వీర్నపల్లి (ఎల్లారెడ్డిపేట), జూలై 24: ఉన్నత చదువులు చదవాలని కలగన్న గిరిపుత్రికకు ‘గిఫ్ట్ ఏ స్మైల్’ వెన్నుతట్టింది. రెండేళ్ల క్రితం సిరిసిల్ల ఎమ్మెల్యే, బీఆర్ఎస్ వర్కింగ్ ప్రెసిడెంట్ కేటీఆర్ పుట్టిన రోజు సందర్భంగా ఇచ్చిన 80వేల ఖరీదు చేసే బైజూస్ కంటెంట్ ట్యాబ్ ఐఐటీ సీటు సాధించేందుకు తోడ్పడింది. వీర్నపల్లి మండలం గోన్యా నాయక్ తండాకు చెందిన బడావత్ రాములు-సరోజ దంపతుల మూడో కూతురైన మధులత సారంపల్లి టీటీడబ్ల్యూ హాస్టల్లో ఉంటూ ఇంటర్మీడియట్ చదివింది.
మొదటి సంవత్సరం చదువుతున్నప్పుడు ఇచ్చిన ఆ ట్యాబ్ను ఆ పేదింటి విద్యార్థిని పూర్తిగా సద్వినియోగం చేసుకున్నది. ఇటీవల జేఈఈ మెయిన్స్లో సత్తా చాటింది. 824 ర్యాంకు సాధించి, బీహార్లోని పాట్నా ఐఐటీలో సీటు పొందింది. ఈ నెల 27న అడ్మిషన్ పొందాల్సి ఉండగా, ఆర్థిక ఇబ్బందులతో వెళ్లలేని పరిస్థితి నెలకొన్నది. గ్రామానికి చెందిన యువకులకు విషయం తెలియడంతో మధులత ఆర్థిక పరిస్థితి గురించి సోషల్ మీడియాలో ఇటీవల పోస్టులు పెట్టగా, సిరిసిల్ల అడిషనల్ కలెక్టర్ ఖీమ్యా నాయక్ స్పందించారు.
ఆయన ఆదేశాలతో రెండ్రోజుల కింద జిల్లా ఎస్టీ వెల్ఫేర్ అధికారి జనార్దన్, అధికారులు కలిసి మధులత ఇంటికి వెళ్లి ఆమెతో మాట్లాడారు. కుటుంబ స్థితిగతుల వివరాలు నమోదు చేసుకున్నారు. ఉన్నతాధికారులకు నివేదించారు. సమాచారం తెలుసుకున్న సీఎం రేవంత్రెడ్డి ఎక్స్ వేదికగా గిరిజన సంక్షేమ శాఖ ద్వారా చదువుకు అయ్యే ఖర్చులు అందిస్తామని తెలిపారు. ఈ క్రమంలో మధులతను బుధవారం హైదరాబాద్ పిలిపించుకొని ఎస్టీ కమిషన్ చైర్మన్ బెల్లయ్యనాయక్, గిరిజన సంక్షేమ శాఖ ప్రిన్సిపల్ సెక్రటరీ శరత్, గిరిజన సంక్షేమ శాఖ కమిషనర్ సర్వేశ్వర్ చేతుల మీదుగా 1.54లక్షల చెక్కును అందించారు. ప్రస్తుతం 30వేలు వ్యక్తిగత బ్యాంకు ఖాతాలో జమ చేస్తామని, చదువు పూర్తయ్యే దాకా పూర్తి ఖర్చు గిరిజన సంక్షేమ శాఖ నుంచి మంజూరు చేస్తామని హామీ ఇచ్చినట్టు కుటుంబ సభ్యులు తెలిపారు.