అశ్వారావుపేట టౌన్, జూలై 16 : నైరుతి మొదలైన నాటి నుంచి నిన్నా మొన్నటి వరకూ విరామం లేకుండా వర్షపు జల్లులు కురుస్తూనే ఉన్నాయి. కానీ.. ఇప్పటికీ జిల్లాలో సాగుకు సరిపడినంత వర్షపాతం నమోదు కాలేదు. దీంతో జిల్లాలోని అన్ని ప్రాంతాల అన్నదాతలూ వరుణ దేవుడి కరుణ కోసం ఎదురుచూస్తున్న వేళ.. అశ్వారావుపేట వెంకమ్మ చెరువు కింది రైతులు మాత్రం ఏకంగా వరినాట్లు వేస్తున్నారు. ఇటీవల కురిసిన వర్షాలకు అశ్వారావుపేట మండలంలోని వెంకమ్మ చెరువుకు వరద నీరు వచ్చి చేరుతోంది. దీంతో దీని ఆయకట్టు కింది రైతులందరూ వరి నాట్లలో నిమగ్నమయ్యారు.
వెంకమ్మ చెరువు కింది రైతులు వరినాట్లు వేసే పనుల్లో బిజీబిజీగా ఉంటే.. దాని వెలుపలి రైతులు మాత్రం దిగాలు పడుతున్నారు. వారిలోనూ కొందరు రైతులు తమ సొంత బోర్ల కింద, మరికొందరు రైతులు పొరుగు రైతుల బోర్ల కింద వరినాట్లు వేసుకుంటున్నారు. కానీ.. నీటి వసతి లేని రైతులు మాత్రం నీలిమబ్బుల కోసం ఆకాశం వైపు ఆశగా చూస్తుండడం గమనార్హం.