రాంనగర్, జూలై 23: నగరంలోని కట్టరాంపూర్ ప్రాంతంలో ఈ నెల 15న తెల్లవారుజామున నాలుగు గంటలకు ద్విచక్ర వాహనదారుడిని వెంబడించి దోపిడీకి పాల్పడిన ఇద్దరు నిందితులను వన్టౌన్ పోలీసులు అదుపులోకి తీసుకున్నారు. పట్టుబడిన నిందితులు ఇద్దరూ విద్యార్థులేనని ఏసీపీ నరేందర్ మీడియాకు వెల్లడించారు. ఈ నెల 15న కట్టరాంపూర్ ప్రాంతంలో బోనాల పండుగకు వెళ్లి ద్విచక్రవాహనంపై వస్తున్న పిట్టల సుమంత్ తిరుమల నగర్ చేరుకునేసరికి యాక్టివా ద్విచక్ర వాహనంపై వచ్చిన ఇద్దరు దుండగులు అతడి మెడలోని రెండున్నర తులాల బంగారు గొలుసు లాకొని పరారయ్యారు.
ఈ ఘటనలో బాధితుడు సుమంత్ వన్ టౌన్ పోలీసులకు ఫిర్యాదు చేయగా కేసు నమోదు చేయడంతోపాటు నాలుగు ప్రత్యేక బృందాలుగా ఏర్పడి పరిసర ప్రాంతాల్లో గల సీసీ కెమెరా ఫుటేజ్లను పరిశీలించి నిందితులను గుర్తించారు.
ఈ క్రమంలో మంగళవారం మధ్యాహ్నం 3 గంటల ప్రాంతంలో ఉజ్వల పార్ సమీపంలో చేపట్టిన వాహన తనిఖీల్లో ఇద్దరు వ్యక్తులు అనుమానాస్పదంగా కనిపించగా, అదుపులోకి తీసుకొని తనిఖీ చేయగా బంగారు గొలుసు లభ్యమైంది. దానిని దోపిడీకి పాల్పడిన సొత్తుగా అంగీకరించారు. సదరు వ్యక్తులను హైదరాబాద్ హకీంపేట చెందిన బీటెక్ విద్యార్థి మహ్మద్ ఫైజాన్, మానకొండూర్కు చెందిన షేక్ సాహిద్గా గుర్తించారు.
నిందితులను అదుపులోకి తీసుకొని వారి నుంచి ద్విచక్ర వాహనం, రెండున్నర తులాల బంగారు గొలుసును స్వాధీనం చేసుకొని కోర్టులో హాజరు పరచనున్నట్లు ఏసీసీ తెలిపారు. నిందితులను పట్టుకోవడంలో శ్రమించిన వన్ టౌన్ సిబ్బంది బషీర్, కుమారస్వామికి ఏసీపీ నగదు రివార్డు అందజేసి అభినందించారు.