చండ్రుగొండ, జూలై 24: రైతులందరికీ బేషరతుగా పంట రుణాలు మాఫీ చేయాలని బీఆర్ఎస్ నేతలు డిమాండ్ చేశారు. ఏజెన్సీ ప్రాంత రైతులకు ఎలాంటి కొర్రీలూ పెట్టొద్దని స్పష్టం చేశారు. భద్రాద్రి జిల్లా చండ్రుగొండ మండలంలో రుణమాఫీ కాని రైతులతో కలిసి బీఆర్ఎస్ నాయకులు స్థానిక తహసీల్దార్ కార్యాలయం ఎదుట బుధవారం ధర్నా నిర్వహించారు. ఈ సందర్భంగా బీఆర్ఎస్ మండల అధ్యక్షుడు దారా వెంకటేశ్వరరావు మాట్లాడుతూ.. సహకార సంఘాల్లో, బ్యాంకుల్లో పంట రుణాలు తీసుకున్న రైతులందరికీ రుణమాపీ చేయాలని డిమాండ్ చేశారు. పట్టాదారు పాస్బుక్తోనేగాక పహాణీలతో తీసుకున్న పంట రుణాలను కూడా మాఫీ చేయాలని డిమాండ్ చేశారు.
పట్టా బుక్కులు, రేషన్కార్డులు లేవనే సాకుతో రుణమాఫీ చేయకుండా రైతులకు అన్యాయం చేయడం సరికాదని స్పష్టంచేశారు. ఏజెన్సీ ప్రాంతాల్లో ఎక్కువమంది రైతులు పహాణీలతోనే పంట రుణాలు తీసుకున్నందున వారందరికీ రుణమాఫీని వర్తింపజేయాలని డిమాండ్ చేశారు. అలాగే రైతుభరోసాను కూడా వెంటనే అందించాలని డిమాండ్ చేశారు. అనంతరం గిర్దావర్ అక్బర్కు వినతిపత్రం సమర్పించారు. గుంపెన సొసైటీ వైస్ చైర్మన్ నల్లమోతు వెంకటనారాయణ, డైరెక్టర్ ఉన్నం నాగరాజు, బీఆర్ఎస్ నాయకులు మేడా మోహన్రావు, మద్దిరాల చిన్నిపిచ్చయ్య, మల్లెం వెంకటేశ్వర్లు, నరుకుళ్ల అప్పాజీ, పాండ్ల అంజన్రావు, శ్రీను, రైతులు పాల్గొన్నారు.