భద్రాద్రి కొత్తగూడెం, మే 27 (నమస్తే తెలంగాణ) : ఉమ్మడి ఖమ్మంవరంగల్నల్గొండ జిల్లాల పట్టభద్రుల నియోజకవర్గ ఎమ్మెల్సీ ఎన్నికల పోలింగ్ భద్రాద్రి జిల్లాలో ప్రశాంతం ముగిసింది. జిల్లాలోని 55 పోలింగ్ కేంద్రాల్లో సోమవారం ఉదయం 8 గంటలకే ప్రారంభమైన ఓటింగ్. పది గంటల వరకు మందకొడిగానే సాగింది. అప్పటికే కేవలం 7.74 శాతం మాత్రమే పోలింగ్ నమోదైంది.
ఆ తర్వాత ఒక్కరొక్కరుగా పట్టభద్రులు పోలింగ్ కేంద్రాలకు చేరుకోవడంతో పోలింగ్ శాతం పెరిగింది. మధ్యాహ్నం 12 గంటలకు 10,342 మంది, 2 గంటలకు 18,688 మంది ఓట్లు వేశారు. సాయంత్రం 4 గంటలకు 27,294 మంది ఓట్లు వేశారు. అప్పటికి 68.05 శాతం ఓటింగ్ జరిగింది. మొత్తంగా సాయంత్రం పోలింగ్ ముగిసే సమయానికి జిల్లాలో 40,106 మంది ఓటర్లకు గాను 28,077 మంది ఓట్లు వేశారు. మొత్తంగా 70.01 శాతం మంది ఓటు హక్కును వినియోగించుకున్నారు.
జిల్లాలోని టేకులపల్లి పోలింగ్ కేంద్రాన్ని కలెక్టర్ ప్రియాంక తనిఖీ చేశారు. ఓటింగ్ తీరును పరిశీలించారు. సిబ్బందికి తగు సూచనలు చేశారు. వెబ్కాస్టింగ్ ద్వారా అన్ని కేంద్రాల పోలింగ్ సరళినీ పర్యవేక్షించారు. ఎస్పీ రోహిత్రాజు కూడా పలు పోలింగ్ కేంద్రాలను సందర్శించి బందోబస్తును పర్యవేక్షించారు.
పోలింగ్ సమయంలోనూ కాంగ్రెస్ నాయకులు తమ కక్కుర్తిని ప్రదర్శించారు. గ్రాడ్యుయేట్ల ఓట్ల కోసం నోట్లను ఎరగా చూపారు. ఏకంగా పోలింగ్ కేంద్రాల్లోకి వచ్చి పట్టభద్రులకు నోట్లు చూపించి మరీ ఓట్లు వేయించుకున్నారు. చివరికి అక్కడికి మీడియా ప్రతినిధులు చేరుకునే సరికి ఉడాయించారు. ఈ తతంగాన్ని ఎన్నికల అధికారులు కూడా పట్టించుకోలేదు. తమకు సమాచారమేమీ లేదంటూ తప్పించుకున్నారు.
జిల్లాలోని పలువురు ప్రముఖులు తమ పోలింగ్ కేంద్రాల్లో ఓటు హక్కును వినియోగించుకున్నారు. కరకగూడెంలో పినపాక మాజీ ఎమ్మెల్యే, బీఆర్ఎస్ భద్రాద్రి జిల్లా అధ్యక్షుడు రేగా కాంతారావు, టేకులపల్లిలో ఇల్లెందు మాజీ ఎమ్మెల్యే హరిప్రియ, చుంచుపల్లిలో కొత్తగూడెం ఎమ్మెల్యే కూనంనేని సాంబశివరావు తదితరులు ఓటు వేశారు. అధికారులు, ఉద్యోగులు ఎక్కువగా కొత్తగూడెం బాబూక్యాంపులో వారి ఓటు హక్కును వినియోగించుకున్నారు.
భద్రాది జిల్లాలో పోలింగ్ సరళిని బీఆర్ఎస్ ప్రజాప్రతినిధులు, నేతలు పరిశీలించారు. కొత్తగూడెం, టేకులపల్లి కేంద్రాల్లో రాజ్యసభ సభ్యుడు వద్దిరాజు రవిచంద్ర, కొత్తగూడెం, పినపాక, అశ్వారావుపేట, ఇల్లెందు పోలింగ్ కేంద్రాల్లో మాజీ ఎమ్మెల్యేలు వనమా వెంకటేశ్వరరావు, రేగా కాంతారావు, బానోతు హరిప్రియ, తాటి వెంకటేశ్వర్లు తదితరులు ఓటింగ్ను పరిశీలించిన పోలింగ్ సరళిని పర్యవేక్షించారు. కాగా, ఓటు హక్కు వినియోగించుకున్న పట్టభద్రులకు కొత్తగూడెం మాజీ ఎమ్మెల్యే వనమా కృతజ్ఞతలు తెలిపారు.