పెగడపల్లి, జూన్ 26: పని ముగించుకొని కాసేపట్లో ఇంటికి చేరాల్సిన ఆ యువకుడు అనుకోని ప్రమాదంలో మృత్యు ఒడికి చేరాడు. పెగడపల్లి మండలం బతికపల్లి వద్ద గుర్తు తెలియని వాహనం, బైక్ ఢీకొన్న ప్రమాదంలో అక్కడికక్కడే ప్రాణాలు కోల్పోయాడు. మరోవ్యక్తి తీవ్ర గాయాలతో దవాఖానలో చేరాడు. పోలీసుల వివరాల ప్రకారం.. పెగడపల్లి మండలం సుద్దపల్లికి చెందిన బలుసు గంగాధర్(28), ముంజ రాజు ఇద్దరు కలిసి బుధవారం ఉదయం బైక్పై పనికోసం పెగడపల్లికి వచ్చారు. పని పూర్తి చేసుకొని సాయంత్రం తిరుగుపయనమయ్యారు. మరో ఐదు నిమిషాల్లో ఇంటికే చేరేవారు.
కానీ, మరో రెండు కిలోమీటర్లు ప్రయాణించాల్సి ఉండగా.. బతికపల్లి శివారు.. సుద్దపల్లి సమీపంలో వీరి బైక్ను ఎదురుగా వస్తున్న గుర్తు తెలియని వాహనం ఢీకొట్టి ఆగకుండా వెళ్లిపోయింది. ఈ ఘటనలో గంగాధర్ తలకు బలమైన దెబ్బలు తగలడంతో అక్కడికక్కడే చనిపోయాడు. తీవ్రంగా గాయపడ్డ రాజును ‘108’లో జగిత్యాల దవాఖానకు, అక్కడి నుంచి మెరుగైన చికిత్స కోసం కరీంనగర్ దవాఖానకు తరలించారు. రాజు పరిస్థితి విషమంగా ఉన్నట్టు వైద్యులు తెలిపారు. ఘటనా స్థలాన్ని పెగడపల్లి ఎస్ఐ జాడి రామకృష్ణ పరిశీలించారు. కుటుంబ సభ్యుల ఫిర్యాదు మేరకు కేసు నమోదు చేసి దర్యాప్తు జరుపుతున్నట్టు తెలిపారు. సీసీ ఫుటేజీలను పరిశీలించి వాహనాన్ని గుర్తిస్తామని చెప్పారు.