది.