పెనుబల్లి, జూలై 26 : తాను ఎంపీడీవోనని చెప్పుకుంటూ పేదల నుంచి డబ్బుల వసూళ్లకు పాల్పడుతున్న వ్యక్తిని ఖమ్మంజిల్లా పెనుబల్లి మండలంలోని వీఎం బంజర పోలీసులు శుక్రవారం అరెస్టు చేశారు. ఎస్సై ఎం.వెంకటేష్ తెలిపిన ప్రకారం.. ఆంధ్రప్రదేశ్లోని ఎన్టీఆర్ జిల్లా వీర్లపాడు మండల కేంద్రానికి చెందిన అద్దంకి దయాకర్రావు తాను మచిలీపట్నం ఎంపీడీవోనని చెప్పుకుంటూ గత కొన్ని సంవత్సరాలుగా ప్రజలను మోసం చేస్తున్నాడు. నిరుపేదలకు గూడు కల్పించడమే తన లక్ష్యమంటూ ఆంధ్రప్రదేశ్ మాజీ న్యాయసలహా మండలి నిపుణుడు, స్వర్గీయ పాటిబండ్ల చంద్రశేఖర్రావు పేరిట ఓ ట్రస్టు ఏర్పాటు చేసుకున్నాడు.
దీనిలో భాగంగా పెనుబల్లి మండలం పాతకుప్పెనకుంట్ల గ్రామంలో ట్రస్టు తరఫున ఇళ్లు కట్టిస్తానని చెప్పి 20మందిని ఎంపిక చేశాడు. దీనికి సత్తుపల్లి ఎమ్మెల్యే రాగమయి చేతులమీదుగా ఈ నెల 8వ తేదీన శంకుస్థాపన సైతం చేయించాడు. అయితే గ్రామానికి చెందిన నారపోగు శ్రీనివాసరావు, నారపోగు రవికుమార్, కంటేపుడి ఏసు, నారపోగు నాగరాజు ఒక్కొక్కరు రూ.4 వేలు చెల్లించాలని చెప్పి రూ.16 వేలు వసూలు చేశాడు. దీంతో దయాకర్రావు ప్రవర్తనపై అనుమానం వచ్చిన గ్రామస్తులు ఎమ్మెల్యే రాగమయికి ఫిర్యాదు చేయడంతో విచారణ చేయాలని పోలీసులకు ఎమ్మెల్యే సూచించారు.
అదేవిధంగా నారపోగు శ్రీనివాసరావు వీఎం బంజర పోలీస్స్టేషన్లో ఫిర్యాదు చేయడంతో పోలీసులు నకిలీ ఎంపీడీవో దయాకర్రావును అరెస్టు చేశారు. అతడిపై 1992 నుంచి అనేక చీటింగ్ కేసులు నమోదయ్యాయని, వాటిలో కొన్ని నందిగామలో, వీర్లపాడులో రెండు, పిడుగురాళ్లలో ఒకటి, ఇబ్రహీంపట్నంలో ఒకటి, ఖమ్మం రూరల్లో ఒకటి, తిరువూరులో ఒకటి మొత్తం 8 కేసులు నమోదైనట్లు ఎస్సై వెంకటేష్ తెలిపారు. ఈ మేరకు నకిలీ ఎంపీడీవోను అరెస్ట్ చేసి రిమాండ్కు తరలిస్తున్నట్లు పేర్కొన్నారు. ట్రస్టు పేరిట ప్రజాసేవ చేస్తున్నట్లు చెప్పుకుంటూ మోసాలకు పాల్పడేవారి పట్ల అప్రమత్తంగా ఉండాలని ప్రజలకు సూచించారు.