కార్పొరేషన్, జూన్ 23 : కరీంనగర్ నగరపాలక సంస్థలో అభివృద్ది పనులను వేగంగా పూర్తి చేసేందుకు అన్ని చర్యలు తీసుకుంటామని రాష్ట్ర బీసీ సంక్షేమ, రవాణా శాఖ మంత్రి పొన్నం ప్రభాకర్ అన్నారు. ఆదివారం డీసీసీ కార్యాలయంలో నగర కాంగ్రెస్ కార్పొరేటర్లు, మాజీ కార్పొరేటర్లతో ప్రత్యేకంగా సమావేశం అయ్యారు. నగరంలో సాగుతున్న అభివృద్ధి పనులు తదితర వాటిపై సమీక్షించారు. ఈ సందర్భంగా మంత్రి మాట్లాడుతూ, నగరపాలక సంస్థలో ఎలాంటి అవినీతి జరిగినా తమ దృష్టికి తీసుకురావాలని వెంటనే చర్యలు తీసుకుంటామన్నారు.
నగరపాలక సంస్థలో చేపట్టిన అభివృద్ధి పనులకు సంబంధించి ఫస్ట్ కమ్ ఫస్ట్ అనే పద్ధతిలోనే బిల్లులు చెల్లించడం జరుగుతుందన్నారు. నగరంలో సమస్యల పరిష్కారానికి అవసరమైన ప్రతిపాదనలు తీసుకువస్తే వాటికి సంబంధించి పనులు చేపట్టేందుకు చర్యలు తీసుకుంటామని పేర్కొన్నారు. సమావేశంలో కార్పొరేటర్లు నేతికుంట యాదయ్య, బుచ్చిరెడ్డి, భూమాగౌడ్, గంట కల్యాణి శ్రీనివాస్, సరిళ్ల ప్రసాద్, మాజీ కార్పొరేటర్లు మాచర్ల ప్రసాద్, రాజేందర్, మెండి చంద్రశేఖర్ తదితరులు పాల్గొన్నారు.