కమాన్చౌరస్తా, జూలై 15: భవిష్యత్ తరాల మేలు కోసం సామాజిక బాధ్యతగా ప్రతి ఒకరూ మొకలు నాటాలని, వనమహోత్సవంలో భాగస్వాములు కావాలని రాష్ట్ర రవాణా, బీసీ సంక్షేమ శాఖల మంత్రి పొన్నం ప్రభాకర్ పిలుపునిచ్చారు. సోమవారం ఆయన కరీంనగర్ జిల్లాకేంద్రంలోని శాతవాహన యూనివర్సిటీ ఆవరణలో మొక్కలు నాటారు. అనంతరం ఆయన మాట్లాడుతూ పర్యావరణ పరిరక్షణలో ప్రతి ఒక్కరూ భాగస్వాములు కావాలని కోరారు.
రాష్ట్ర ప్రభుత్వం వన మహోత్సవాన్ని యుద్ధ ప్రాతిపదికన చేపడుతున్నదని చెప్పారు. ఇంటింటికీ ఆరు మొక్కలు పంపిణీ చేయాలని, గ్రామాలు, పట్టణాల్లోని ఖాళీ స్థలాల్లో మొక్కలు నాటించి సంరక్షణపై దృష్టి సారించాలని అధికారులకు సూచించారు. ఇక్కడ అదనపు కలెక్టర్ ప్రఫుల్ దేశాయ్, ఎస్యూ రిజిస్ట్రార్ వరప్రసాద్, ఆర్డీవో కే మహేశ్వర్, డీఆర్డీవో శ్రీధర్, డీఎఫ్వో బాలమణి, తహసీల్దార్ రాజేశ్, ఎంపీడీవో ప్రభు, కార్పొరేటర్లు ఉన్నారు.