ఉమ్మడి జిల్లాలోని మందుబాబులు గంటకు ఎంత మద్యం తాగుతున్నారో తెలుసా? అక్షరాలా 49 లక్షలు! రోజుకు 11.87 కోట్లు! నెలకు సగటున 356 కోట్లు! నమ్మడానికి ఇది ఆశ్చర్యంగా ఉన్నా ఆబ్కారీ చెబుతున్న గణాంకాలు ఇవి! దీన్ని చూస్తే ఆరోగ్యాన్ని ప్రసాదించే పాలకంటే.. హానికరమైన మద్యం తాగడంపైనే ఇంట్రెస్ట్ చూపుతున్నట్టు స్పష్టమవుతున్నది! ఇప్పుడు ఏ ఊరిలో.. ఏ గల్లీలో అడిగినా మందుకు కొదువ లేకుండా పోగా.. మందుబాబులు తెగతాగేస్తున్నారు. ఏ అర్ధరాత్రి వెళ్లినా.. పొద్దుపొడువక ముందు వెళ్లినా బెల్టుషాపుల్లో మద్యం దొరుకుతుండగా.. వేళాపాలా లేకుండా తాగి ఊగేస్తున్నారు. పరిస్థితిని చూస్తే మంచినీటికి తిప్పలు పడే గ్రామాలు ఉన్నాయి గానీ, మందు దొరకని ఊరు లేదని తెలుస్తున్నది.
కరీంనగర్, జూలై 8 (నమస్తే తెలంగాణ)/రాంనగర్ : మందు ప్రియులకు గ్రామం, పట్టణమైనా ఒక్కటే! ఎప్పుడు తాగాలనిపిస్తే అప్పుడు తాగుడే! వైన్ షాపులకు తోడు బెల్టు షాపులు బార్లా తెరుచుకొని ఉండగా మందు దొరకదనే మాటే ఉండదు. అధికారికంగా నిర్వహించే మద్యం దుకాణాలకు ఓ టైమింగ్ అంటూ ఉంటుంది. కానీ, బెల్టుషాపులకు టైమంటూ ఉండదు. ఏ అర్ధరాత్రి వెళ్లినా, అపరాత్రి వెళ్లినా.. పొద్దు పొడవకముందు వెళ్లినా కావల్సిన మందు దొరుకుతుంది.
బైక్ తీయాల్సిన పనిలేకుండా నాలుగడుగులు వేస్తే సరిపోతుంది. ఈ కారణంగానే మద్యంప్రియులు తెల్లవారి కాలకృత్యాలు తీర్చుకోకముందే బెల్టుషాపుల్లో ప్రత్యక్షమవుతున్నారు. రాత్రి తాగింది దిగకముందే ఇంకో పెగ్గేసుకుంటున్నారు. అలా తాగితే మజా వేరే ఉంటుందని చెబుతున్నారు. ఈ కారణంగానే మద్యం అమ్మకాలు విపరీతంగా పెరిగినట్లు స్పష్టంగా తెలుస్తున్నది. సాధారణంగా పాలవ్యాపారులు తెల్లవారక ముందే తెచ్చి ఇండ్లలో పోసి వెళ్తుంటారు. కానీ, వీటికంటే ముందే మద్యం ప్రియులు బెల్టు షాపులకు వెళ్లి ఓ పెగ్గేసుకుని ఇంటికి చేరుతున్నారంటే అతిశయోక్తికాదు. జిల్లాలో ఇప్పుడు మంచి నీటి సమస్య ఉన్న గ్రామాలు ఉంటే ఉండవచ్చుకానీ, మందు దొరకని ఊరు, వాడా అనేది లేకుండా పోయింది.
కరీంనగర్ ఉమ్మడి జిల్లాలో గంటకు 49 లక్షల మద్యం తాగేస్తున్నారు. అదే రోజుకు 11.87 కోట్ల చొప్పున, నెలకు 356 కోట్ల విలువైన మద్యం గుటుక్కుమనిపిస్తున్నారు. ఏప్రిల్ నుంచి ఇప్పటి వరకు ఏకంగా 1,068 కోట్ల మందు లేపేశారంటే పరిస్థితిని అర్ధం చేసుకోవచ్చు. అయితే గతానికి ఇప్పటికి చాలా తేడా కనిపిస్తున్నది. బీరు ప్రియులకైతే ప్రభుత్వం కొత్త కొత్త రుచులు చూపిస్తున్నది. పోయిన ఎండకాలంలో బీర్లు సరిపోకపోతే విదేశాల నుంచి కొత్త కొత్త బ్రాండ్లు తెచ్చి పరిచయం చేశారు. వేసవిలో లిక్కర్ కంటే బీర్లే ఎక్కువగా అమ్మినట్టు ఈ మూడు నాలుగు నెలల మద్యం గణాంకాలు చెబుతున్నాయి. తాగినోడికి తాగినంత సప్లయ్ చేస్తున్న నేపథ్యంలో మద్యానికి ఎక్కడా కొరత కనిపించడం లేదు. ఉమ్మడి జిల్లాలో అక్కడక్కడా మంచి నీళ్లకు కొరత ఉందేమోగానీ, మందుకు మాత్రం కొదువ లేదు. కాసులు కురిపించే వ్యాపారాన్ని రాష్ట్ర ప్రభుత్వం కంటికి రెప్పలా చూసుకుంటున్నది.
కరీంనగర్ ఉమ్మడి జిల్లాలో చూస్తే నెలకు 356 కోట్లకు మీదనే మద్యం తాగేస్తున్నారు. కరీంనగర్ జిల్లాలో ఏప్రిల్ నుంచి జూన్ నెలాఖరు వరకు చూసుకుంటే 22,85,091 లీటర్ల లిక్కర్, 42,66,584 లీటర్ల బీర్లు లేపేశారు. దీని విలువ 290.18 కోట్లు! ఇక జగిత్యాల జిల్లాలో గత మార్చి నుంచి జూన్ వరకు 19,82,025 లీటర్ల లిక్కర్, 44,82,995 లీటర్ల బీర్లు తాగేశారు. దీని విలువ 265 కోట్లకు మీదనే. పెద్దపల్లి జిల్లాలో 16,52,775 లీటర్ల లిక్కర్, 41,17,860 లీటర్ల బీర్లు తాగేశారు. దీని విలువ 241.34 కోట్లు! ఇక సిరిసిల్ల జిల్లాలో చూస్తే 21,53,357 లీటర్ల లిక్కర్, 40,76,888 లీటర్ల బీర్లు గుటుక్కుమనిపించారు. దీని విలువ 273 కోట్లు ఉందంటే పరిస్థితిని అర్ధం చేసుకోవచ్చు. ఒక మనిషికి కావాల్సిన మంచి నీళ్ల అవసరానికంటే మద్యం ప్రియులు తాగిన లిక్కర్, బీర్లే ఎక్కువ లీటర్లు ఉన్నట్టు కనిపిస్తున్నది.