మామిళ్లగూడెం, మే 16: వరంగల్ – ఖమ్మం – నల్గొండ శాసనమండలి పట్టభద్రుల ఉప ఎన్నిక కోసం ఏర్పాట్లను వేగవంతం చేయాలని ఖమ్మం కలెక్టర్ వీపీ గౌతమ్ అధికారులకు సూచించారు. ఎన్నికల ఏర్పాట్లపై సంబంధిత అధికారులతో ఐడీవోసీలో గురువారం నిర్వహించిన సమావేశంలో ఆయన మాట్లాడారు. శాసనమండలి పట్టభద్రుల ఉప ఎన్నిక పోలింగ్ ఈ నెల 27న, కౌంటింగ్ జూన్ 5న జరుగనున్నట్లు చెప్పారు.
పోలింగ్కు సిబ్బందిని నియమించాలని సూచించారు. జిల్లాలో ఎన్నికల నిర్వహణకు 118 పోలింగ్ కేంద్రాలు ఏర్పాటు చేస్తున్నట్లు చెప్పారు. అందుకోసం 142 మంది పీవోలు, 142 మంది ఏపీవోలు, 284 మంది ఓపీవోలు అవసరమున్నట్లు వివరించారు. పోలింగ్ సిబ్బందికి శిక్షణకు ఏర్పాట్లు చేయాలన్నారు. జిల్లాలో 83,879 మంది పట్టభద్రుల ఓటర్లున్నందున రిజర్వుతో కలుపుకొని 129 బ్యాలెట్ బాక్సులను సిద్ధం చేయాలని ఆదేశించారు. ప్రతి పోలింగ్ కేంద్రాన్నీ ఆర్డీవోలు, తహసీల్దార్లు పరిశీలించి వసతులు కల్పించాలన్నారు. బ్యాలెట్ పత్రాల తనిఖీకి సంబంధిత బాధ్యులు పోలీస్ సెక్యూరిటీతో వెళ్లాలని సూచించారు.
ఓటర్ స్లిప్పుల పంపిణీ ఎంతో ముఖ్యమని, అది వంద శాతం పూర్తి కావాలని అన్నారు. డిస్ట్రిబ్యూషన్ కేంద్రాన్ని ఖమ్మం ఎస్ఆర్బీజీఎన్ఆర్ డిగ్రీ కళాశాలలో, రిసెప్షన్ కేంద్రాన్ని నల్గొండలో ఏర్పాటు చేసినట్లు చెప్పారు. రూట్ల ఏర్పాటుకు కార్యాచరణ చేసి రవాణా ప్రణాళికను సిద్ధం చేయాలని ఆదేశించారు. బందోబస్తు కోసం పకడ్బందీ చర్యలు చేపట్టాలని స్పష్టం చేశారు. అదనపు కలెక్టర్ మధుసూదన్నాయక్, వివిధ శాఖల జిల్లా అధికారులు సోమశేఖరశర్మ, శ్రీరామ్, శ్రీనివాసరెడ్డి, రాజేశ్వరి, గణేశ్, రాజేందర్, అరుణ, మదన్గోపాల్, రాంబాబు, సత్యనారాయణ, వెంకటరమణ, సతీశ్, రాంప్రసాద్ తదితరులు పాల్గొన్నారు.