వేములవాడ, జనవరి 26: సమ్మక-సారలమ్మ జాతరకు ముందు వేములవాడ రాజన్నను దర్శించుకోవడం ఆనవాయితీ. ఈ క్రమంలో నెల రోజులుగా రాజన్న దర్శనానికి భక్తులు పోటెత్తుతున్నారు. ఈ నెల 21న ప్రొఫెసర్ జయశంకర్ భూపాలపల్లి జిల్లా గనపూర్ మండలం, సీతారాంపురం గ్రామానికి చెందిన పెద్ద శ్రీనివాస్-సరిత దంపతులు కుటుంబసమేతంగా రాజన్న సన్నిధికి వచ్చారు. మొకులు తీర్చుకున్నారు. 22న బద్ది పోచమ్మ ఆలయానికి వెళ్లారు. అక్కడ మొకులు చెల్లించుకునేందుకు సిద్ధమయ్యారు.
అంతలోనే కోడిని తీసుకువస్తానని వెళ్లిన శ్రీనివాస్ (45) తిరిగిరాలేదు. అప్పటి నుంచి అక్కడి పరిసర ప్రాంతాల్లో ఎంత వెదికినా జాడ దొరకలేదు. తర్వాత బంధువులు, తెలిసిన వారి ఇండ్లలోనూ ఆచూకీ కోసం ప్రయత్నించినా ఫలితం లేకపోయింది. దీంతో ఆయన భార్య సరిత శుక్రవారం వేములవాడ పోలీసులకు ఫిర్యాదు చేసింది. అలాగే ఇదే జిల్లాకు చెందిన జంగిడి గ్రామానికి చెందిన దోర్నాల సమ్మయ్య (44) కూడా రాజన్న ఆలయ పారింగ్ స్థలంలో ఈ నెల 22న అదృశ్యమైనట్టు ఆయన కొడుకు పోలీసులకు ఫిర్యాదు చేశాడు. ఈ మేరకు రెండు కేసులు దర్యాప్తు చేస్తున్నట్లు పట్టణ సీఐ కరుణాకర్ తెలిపారు.