తిరుమలాయపాలెం, జూన్ 19: ఈ ఏడాది పత్తి సాగుచేస్తున్న రైతులకు ఆదిలోనే హంసపాదు ఎదురయ్యేలా కన్పిస్తోంది. ఈ తొలకరిలో ముందుగానే కొద్దిపాటి వర్షాలు కురిశాయి. దీంతో తిరుమలాయపాలెం మండలంలోని పలు గ్రామాల్లో రైతులు పత్తి విత్తనాలు నాటారు. కానీ ఆ తరువాత నుంచి వర్షాలు మొఖం చాటేశాయి. అదే సమయంలో ఎండల వేడి మరికొంత పెరిగింది. ఫలితంగా ఇప్పటికే వేసిన పత్తి మొక్కలు వాడిపోతున్నాయి.
తిరుమలాయపాలెం మండలంలో పత్తి పంట సాధారణ సాగు విస్తీర్ణం 13,000 ఎకరాలు. ఈ ఏడాది ఇప్పటి వరకు 5,000 ఎకరాల్లో రైతులు పత్తి సాగు చేస్తున్నారు. తొలకరి వర్షాల సమయంలోనే విత్తనాలు విత్తారు. కానీ ఆ తరువాత నుంచి వరుణుడు మొఖం చాటేశాడు. దీంతో విత్తనాలన్నీ ఎండిపోతున్నాయి. మండలంలో సుమారుగా 40 శాతం పత్తి విత్తనాలు మొలకెత్తలేదు. మరీ ముఖ్యంగా గడిచిన వారం రోజులుగా కొద్దిపాటి వర్షాలు కూడా కురవకపోవంతో పంట చేలన్నీ నెర్రెలువారుతున్నాయి. వాటిల్లోని పత్తి మొక్కలు వాడిపోతున్నాయి. దీంతో వరుణుడి కరుణ కోసం కర్షకులు కళ్లలో ఒత్తులేసుకుంటున్నారు. ఆశగా ఆకాశం వైపు చూస్తున్నారు. మరో ఒకటి రెండు రోజుల్లో వర్షపు జల్లులు కురవకపోతే పత్తి రైతులకు నష్టపోయే ప్రమాదం లేకపోలేదు.
వర్షాలు కురుస్తాయేమోననుకొని పత్తి విత్తనాలు నాటాం. ఆ రోజు నుంచి వాన జాడలేకుండా పోయింది. దీంతో నాటిన వాటిల్లో సగం విత్తనాలు మొలకెత్తలేదు. కొన్ని చోట్ల మొక్కలు మొలిచినా ఈ ఎండకు అవి మాడిపోతున్నాయి. మరో రెండుమూడు రోజుల్లో వర్షం రాకపోతే కష్టమే. మళ్లీ చేనును చెడగొట్టి మరోసారి అచ్చుతోలి పత్తి విత్తనాలు నాటాల్సి వస్తుంది. దక్కులు, కూళ్లు, విత్తనాలు కలిపి మొత్తం ఎకరానికి రూ.ఐదు వేల వరకూ నష్టపోవాల్సి వస్తుంది.
-యనగందుల సత్యం, రైతు, పిండిప్రోలు