భద్రాచలం, జూలై 19 : ఎగువన ఉన్న మహారాష్ట్ర, ఛత్తీస్గఢ్ రాష్ర్టాల్లో కురుస్తున్న భారీ వర్షాలకు భద్రాచలం వద్ద గోదావరి వరద నీటిమట్టం పెరుగుతోంది. గురువారం రాత్రి 7 గంటలకు 18.2 అడుగులు ఉన్న గోదావరి క్రమక్రమంగా పెరుగుతూ శుక్రవారం మధ్యాహ్నం 12 గంటలకు 26.3 అడుగులకు చేరింది.
శుక్రవారం రాత్రి 7 గంటలకు 27.1 అడుగుల మేర ప్రవహిస్తోంది. నదీ పరీవాహక ప్రాంతాలతోపాటు ఎగువ రాష్ర్టాల్లో కూడా వర్షాలు విస్తారంగా కురుస్తుండడంతో వరద మరింతగా పెరిగే అవకాశం ఉందని అధికారులు అంచనా వేస్తున్నారు. పట్టణంలో ఎడతెరిపి లేకుండా కురుస్తున్న వర్షాలకు శివారు కాలనీలు బురదమయమయ్యాయి.