భద్రాద్రి కొత్తగూడెం, జూలై 23 (నమస్తే తెలంగాణ): రెండు రోజులుగా ఉప్పొంగి ప్రవహించిన గోదావరి మంగళవారం ఒక్కసారిగా శాంతించింది. ఎగువన భారీ వర్షాలు కురవడం, ప్రాజెక్టుల నుంచి నీరు విడుదల కావడం వంటి కారణాలతో భద్రాద్రి జిల్లా భద్రాచలం వద్ద గోదావరికి వరద పోటెత్తిన విషయం విదితమే. క్రమేపీ పెరుగుతూ రెండో ప్రమాద హెచ్చరికను కూడా దాటి ప్రవహించింది. అయితే, మంగళవారం ఉదయం 10 గంటల వరకు 51.60 అడుగులకు చేరుకున్న గోదావరి ప్రవాహం.. ఆ తరువాత రెండు గంటల పాటు నిలకడగా కొనసాగింది. 11 గంటల నుంచి గంటకు ఒక్కో అంగుళం చొప్పున తగ్గడం ప్రారంభించింది. రాత్రి 7 గంటలకు 50.10 అడుగులకు తగ్గింది. దీంతో భద్రాచలం పట్టణ వాసులతోపాటు చర్ల, దుమ్ముగూడెం మండలాల ప్రజలు ఊపిరి పీల్చుకున్నారు. అయినప్పటికీ వరద ప్రవాహం ఇంకా రెండో ప్రమాద హెచ్చరిక దాటి ఉండడంతో అధికారులు అప్రమత్తంగా ఉన్నారు.
ఉదయం భద్రాచలంలోకి వరద నీరు..
మంగళవారం ఉదయం వరకూ పెరుగుతూ వచ్చిన గోదావరి వరద ఉదయం వేళ భద్రాచలం పట్టణంలోకి ప్రవేశించింది. కరకట్ట పనులు చేసే ప్రాంతంలో స్లూయిజ్ నుంచి వరద నీరు పోటు వేసింది. దీంతో నీళ్లు పట్టణంలోకి రావడం ప్రారంభించాయి. వెంటనే అధికారులు స్పందించి ఆ ప్రాంతాన్ని మట్టితో నింపడంతో ప్రమాదం తప్పింది. అలాగే, వరద కారణంగా భద్రాచలం నుంచి చర్ల, దుమ్ముగూడెం మండలాలకు రాకపోకలు నిలిచిపోయాయి. రహదారి పైకి నీరు చేరిన ప్రాంతాల్లో రాకపోకలను నియంత్రించడం కోసం అధికారులు బారికేడ్లను ఏర్పాటు చేశారు.
ముంపు ప్రాంతాలకు వైద్య బృందాలు..
వరదలు చుట్టుముడుతున్న నేపథ్యంలో వరద ముంపులో ఉన్న గ్రామాలకు వైద్య బృందాలు చేరుకున్నాయి. చర్ల, దుమ్ముగూడెం, భద్రాచలం, బూర్గంపహాడ్ మండలాల్లోని కొన్ని గ్రామాలను ఇప్పటికే వరదనీరు చుట్టుముట్టడంతో అక్కడ పారిశుధ్య లోపించే ప్రమాదం ఉన్నందున వైద్యబృందాలు అక్కడికి వెళ్లి వైద్య శిబిరాలను ఏర్పాటు చేశాయి. వరద ప్రభావిత ప్రాంతాల్లో గర్భిణులను ముందస్తుగా భద్రాచలం ఏరియా ఆసుపత్రికి తరలించారు.
వర్షాలు పడితే మళ్లీ పెరిగే ప్రమాదం..
మరోసారి వర్షాలు అధికంగా కురిస్తే వరద మరోసారి పెరిగే ప్రమాదం ఉందని అధికారులు హెచ్చరికలు జారీ చేస్తున్నారు. ఈ నేపథ్యంలో ముంపు గ్రామాల ప్రజలకు ముందస్తు సమాచారాలను ఇవ్వాలని స్థానిక అధికారులకు కలెక్టర్ ఆదేశాలు జారీ చేశారు.
పొంగుతున్న కొండ వాగులు
ఇటీవల కురిసిన వర్షాలకు చర్ల మండలంలోని కొండవాగులు పొంగుతున్నాయి. మండల కేంద్రానికి రాకపోకలకు అంతరాయం ఏర్పడింది. మారుమూల ఆదివాసీ గ్రామాలకు వైద్యసేవలు అందించేందుకు వెళ్లాల్సిన వైద్య బృందాలు ప్రమాదకరమైన వాగులు దాటి వెళ్తున్నారు. స్థానిక ఆదివాసీలు కూడా అధిక లోతుతో ప్రమాదకరంగా ప్రవహిస్తున్న వాగులను దాటుతూ రాకపోకలు సాగిస్తున్నారు. సత్యనారాయణపురం వైద్య సిబ్బంది మంగళవారం రామచంద్రాపురంలో వైద్య శిబిరం నిర్వహించేందుకు వెళ్లాల్సి ఉంది. దీంతో కాలినడకన బయలుదేరారు. కుర్నపల్లి, ఆర్సీపురం మధ్య ఉన్న వాగును స్థానికుల సాయంతో దాటి వెళ్లారు. చివరికి రామచంద్రాపురం చేరుకొని అక్కడి ఆదివాసీలకు వైద్యసేవలు అందించారు. తీసుకోవాల్సిన జాగ్రత్తల గురించి వివరించారు. అలాగే, తిప్పాపురం – బత్తినపల్లి అటవీ గ్రామాల మధ్య, కొత్తపల్లి – దండుపేట మధ్య ఉన్న రోడ్లు వరదలకు తెగిపోయాయి.
తాలిపేరు వరద తగ్గుముఖం..
అలాగే, ఇప్పటిదాకా ఉధృతంగా ప్రవహించిన తాలిపేరు వరద తాజాగా తగ్గుముఖం పట్టింది. ప్రాజెక్టు అధికారులు మంగళవారం 25 గేట్లు పూర్తిగా ఎత్తి 20,179 క్యూసెక్కుల నీటిని దిగువనున్న గోదావరిలోకి వదిలారు. ప్రాజెక్టు పూర్తిస్థాయి నీటిసామర్థ్యం 74 మీటర్లు కాగా ప్రస్తుతం 69.98 మీటర్ల మేర నీళ్లు ఉన్నట్లు అధికారులు తెలిపారు.