కలెక్టరేట్, అక్టోబర్ 20: ఎన్నికల పోలింగ్ ప్రక్రియను సజావుగా నిర్వహించేందుకు జిల్లా ఎన్నికల యంత్రాంగం అన్ని ఏర్పాట్లు చేస్తోంది. పోలింగ్ కేంద్రాల మొదటి దశ ర్యాండమైజేషన్ను శుక్రవారం వివిధ రాజకీయ పార్టీల ప్రతినిధుల సమక్షంలో ఆన్లైన్ ద్వారా నిర్వహించారు. కలెక్టరేట్ సమావేశ మందిరంలో జిల్లా ఎన్నికల అధికారి డాక్టర్ బి.గోపి ఆధ్వర్యంలో ర్యాండమైజేషన్ చేశారు. ఈ సందర్భంగా జిల్లాలోని 1,338 పోలింగ్ కేంద్రాల్లో అవసరమైన 2,674 బ్యాలెట్ యూనిట్లు, 2,089 కంట్రోల్ యూనిట్లు, 2,054 వీవీ ప్యాట్లను సిద్ధం చేశారు. కరీంనగర్ అసెంబ్లీ సెగ్మెంట్లో 390, మానకొండూర్లో 316, హుజూరాబాద్లో 305, చొప్పదండిలో 327 పోలింగ్ కేంద్రాలున్నాయి.
ఈ కేంద్రాల్లోని అన్ని బూత్లకు ఎలక్ట్రానిక్ ఓటింగ్ మిషన్లు, కంట్రోల్ యూనిట్లు, వీవీ ప్యాట్లు అందించేందుకు ఏర్పాట్లు చేస్తున్నారు. శనివారం ఉదయం అన్ని రాజకీయ పార్టీల సమక్షంలో కలెక్టరేట్ సమీపంలోని ఈవీఎంల గోదాంలను తెరిచి, అక్కడి నుంచే అందజేయనున్నారు. వీటిని ఆయా అసెంబ్లీ సెగ్మెంట్ల కోసం ఏర్పాటు చేసిన పంపిణీ కేంద్రాలకు తరలించనున్నారు. హుజూరాబాద్ సెగ్మెంట్లోని జూనియర్ కళాశాలలో, కరీంనగర్, చొప్పదండి సెగ్మెంట్లకు సంబంధించి నగరంలోని ఎస్సారార్ కళాశాలలో, మానకొండూర్ సెగ్మెంట్ కోసం నగర శివారులోని ఉజ్వల పార్కు సమీపం లో గల మహిళా పాలిటెక్నిక్ కళాశాలలో ఏర్పాటు చేసిన స్ట్రాంగ్ రూముల్లో భద్రపరుచనున్నారు.
ఎన్నికల సంఘం ఆదేశాల మేరకు నిరంతర నిఘాలో భాగంగా పటిష్టమైన భద్రత ఏర్పా ట్లు చేశారు. రెండో ర్యాండమైజేషన్ కార్యక్రమాన్ని పరిశీలకుల సమక్షంలో నిర్వహించనున్నారు. ఈ సందర్భంగా జిల్లా ఎన్నికల అధికారి డాక్టర్ బి.గోపి మాట్లాడారు. రాజకీయ పార్టీల ఎన్నికల ఖర్చు, రిజిష్టర్ల నిర్వహణ సక్రమంగా జరిగేలా చూసుకోవాలని అధికారులకు సూచించారు. ఈ కార్యక్రమంలో సీపీ సుబ్బారాయుడు, స్థానిక సంస్థల అదనపు కలెక్టర్లు ప్రపుల్ దేశాయ్, లక్ష్మీకిరణ్, ఇన్చార్జి డీఆర్వో పవన్కుమార్, రాజకీయ పార్టీల ప్రతినిధులు గాలి అనిల్కుమార్, నాంపల్లి శ్రీనివాస్, వాసుదేవరెడ్డి, మోహన్, బర్కత్ అలీ, శ్రీనివాస్, ఆగయ్య, తదితరులు పాల్గొన్నారు.