ఒకప్పుడు అసౌర్యాలకు నిలయమైన ఆ పాఠశాల.. ప్రస్తుతం కార్పొరేట్ హంగులను సంతరించుకున్నది. సీఎం కేసీఆర్ ప్రతిష్ఠాత్మకంగా అమలు చేస్తున్న ‘మన ఊరు- మన బడి’ ఆ పాఠశాల రూపురేఖలనే మార్చేసింది. ఈ కార్యక్రమంలో భాగంగా ఈ నెల 1న జిల్లావ్యాప్తంగా 50కి పైగా పాఠశాలలు ప్రారంభమయ్యాయి. అందులో బుగ్గపాడు ప్రాథమిక పాఠశాల ఒకటి. పాఠశాల అభివృద్ధికి ప్రభుత్వం రూ.27 లక్షల నిధులు కేటాయించింది. గ్రామస్తుడు బొడ్డు శివరామకృష్ణ చొరవ తీసుకుని గ్రామస్తుల సహకారంతో మరో రూ.15 లక్షలు సమకూర్చారు. ఆ పాఠశాలలో కార్పొరేట్కు దీటుగా సౌకర్యాలు కల్పించారు. విద్యార్థులకు నాణ్యమైన విద్య అందుతుండడంతో వారి తల్లిదండ్రులు హర్షం వ్యక్తం చేస్తున్నారు.
సత్తుపల్లి రూరల్, ఫిబ్రవరి 14: ఒకప్పుడు కనీస వసతులు లేక కునారిల్లిన ప్రభుత్వ బడులు సీఎం కేసీఆర్ ప్రతిష్ఠాత్మకంగా అమలు చేస్తున్న ‘మన ఊరు- మన బడి’తో అభివృద్ధి బాట పట్టాయి. మొదటి విడతలో ఎంపిక చేసిన స్కూళ్లు ఇప్పుడు అన్ని సదుపాయాలతో అందుబాటులోకి వచ్చాయి. ఈనెల 1న జిల్లావ్యాప్తంగా 50పైకి పైగా పాఠశాలలు ప్రారంభమయ్యాయి. ఇందులో బుగ్గపాడు ప్రాథమిక పాఠశాల ఒకటి. పాఠశాల అభివృద్ధికి ప్రభుత్వం రూ.27 లక్షల నిధులు విడుదల చేయగా గ్రామస్తుడు బొడ్డు శివరామకృష్ణ చొరవ తీసుకుని గ్రామస్తుల సహకారంతో మరో రూ.15 లక్షలు సమకూర్చారు.
పాఠశాలలో అన్ని వసతులు..
రూ.42 లక్షలతో అధికారులు పాఠశాల చుట్టూ ప్రహరీ, వంట గది, టాయ్లెట్స్, వాష్ బేషన్స్ నిర్మించారు. టాయిలెట్లలో టైల్స్ వేయించారు. పాఠశాలకు విద్యుత్ సౌకర్యం కల్పించారు. డ్యూ యల్ డెస్క్ బల్లలు సమకూర్చారు. ఉపాధ్యాయులు పాఠాలు చెప్పేందుకు గ్రీన్ బోర్డులు, డిజిటల్ బోధనకు సామగ్రి, పిల్లలు ఆడుకునేందుకు పార్కు, దానిలో ఆట వస్తువులు ఏర్పాటు చేశారు. పాఠశాలలో మొక్కలు నాటారు.
గ్రీనరీకి ప్రాధాన్యం..
పాఠశాల ఆవరణలో పెంచిన మొక్కలు, గార్డెనింగ్ ప్రత్యేక ఆకర్షణగా నిలుస్తున్నాయి. రకరకాల పూలమొక్కలతో బడి ఆహ్లాదకరంగా మారింది. బడి ముందు ముఖద్వారంపైన మధ్యలో సరస్వతి దేవి విగ్రహం, అటు ఇటు యూనిఫాం ధరించి ఉన్న విద్యార్థుల ప్రతిమలు ఆకట్టుకుంటున్నాయి. కార్పొరేట్ స్థాయిలో వసతులు సమకూరడంతో గ్రామస్తులు బడిని చూసేందుకు ఆసక్తి కబరుస్తున్నారు. ప్రైవేటు స్కూల్స్కు మించి వసతులు కల్పించడంతో విద్యార్థుల తల్లిదండ్రులు హర్షం వ్యక్తం చేస్తున్నారు.
దాతలకు ఎమ్మెల్యే సండ్ర అభినందన..
గ్రామస్తుడు, దాత బొడ్డు శివరామకృష్ణ చొర వ తీసుకుని పాఠశాల అభివృద్ధికి రూ.15 లక్షలు సమకూర్చినందుకు ఎమ్మెల్యే సండ్ర వెంకటవీరయ్య ఆయన్ను అభినందించారు. బడి బాగోగులను పట్టించుకుంటూ ఇతర పాఠశాలలకు ఆదర్శంగా నిలిపిన యాజమాన్యాన్ని ప్రశంసించారు. గ్రామస్తుల సహకారం ఉంటే ఏదైనా సాధించచొచ్చనడానికి బుగ్గపాడు పాఠశాలే ఉదాహరణ.