‘మందు తాగితే వృద్ధాప్యం రాదట’.. ఈ మాట విన్నవారందరూ నిజమేనా అని ఆశ్చర్యపోతుంటారు.. నిజమే, వృద్ధాప్యం రాకముందే మనిషి పోతాడు. అయితే బాధాకరమైన విషయమేమిటంటే తెలిసితెలిసి మనిషి మద్యానికి బానిసవుతున్నాడు. దాని కబంధహస్తాల్లో చిక్కి విలవిలలాడుతున్నాడు. ఆ మత్తులోనే చిత్తవుతున్నాడు. అధికారిక లెక్కలు చూస్తే బాధతోపాటు ఆశ్చర్యమేస్తోంది. జిల్లాలో ఏటేటా మద్యంప్రియుల సంఖ్య పెరిగిపోతున్నది. ఏడాదిలో సుమారు రెండు కోట్ల లీటర్లు తాగేస్తున్నారంటే నమ్మశక్యం కావడం లేదు. ఆరోగ్యంపై నేటి యువత, జనం బొత్తిగా శ్రద్ధచూపడం లేదని స్పష్టంగా అర్థమవుతున్నది. చక్కని ఆరోగ్యాన్నిచ్చే పాల కంటే మందే ఎక్కువగా తాగుతుండడం గమనార్హం.
భద్రాద్రి కొత్తగూడెం, జూలై 8 (నమస్తే తెలంగాణ) : ‘ఆరోగ్యమే మహాభాగ్యం’ అని ఏనాటి నుంచో పెద్దలు చెప్పే చక్కని మాట. ఇలాంటి మాటలు ఇప్పుడు నీతులకే పరిమితమయ్యాయి. ‘పాలు తాగండి- ఆరోగ్యంగా ఉండండి’ అని వైద్యారోగ్యశాఖ, వైద్యులు సైతం చెప్పే మంచిమాటలను పక్కన పెడుతున్న జనం.. మద్యం ఆరోగ్యానికి హానికరమని తెలిసి కూడా దానికే ప్రాధాన్యత ఇస్తున్నట్లు లెక్కలు చెప్తున్నాయి. మద్యం తాగుతున్న సీసాల లెక్కలు చూస్తే విస్తుపోయే నిజాలు బయటపడుతున్నాయి. నిజమేనా అంటే ఎవరైనా నిజమే అంటారు ఎందుకంటే ఈ సమాజంలో మందుకు ఇచ్చే ప్రాధాన్యత పాలకు ఇవ్వరని ‘జగమెరిగిన సత్యమే’ కానీ లెక్కలు చూస్తే మరింత ఆశ్చర్యమనిపిస్తున్నది.
‘చిక్కటి పాలు- చక్కటి ఆరోగ్యం’ అని ఆరోగ్యశాఖ నొక్కిపట్టి చెప్పినా యువత మాత్రం మందువైపే చూస్తున్నారు.. చెడు వ్యసనాలకు బానిసలవుతున్నారు. ముఖ్యంగా కాలేజీ స్థాయి నుంచే మద్యానికి అలవాటై పెళ్లికాక ముందే రోగాల బారినపడుతున్నారు. దీంతో షుగర్, బీపీ వంటి వ్యాధులు యువతను పట్టిపీడిస్తున్నాయి. అందుకే పాల వాడకం తగ్గుతూ మద్యం వాడకం ఏడాదికేడాది పెరిగిపోతున్నది. గత ఏడాది లెక్కలు చూస్తే.. మద్యం అమ్మకాలు లీటర్లలో చెప్పుకుంటే 1,29,94,992 లీటర్లు లిక్కరు తాగగా, 80,15,670 లీటర్లు బీర్లు తాగినట్లు ఆబ్కారీశాఖ లెక్కలు చెప్తున్నాయి. కేవలం ఇది అధికారిక లెక్కలు మాత్రమే. ఇదేకాక నాటుసారా కూడా వేల లీటర్లలో విక్రయాలు అనధికారికంగా జరుగుతూనే ఉన్నాయి. అదే పాల వాడకాన్ని పరిశీలిస్తే జనాభా ప్రాతిపదికన జిల్లాలో 10,80,750 మంది ఉండగా, అందులో 2,90,190 కుటుంబాలు జీవనం సాగిస్తున్నాయి. ఈ కుటుంబాల్లో ఒక్కో కుటుంబం రోజుకు లీటర్లు వినియోగిస్తున్నారు. ఏడాదికి 34,82,280 లీటర్లు తాగుతున్నట్లు అంచనా. ఇదేకాక హాస్టల్ విద్యార్థులు నెలకు 36,000 లీటర్లు, అంగన్వాడీ చిన్నారులకు నెలకు 24,000 లీటర్లు, చిన్న నుంచి పెద్ద హోటళ్లలో వినియోగం 1,20.000 లీటర్లు, ఆసుపత్రుల్లో రోగుల కోసం వాడేది 60,000 లీటర్లుగా లెక్కలు చెప్తున్నారు. దీంతో మొత్తంగా జిల్లావ్యాప్తంగా పాల వాడకం 37,22,280 లీటర్లు వాడుతున్నారు. మందుతో పోల్చితే ఆరు రెట్లు అధికంగా వాడుతున్నట్లు తెలుస్తున్నది.
ఎన్ని రోగాలు వచ్చినా, కరోనా లాంటి మహమ్మారి కబలిస్తున్నా జనం తీరు మారడం లేదు. మందు ఆరోగ్యానికి హానికరమని తెలిసినప్పటికీ బతికుండి చేసేదేమీ లేదు… చస్తే చస్తామంటూ మందుపైనే మక్కువ చూపిస్తున్నారు. దీంతో ఏటా మద్యం అమ్మకాలు విపరీతంగా పెరిగిపోతున్నాయి. ఇదే అదనుగా సర్కారు కూడా మద్యం పాలసీ కొత్త విధానాలను తీసుకొచ్చి మరీ డిపాజిట్ రేటును పెంచుతున్నది. అయినా మద్యం వ్యాపారులు మాత్రం తాగేది వాళ్లు మనకు కావాల్సింది లాభం ‘ఎవరు చస్తే మనకేంటి’ అంటూ వ్యాపారులు మద్యం టెండర్ల కోసం వేయికళ్లతో ఎదురుచూస్తున్నారు. ఇప్పటికే మద్యంషాపుల కంటే బెల్టుషాపుల సంఖ్య రోజురోజుకు పెరగడంతో గ్రామాల్లో మద్యంప్రియులు రోడ్లపై చిందులు వేస్తున్నారు. దీంతో రోజూ వాహన ప్రమాదాలతో యువత రోడ్లపై ప్రమాదాలు కొని తెచ్చుకుంటున్నారు. దీనికి తోడు గంజాయి కూడా విచ్చలవిడి కావడంతో యువత చిత్తు అవుతున్నది.