కరీంనగర్, జూలై 10 (నమస్తే తెలంగాణ) : జమ్మికుంట, హుజూరాబాద్ కేంద్రంగా జరుగుతున్న భ్రూణహత్యలపై ‘నమస్తే తెలంగాణ’ వరుస కథనాలు సంచలనం సృష్టిస్తున్నాయి. ‘చిదిమేసింది ఎవరు’ ‘భ్రూణహత్యలపై కదిలిన యంత్రాం గం’ శీర్షికన ప్రచురితమైన కథనాలు అనేక విషయాలను బహిర్గతం చేశాయి. ఇటు కథనాలు, అటు యువతి ఫిర్యాదుతో రంగంలోకి దిగిన హుస్నాబాద్ పోలీసులు ఇప్పటికే విచారణకు ప్రత్యేక బృందాన్ని రంగంలోకి దించారు. బాధిత యువతి కుటుంబసభ్యులు ఐదుగురితోపాటు టేకుమట్లకు చెందిన ఆర్ఎంపీని, జమ్మికుంటకు చెందిన సదరు ప్రైవేట్ దవాఖాన పీఆర్వోను అరెస్ట్ చేసి జైలుకు పంపారు. హుజూరాబాద్లోని మాధవి నర్సింగ్హోంలోనే యువతికి అబార్షన్ జరిగినట్టు నిర్ధారించి ఎఫ్ఐఆర్లో నమోదు చేశారు. మరోవైపు లోతుగా విచారణ జరుపుతున్నారు. తాజాగా బుధవారం దవాఖాన నిర్వాహకుడు కర్ర పాపిరెడ్డి, ఆపరేషన్ థియేటర్ అసిస్టెంట్ సత్యనారాయణ, నర్సు రజితను రిమాండ్ చేశారు.