రఘునాథపాలెం, జూలై 24 : ఆధార్ సెంటర్లో ధరల పట్టిక ఏర్పాటైంది. ‘ఆధార్ సెంటర్లలో అడ్డగోలు దోపిడీ’ పేరుతో ఈ నెల 17న ‘నమస్తే తెలంగాణ’ దినపత్రికలో కథనం ప్రచురితమైన విషయం విదితమే. దీనిపై స్పందించిన ఉన్నతాధికారులు కేంద్రం నిర్వాహకులపై ఆగ్రహం వ్యక్తం చేసినట్లు తెలిసింది. దీంతో నగరంలోని వీడీవోస్ కాలనీ ఆధార్ సెంటర్లో ధరల పట్టికను అమర్చారు.
అయితే బోర్డు ఇంగ్లిష్లో ఉండడంతో తమకు అర్థం కావడం లేదని సేవల నిమిత్తం వచ్చే పలువురు వినియోగదారులు ఆరోపిస్తున్నారు. దీంతో నిర్వాహకుల తీరులో ఏమాత్రం మార్పు రాలేదు. ఉచితంగా నిర్వహించాల్సిన ఆధార్ ఎన్రోల్మెంట్కూ రూ.100 వసూలు చేయడం కనిపించింది. అంతేకాక సేవల నిర్వహణ తర్వాత వినియోగదారుడికి ఇచ్చే ప్రింట్లో రూ.50 ఉంటే.. రూ.వంద తీసుకుంటున్నారు. ఈ క్రమంలో అధిక వసూళ్లపై ఉన్నతాధికారులు స్పందించి చర్యలు తీసుకోవాలని వినియోగదారులు కోరుతున్నారు.