ఒకనాడు సిరిశాలగా ఉన్న సిరిసిల్ల.. సమైక్య రాష్ట్రంలో ఉరిసిల్లగా మారి తిరిగి స్వరాష్ట్రంలో పునర్జీవం పోసుకున్నది. మళ్లీ కాంగ్రెస్ పాలనలో సంక్షోభంలోకి వెళ్లింది. ఇటు రాష్ట్రం, అటు కేంద్రం వివక్షతో కార్మికక్షేత్రంలో మళ్లీ మరణమృదంగం మోగుతున్నది. ఇప్పటికే ఎనిమిది మంది చనిపోగా.. రాష్ట్రవ్యాప్తంగా దాదాపు పన్నెండు మంది నేతన్నలు ఆకలిచావులు, ఆత్మహత్యలు జరగడం కలకలం రేపుతున్నది.
అయితే ప్రభుత్వం నుంచి వర్క్ ఆర్డర్స్ రాకపోవడం, ఇదే సమయంలో సబ్సిడీల ఊసే లేకపోవడంతో వస్త్ర సంక్షోభం రోజురోజుకూ ముదురుతున్నది. దాదాపు 2వేల మరమగ్గాలను నేతన్నలు తుక్కు కింద విక్రయిస్తున్న దుస్థితి కనిపిస్తున్నది. ఇది ఇలాగే కొనసాగితే మరింత విపత్కర పరిస్థితిని ఎదుర్కొనే ప్రమాదముండగా, దీనిపై తాడోపేడో తేల్చుకునే దిశగా జేఏసీ కదులుతున్నది.
‘సిరిసిల్ల వస్త్ర పరిశ్రమను రక్షించాలి.. నేతన్నలకు ఉపాధి కల్పించాలి’ అనే డిమాండ్తో మూడు రోజులుగా సిరిసిల్లలో రిలే నిరాహార దీక్షలు చేస్తున్న నేతన్నలు.. ప్రభుత్వం తమ డిమాండ్లను నేరవేర్చాలని నేడు సిరిసిల్ల బంద్కు పిలుపు నిచ్చారు. అప్పటికీ దిగిరాకపోతే ఈనెల 27న అసెంబ్లీని ముట్టడిస్తామని హెచ్చరించారు.
కరీంనగర్, జూలై 24 (నమస్తే తెలంగాణ ప్రతినిధి) : తెలంగాణ తొలి ముఖ్యమంత్రి కేసీఆర్ హయాంలో అమలు చేసిన పథకాలను యధావిధిగా కొనసాగించడంతోపాటు వస్త్ర పరిశ్రమను నిలబెట్టేందుకు నేతన్నలు ఇప్పటికే పలు డిమాండ్లను ప్రభుత్వం ముందు పెట్టారు. అయితే కేంద్ర, రాష్ట్ర ప్రభుత్వాల నుంచి స్పందన లేకపోవడంతో తాడో పేడో తేల్చుకునేందుకు సిద్ధమయ్యారు. సిరిసిల్ల పవర్లూం వస్త్ర పరిశ్రమ అనుబంధ సంస్థల ఐక్యవేదిక (జేఏసీ) ఆధ్వర్యంలో మూడు రోజులుగా సిరిసిల్ల పట్టణంలోని అంబేద్కర్ చౌరస్తాలో రిలే నిరాహార దీక్షలు చేస్తున్నారు.
ఈ పోరాటానికి బీఆర్ఎస్, బీజేపీ, సీపీఐ, సీఐటీయూ వంటి సంఘాల నాయకులు మద్దతు తెలుపుతున్నారు. జేఏసీ ప్రధానంగా ప్రభుత్వం ముందు పలు డిమాండ్లు పెట్టింది. పవర్లూం పరిశ్రమలో 10 హెచ్పీల వరకు ఉచిత విద్యుత్ అందించాలని, ఆపైన నాలుగో కేటగిరి కింద పరిగణించి 50 శాతం సబ్సిడీ ఇవ్వాలని, బతుకమ్మ చీరెలు, లేదా జనతా వస్ర్తాల పథకాన్ని అమల్లోకి తేవాలని, స్కూల్ డ్రెస్ల వంటి ఆర్డర్స్ను వెంటనే ఇవ్వాలని, సిరిసిల్లలో యార్న్ డిపో ఏర్పాటు చేయాలని, వర్కర్ టూ ఓనర్ పథకాన్ని పూర్తి చేయాలని, 10 శాతం యార్న్ సబ్సిడీ అందించడంతోపాటు త్రిఫ్ట్ ఫండ్, నేతన్న బీమా అమలు చేసి కార్మికులకు పీఎఫ్.
ఈఎస్ఐ సౌకర్యం కల్పించాలనే డిమాండ్లు పెట్టింది. వీటితోపాటు వస్త్ర పరిశ్రమ పరిశ్రమను శాశ్వతంగా సంక్షోభం నుంచి బయట పడేసేందుకు చర్యలు తీసుకోవాలని కోరింది. ఈ డిమాండ్లను ఇప్పటికే రాష్ట్ర ప్రభుత్వం ముందు పెట్టిన స్పందన లేకపోవడంతో రిలే నిరాహార దీక్షలకు పూనుకున్నది. మూడు రోజులుగా దీక్షలు చేస్తున్నా స్పందన రాకపోవడంతో గురువారం సిరిసిల్ల బంద్కు పిలుపు నిచ్చింది. అయినా ప్రభుత్వం దిగి రాకపోతే.. ఈ నెల 27 అసెంబ్లీ ముట్టడి చేస్తామని హెచ్చరించింది.
స్వరాష్ట్రంలో దూరమైన కష్టాలు
సమైక్య రాష్ట్రంలో సిరిసిల్ల ఊరిశాలగా మారిన విషయం తెలిసిందే. వైఎస్సార్ సీఎంగా ఉన్నప్పుడు వందలాది మంది కార్మికులు నూలు పోగునే ఊరితాడుగా మార్చుకున్నారు. ఆత్మహత్యలు చేసుకోవడంతో ఆకలిచావులతో ప్రాణాలు కోల్పోయారు. తెలంగాణ రాష్ట్రం వచ్చిన తర్వాత కేసీఆర్ ప్రభుత్వం నేతన్నలను కష్టాలను నుంచి గట్టెక్కించడానికి ఒక్కో పథకాన్ని తెచ్చింది. దశలవారీగా అమలు చేసి.. వారి జీవన ప్రమాణాలు పెంచింది.
అందుకు విప్లవాత్మక నిర్ణయాలను తీసుకున్నది. బతుకమ్మ చీరెలు, ఆర్వీఎం స్కూల్ యూనిఫామ్స్, క్రిస్మస్, రంజాన్ వస్ర్తాలు, యార్న్ సబ్సిడీ, త్రిఫ్ట్, నేతన్నకు బీమా, నేతన్నకు పింఛన్, మరమగ్గాల ఆధునీకరణ, వర్కర్ టూ ఓనర్ పథకం అమలు కోసం 350 కోట్లతో వర్క్ షెడ్ల నిర్మాణం, నేతన్నకు రుణమాఫీ, పావలా వడ్డీరుణాలు, మరమగ్గాలకు జియోట్యాగింగ్, సిరిసిల్లలో అప్పారెల్ పార్కు, నేతన్నల నైపుణ్యం పెంపు కోసం వివిధ రకాల మేళాల నిర్వహణ, విద్యుత్ వినియోగంలో సబ్సిడీ ఇలా ఎన్నో అమలు చేసింది. నిరంతరం చేతినిండా పని కల్పించేందుకు చేసిన కృషితో నేతన్నలు ఒక్కో మెట్టు ఎక్కుతూ.. ఆర్థిక స్వావలంబన చేకూర్చుకున్నారు. ఆర్థికంగా నేతన్నల కుటుంబాలు నిలదొక్కుకున్నాయి. జీవితాల్లో కొత్త వెలుగులు నిండాయి.
రాష్ట్రం, కేంద్రం వివక్షే?
స్వరాష్ట్రంలో నేతన్నల ఆత్మహత్యలు ఆపేందుకు మానవీయ కోణంలో ప్రవేశపెట్టిన బతుకమ్మ చీరలు ఆర్డర్లు ఏడేళ్ల పాటు ఇచ్చారు. అందుకు ఏటా దాదాపు 350 కోట్ల బడ్జెట్ కేటాయించారు. బతుకమ్మ, రంజాన్, క్రిస్మస్ సందర్భంగా కేసీఆర్ ప్రభుత్వం కోటి చీరలను పంపిణీ చేసింది. మహిళలకు మేలు చేకూర్చడంతోపాటు నేతన్నలకు భరోసానివ్వడంలో భాగంగా ఈ నిర్ణయాన్ని అమలు చేసింది.
మరోవైపు నేతన్నలను ఆదుకోవడమే కాకుండా శాశ్వత పరిష్కారం కోసం సిరిసిల్లకు మెగా పవర్లూం క్లస్టర్ ఏర్పాటు చేయాలని కేటీఆర్ మంత్రిగా ఉన్నప్పుడు పలుసార్లు కేంద్ర మంత్రులను కలిసి విన్న వించారు. తాజాగా బండి సంజయ్ కేంద్ర హోంశాఖ సహాయ మంత్రిగా బాధ్యతలు చేపట్టిన నేపథ్యంలోనూ సిరిసిల్లకు క్లస్టర్ వచ్చేలా చూడాలని లేఖ రాశారు. దీనిపై అడ్డగోలుగా మాట్లాడడమే తప్ప కేంద్రం నుంచి ఎటువంటి స్పందన రాలేదు. తాజా కేంద్ర బడ్జెట్లోనూ ఇదే నిర్లక్ష్యం కనిపించింది. వస్త్ర పరిశ్రమ సంక్షోభాన్ని గట్టెక్కించడానికి ఎటువంటి చర్యలు తీసుకోలేదు.
దీనిపై బండి సంజయ్ ఇప్పటివరకు స్పందించలేదు. అలాగే కాంగ్రెస్ పాలనలో నేతన్నలు ఆత్మహత్యలు చేసుకుంటున్న సమయంలో సిరిసిల్లకు వెళ్లిన మంత్రులు పొన్నం ప్రభాకర్, కాంగ్రెస్ నాయకులు, అక్కడ ఏర్పాటు చేసిన విలేకరుల సమావేశంలో మాట్లాడారు. ఎన్నికలు ముగియగానే బకాయిల చెల్లింపులతోపాటు వర్క్ఆర్డర్లు ఇస్తామని, నేతన్నలను గత ప్రభుత్వాలకన్నా బాగా ఆదుకుంటామంటూ చెప్పారు.
కానీ, నేటివరకు వారు చెప్పిన మాటల్లో ఒక్కటీ అమలు కాలేదు. నేతన్నలపై ఇటు రాష్ట్ర ప్రభుత్వం.. అటు కేంద్రం ప్రభుత్వం రెండు నిర్లక్ష్యం చూపుతుండడంతో నేతన్నలు తమ భవిష్యత్పై ఆందోళన చెందుతున్నారు. తాడో పేడో తేల్చుకుంటే తప్పా ఈ సమస్యకు పరిష్కారం దొరకదని ఆందోళనకు దిగారు.
అసెంబ్లీని ముట్టడిస్తాం
రాష్ట్ర ప్రభుత్వ ఏకపక్ష నిర్ణయాలతోనే వస్త్ర పరిశ్రమలో సంక్షోభం నెలకొంది. తక్షణమే 15 కోట్ల మీటర్ల వస్త్ర ఆర్డర్లు ఇచ్చి నేతన్నలకు ఊపాధి కల్పించాలి. 10 హెచ్పీల వరకు మరమగ్గాలకు ఉచిత విద్యుత్ అందించాలి. నాలుగో కేటగిరిలో చేర్చి సబ్సిడీ కొనసాగించాలి. వస్త్ర పరిశ్రమకు రావాల్సిన 180 కోట్లను వెంటనే విడుదల చేయాలి. 2023 వరకు పెడింగ్లో ఉన్న యార్న్ సబ్సిడీ విడుదల చేయాలి. వర్క్టూ ఓనర్ పథకాన్ని పూర్తి చేసి కార్మికులకు అందించాలి.
సంక్షోభాన్ని వెంటనే పరిష్కరించి నేతన్నల ఆత్మహత్యలను నివారించాలి. ప్రభుత్వం దిగి రాకపోతే.. ఈ నెల 27 వేలాది మంది కార్మికులతో అసెంబ్లీని ముట్టడిస్తాం. దీంతోపాటు గురువారం సిరిసిల్ల బంద్కు వ్యాపార, వాణిజ్య వర్గాల ప్రజలు సహకరించాలి. ప్రభుత్వం తమ డిమాండ్లను ఆషామాషీగా తీసుకోవద్దని వేడుకుంటున్నం. ఈ విషయంలో ఏమాత్రం నిర్లక్ష్యం జరిగినా మళ్లీ ఊరిశాలగా సిరిసిల్ల మారుతుంది.
– మూషం రమేశ్, తెలంగాణ పవర్లూమ్స్ వర్కర్స్ అసోసియేషన్ రాష్ట్ర అధ్యక్షుడు