మంథని, డిసెంబర్ 1: మంత్రపురి గడ్డపై గులాబీ జెండా ఎగరడం ఖాయమని మంథని నియోజకవర్గ బీఆర్ఎస్ ఎమ్మెల్యే అభ్యర్థి పుట్ట మధూకర్ ధీమా వ్యక్తం చేశారు. ప్రభుత్వం చేపట్టిన అభివృద్ధి, సంక్షేమ పథకాలను చూసి ఓటర్లు గులాబీ పార్టీకి జైకొట్టారని తెలిపారు. మంథని రాజగృహలో బల్దియా చైర్పర్సన్, తన సతీమణి పుట్ట శైలజతో కలిసి వివిధ ప్రాంతాల నుంచి తరలివచ్చిన పార్టీ కార్యకర్తలతో ముచ్చటించారు. 288 పోలింగ్ కేంద్రాల్లో జరిగిన పోలింగ్ సరళిపై ఆరా తీశారు.
ఈ సందర్భంగా ఆయన మాట్లాడుతూ.. అన్ని గ్రామాల్లోని ఓటర్లు బీఆర్ఎస్కు మద్దతుగా నిలిచారని పేర్కొన్నారు. గెలిచిన తర్వాత పార్టీ, తాను ఇచ్చిన హామీలన్నీ నెరవేరుస్తానన్నారు. ఓటర్లు కాంగ్రెస్ అభ్యర్థి ప్రలోభాలకు లొంగకుండా ఓటేయడం అభినందనీయమన్నారు. బీఆర్ఎస్ సర్కారు సంక్షేమ, అభివృద్ధి పథకాలతో పాటు తాను ఎమ్మెల్యేగా, జడ్పీ చైర్మన్ చేసిన అభివృద్ధి, పుట్ట లింగమ్మ చారిటబుల్ ట్రస్టు ద్వారా అందించిన సేవలు ఈ ఎన్నికల్లో ఎంతగానో కలిసి వచ్చాయని సూత్రీకరించారు.