కరీంనగర్ విద్యానగర్, జూలై 14: దేశప్రజలను మతప్రాతిపదికగా విభజించి ఓట్లు దండుకొనే రాజకీయాలకు కాలం చెల్లిందని ఆల్ ఇండియా ఇన్సూరెన్స్ ఎంప్లాయీస్ అసోసియేషన్ జోనల్ ప్రధాన కార్యదర్శి టీవీఎన్ఎస్ రవీంద్రనాథ్ అన్నారు. ఇటీవల జరిగిన పార్లమెంట్ ఎన్నికల్లో ప్రజలిచ్చిన తీర్పే ఇందుకు నిదర్శనమని పేర్కొన్నారు. ఎల్ఐసీలోని అతిపెద్ద యూనియన్ ఏఐఐఈఏ కరీంనగర్ డివిజన్ 28వ మహాసభలను ఆదివారం నగరంలోని పద్మనాయక కల్యాణమండపంలో నిర్వహించారు. రవీంద్రనాథ్ ముఖ్య అతిథిగా హాజరై ప్రారంభించి మాట్లాడారు. గత పార్లమెంట్ ఎన్నికల్లో ప్రధాని మోడీ మతాన్ని అడ్డంపెట్టుకొని ఓట్లడిగి దేశప్రతిష్టను దిగజార్చారని మండిపడ్డారు. చైతన్యవంతులైన ప్రజలు 400 సీట్లను ఆశించిన బీజేపీని 240 సీట్లకే పరిమితం చేశారని చెప్పారు. బలమైన ప్రతిపక్షంతో ప్రజాస్వామ్యం, రాజ్యాంగం బలపడుతుందని అభిప్రాయపడ్డారు.
సర్కారు సహకారం లేకున్నా జూన్తో ముగిసిన త్రైమాసికంలో ఎల్ఐసీ అద్భుతమైన ప్రగతిని సాధించి మార్కెట్ లీడర్గా తన సుస్థిరం చేసుకున్నదని చెప్పారు. ఈ సమావేశానికి అతిథులుగా యూనియన్ జోనల్ అధ్యక్షులు పీ సతీశ్, సంయుక్త కార్యదర్శి జీ తిరుపతయ్య, కోశాధికారి శ్రీనివాసన్, సికింద్రాబాద్ డివిజనల్ ప్రధాన కార్యదర్శి రఘు హాజరయ్యారు. ప్రత్యేక అతిథులుగా ఎల్ఐసీ క్లాస్ 1 అధికారుల సంఘం ప్రధాన కార్యదర్శి ఆర్ సత్యనారాయణ, డెవలప్మెంట్ ఆఫీసర్స్ సంఘ నాయకులు వాసుదేవారెడ్డి, ఏజెంట్ యూనియన్ నుంచి గట్టు రాజయ్య, రైతు సంఘం నుంచి వాసుదేవారెడ్డి, సీఐటీయూ నాయకులతో పాటు పూర్వపు కరీంనగర్, ఆదిలాబాద్ జిల్లాల నుంచి 13 ఎల్ఐసీ బ్రాంచ్లకు చెందిన 200 మంది సభ్యులు పాల్గొన్నారు.