భద్రాద్రి కొత్తగూడెం ఏప్రిల్ 3 (నమస్తే తెలంగాణ) : ఓటు హక్కు ఉన్న ప్రతి ఒక్కరూ బాధ్యతగా ఓటు వేయాలని భద్రాద్రి కలెక్టర్ ప్రియాంక ఆల అన్నారు. భారత ఎన్నికల సంఘం ఆదేశాల మేరకు బుధవారం భద్రాద్రి కొత్తగూడెం జిల్లా కేంద్రంలో ఐ ఓట్ ఫర్ షూర్ అంటూ పోస్టాఫీస్ సెంటర్ నుంచి లక్ష్మీదేవిపల్లి మార్కెట్ యార్డు వరకు చేపట్టిన రన్ను ఎస్పీ రోహిత్ రాజుతో కలిసి కలెక్టర్ జెండా ఊపి ప్రారంభించారు. ఈ సందర్భంగా ఆమె మాట్లాడుతూ 18 ఏండ్లు నిండిన ప్రతి ఒక్కరూ ఓటు హక్కును సద్వినియోగం చేసుకోవాలన్నారు. పార్లమెంటు ఎన్నికల్లో పోలింగ్ శాతం పెంచాల్సిన బాధ్యత మనందరిపై ఉందన్నారు.
మనం ఓటు వేయడంతోపాటు ఓటు హక్కుపై ప్రజలకు అవగాహన కల్పించాలన్నారు. మే 13న జరిగే పార్లమెంటు ఎన్నికల్లో ప్రతి ఒక్కరూ తమ ఓటు హక్కును వినియోగించుకోవాలన్నారు. 2024, ఏప్రిల్ 1 వరకు 18 ఏళ్లు నిండిన వారు ఈ నెల 14వ తేదీ వరకు కొత్త ఓటర్లుగా నమోదు చేయించుకోవాలన్నారు. జిల్లాలో దివ్యాంగులు, ట్రాన్స్జెండర్లు, వృద్ధులు ఓటు వేసేలా ప్రోత్సాహం కల్పిస్తున్నామన్నారు. కాగా.. యువజన శాఖ ఆధ్వర్యంలో నిర్వహించిన రన్లో యువకులు, మహిళలు ఉత్సాహంగా పాల్గొన్నారు. కార్యక్రమంలో డీఆర్డీవో విద్యాచందన, ఏఆర్వో కాసయ్య, డీఎఫ్వో కృష్ణగౌడ్, డీవైఎస్వో పరంధామరెడ్డి, జడ్పీ సీఈవో ప్రసూనారాణి, ఎక్సైజ్ సూపరింటెండెంట్ జానయ్య, జిల్లా అధికారులు మనోహర్, సంజీవరాజు, ఏవో గన్యా, ఎంపీడీవోలు, ఎంపీవోలు, కార్యదర్శులు పాల్గొన్నారు.