పార్టీ వర్కింగ్ ప్రెసిడెంట్ కేటీఆర్ పిలుపుతో సింగరేణి పరిరక్షణకు మరో ఉద్యమంవేలం ఆపకపోతే మహోద్యమమే తెలంగాణకు సింగరేణి ఒక ఆర్థిక, సామాజిక జీవనాడిలాంటిది. కానీ, కేంద్రం ప్రైవేటీకరణకు కుట్రలు చేస్తున్నది. సత్తుపల్లి బ్లాక్ 3, శ్రావణ్పల్లి, పెనగడప గనుల వేలం కోసం మరోసారి నోటిఫికేషన్ ఇచ్చింది. మార్చి 29 నుంచి మే 30 వరకు వేలం వేయాలన్న నిర్ణయాన్ని ఉపసంహరించుకోవాలి. వేలంతో సంబంధం లేకుండా సింగరేణికి నేరుగా గనులు కేటాయించాలి. కేంద్రం వెనకి తగ్గకుంటే జంగ్ సైరన్ మోగిస్తం. మరో ప్రజా ఉద్యమం నిర్మిస్తం. సింగరేణిని ప్రైవేటీకరిస్తే రాష్ట్రం చీకటిమయం అవుతుంది. కార్మికులు శ్రమ దోపిడీకి గురవుతరు. వారసత్వ ఉద్యోగాలు, ఉద్యోగ భద్రత, నియామకాల్లో రిజర్వేషన్లు, బోనస్లు, అలవెన్సులు ఇతర సంక్షేమ కార్యక్రమాలు రద్దవుతయ్. ఇప్పటికే ఉద్యోగులు, కార్మికులు పెద్ద ఎత్తున ఆందోళన చేస్తున్నరు. వారికి బీఆర్ఎస్ పార్టీ ప్రతిసారి అండగా ఉంటున్నది. గతంలో ప్రత్యేక రాష్ట్ర ఉద్యమం సింగరేణి నుంచే ఉవ్వెత్తున ఎగిసి గమ్యాన్ని ముద్దాడింది. ఈ సారి పురుడుపోసుకునే మహోద్యమంతో కేంద్ర ప్రభుత్వం కుప్పకూలక తప్పదు. – మంత్రి కేటీఆర్
గుజరాత్కో నీతి.. తెలంగాణకో నీతా?
సింగరేణి ప్రైవేటీకరణ విషయంలో కేంద్రం దాగుడుమూతలు ఆడుతున్నది. పైకి ఒకమాట చెప్తూ, లోపల కుట్రకు తెరలేపుతున్నది. ఇదే కేంద్ర ప్రభుత్వం గుజరాత్ మినరల్ డెవలప్మెంట్ కార్పొరేషన్కు నామినేషన్ పద్ధతిన భారీగా లిగ్నైట్ గనులు కేటాయించింది. గుజరాత్ మాదిరిగానే తెలంగాణలోని సింగరేణికి బొగ్గు గనులను కేటాయించాలని ఎన్నోసార్లు తమ ప్రభుత్వం కోరినప్పటికీ మోదీ సర్కారు పెడచెవిన పెట్టింది. తన సొంత రాష్ట్రం గుజరాత్పై అపార ప్రేమను కనబరుస్తున్న దేశ ప్రధాని, ప్రగతిశీల తెలంగాణ రాష్ట్రంపై మాత్రం వివక్ష చూపిస్తున్నారు.
– మంత్రి కేటీఆర్
పెద్దపల్లి, (నమస్తే తెలంగాణ)/ గోదా వరిఖని/ రామగిరి/ యైటిైంక్లెన్ కాలనీ, ఏప్రిల్ 7 : ప్రభుత్వ రంగ సంస్థలను ప్రైవేట్ పరం చేయడమే లక్ష్యంగా పెట్టుకున్న కేంద్రంపై సింగరేణి కార్మికలోకం ఆగ్రహం వ్యక్తం చేస్తున్నది. సింగరేణిలోని పలు బొగ్గు బ్లాకులను వేలం ద్వారా విక్రయించాలని నిర్ణయించడంపై మండిపడుతున్నది. ఈ మేరకు బీఆర్ఎస్ వర్కింగ్ ప్రెసిడెంట్, మంత్రి కేటీఆర్ ఇచ్చిన పిలుపు మేరకు ప్రధాని మోదీకి వ్యతిరేకంగా శనివారం సింగరేణి వ్యాప్తంగా మహాధర్నా చేపట్టేందుకు సిద్ధమైంది. ఈ క్రమంలో పెద్దపల్లి జిల్లా రామగుండం-1డివిజన్లోని గోదావరిఖని, మంచిర్యాల జిల్లా సీసీసీ నస్పూర్ ఏరియా, కొత్తగూడెం డివిజన్, భూపాలపల్లిలో మహాధర్నాలు నిర్వహించి నిరసన తెలుపనున్నది. సింగరేణి వ్యాప్తంగా 11 ఏరియాలైన ఆర్జీ-1, 2, 3తో పాటు భూపాలపల్లి, బెల్లంపల్లి, మందమర్రి, శ్రీరాంపూర్, కొత్తగూడెంలోని కొత్తగూడెం ఇల్లెందు, మణుగూరు ఏరియాల్లో 42,700 మందికి పైగా పనిచేస్తున్నారు. సింగరేణి బొగ్గు బ్లాకుల ప్రైవేటీకరణపై ఇప్పటికే పలుసార్లు కార్మికులు ఆందోళనకు దిగారు. సమ్మెలు నిర్వహించడం, నల్లబ్యాడ్జీలు ధరించడం ద్వారా నిరసన తెలిపారు. అవసరమైతే సింగరేణి వ్యాప్తంగా మరోసారి సమ్మె నిర్వహించేందుకు సిద్ధమని తేల్చి చెబుతున్నారు. నవంబర్ 12న రామగుండం పర్యటన సందర్భంగా ప్రధాని మోదీ సింగరేణిని ప్రైవేటీకరించే ప్రసక్తే లేదని తేల్చి చెప్పారు. ఆ వెంటనే కొద్ది రోజులకే బొగ్గు గనుల వేలానికి సంబంధించి ప్రకటన చేయడంతో మోదీ మోసంపై కార్మికులు భగ్గుమన్నారు.
గతంలో నాలుగు బొగ్గు బ్లాకులకు సంబంధించి వేలం నిర్వహించేందుకు సిద్ధమైన కేంద్రం కేకే-6 బ్లాకును మినహాయించి కోయగూడెం బ్లాకును ప్రైవేటు వ్యక్తులకు కేటాయించింది. ఈసారి మాత్రం కొత్తగా వేలంలో 3 ఓపెన్ కాస్టు ప్రాజెక్టులే ఉన్నాయి. కొత్తగా చేర్చిన పెనగడప బ్లాకుతో పాటు శ్రావన్పల్లి, సత్తుపల్లి, బ్లాకులను వేలం వేసేందుకు ఇటీవలే ప్రకటన విడుదల చేసి మే 30లోపు టెండర్లు దాఖలు చేసేందుకు వీలు కల్పించారు. సాక్షాత్తూ ప్రధాన మంత్రి మోదీ ప్రైవేటీకరణ చేసే ఆలోచనే లేదని, రాష్ట్ర ప్రభుత్వానికే 51 శాతం వాటా ఉందని, కేంద్రానిది కేవలం 49 మాత్రమేనని, అలాంటి పరిస్థితుల్లో తాము చేయడం వీలు కాదని చెప్పి నెల తిరగకముందే ప్రైవేటీకరణకు పావులు కదిపారు. తాజాగా మరో మూడు బ్లాకులను ప్రైవేటీకరించేందుకు మే 30 వరకు టెండరు దాఖలుకు తేదీలను ఖరారు చేశారు. ఈ క్రమంలో మరోసారి తెలంగాణకు వస్తున్న మోదీకి సింగరేణి కార్మికుల సెగ తగలనున్నది. దీనికి తోడు సింగరేణిలో గుర్తింపు సంఘంగా ఉన్న టీబీజీకేఎస్ మద్దతు తెలపడంతో పెద్ద ఎత్తున కార్మికులు నిరసన గళాన్ని వినిపించనున్నారు. వేలాది మందితో ధర్నాలను నిర్వహించేందుకు కార్మికలోకం సిద్ధమైంది. తెలంగాణ సిరుల తల్లి సింగరేణి పరిరక్షణ మరో ఉద్యమానికి బీఆర్ఎస్ నాంది పలికింది. కేంద్రంలోని మోదీ సర్కార్ కుట్రలను తిప్పికొట్టేందుకు నేడు రామగుండం పారిశ్రామిక ప్రాంతంలో మహాధర్నా చేయనున్నారు.
మహాధర్నాకు తరలిరండి..
కేంద్రం సింగరేణి సంస్థను ప్రైవేటీకరించేందుకు కుట్ర పన్నుతున్నది. సింగరేణిని పూర్తిగా ప్రైవేటీకరించి చేతులు దులుపుకోవాలని చూస్తున్నది. మరోసారి బొగ్గు బ్లాకులను వేలం వేయడాన్ని ఎండగట్టాలి. సింగరేణి బొగ్గు గనుల వేలానికి మరోసారి నిర్ణయం తీసుకున్న నేపథ్యంలో కేంద్ర ప్రభుత్వానికి వ్యతిరేకంగా బీఆర్ఎస్ ఆధ్వర్యంలో చేపట్టే మహాధర్నాను విజయవంతం చేయాల్సిన బాధ్యత మనందరిపైనా ఉన్నది. బీఆర్ఎస్ వర్కింగ్ ప్రెసిడెంట్, మంత్రి కేటీఆర్ పిలుపు మేరకు శనివారం గోదావరిఖని ప్రధాన చౌరస్తాలో నిర్వహించే మహాధర్నాకు పార్టీ నాయకులు, కార్యకర్తలు, టీబీజీకేఎస్ కార్యకర్తలు, కార్మికులు పెద్దసంఖ్యలో తరలివచ్చి విజయవంతం చేయాలి.
– రామగుండం ఎమ్మెల్యే కోరుకంటి చందర్
గుణపాఠం చెప్తాం
ప్రధాని మోదీ తెలంగాణకు వచ్చినప్పుడు అబద్ధాలు చెబుతూ.. ఢిల్లీకి వెళ్లగానే మళ్లీ ‘సింగరేణి’పై విషం గక్కుతున్నడు. ఆయనకు బుద్ధి చెప్పాల్సిన సమయం ఆసన్నమైంది. గత నవంబర్ 12న రామగుండం వచ్చినప్పుడు సింగరేణిని ప్రైవేటీకరణ చేసే ప్రసక్తే లేదని స్పష్టంగా చెప్పిండు. ఢిల్లీ వెళ్లగానే వేలంపై ప్రకటన చేసిండు. మొదట నాలుగు బొగ్గు బ్లాకుల వేలానికి ప్రయత్నించిన మోదీ ప్రభుత్వం ఆ తర్వాత ఆ బ్లాకుల నుంచి కేకే-6ను మినహాయించి కోయగూడెం బ్లాకును ప్రైవేట్కు అప్పగించేందుకు నిర్ణయించింది. ఇప్పుడు ఏకంగా ఓపెన్కాస్టులైన శ్రావణ్పల్లి, సత్తుపల్లి, పెనగడపను వేలం ద్వారా అమ్మేందుకు నిర్ణయించిండు. సింగరేణిలోని 40 వేల పైచిలుకు కార్మికులతోపాటు అన్ని వర్గాల ప్రజలు పోరాటాలకు సిద్ధం కావాల్సిన అవసరం ఉన్నది.
– మిర్యాల రాజిరెడ్డి, టీబీజీకేఎస్ ప్రధాన కార్యదర్శి
ప్రైవేట్కు అప్పగించడమే మోదీ లక్ష్యం
ప్రభుత్వ రంగ సంస్థలను మోదీ ప్రైవేట్కు అప్పగించడమే లక్ష్యంగా పెట్టుకున్నడు. ఆయనకు గుణపాఠం చెప్పాల్సిన సమయం ఆసన్నమైంది. కేంద్రంలో పెట్టుబడుల ఉపసంహరణ కోసం ప్రత్యేకంగా డిజిన్విస్టిమెంట్ మంత్రిత్వ శాఖను ఏర్పాటు చేసి ఇప్పటికే 65 వేల కోట్లను సమీకరించిన మొదటి ప్రధానిగా మోదీ చరిత్ర పుటల్లో నిలిచిపోతడు. కోలిండియాలోని 33 శాతం వాటాలను ఇప్పటికే విక్రయించిన మోదీ.. ఇప్పుడు సింగరేణి సంస్థకు చెందాల్సిన బొగ్గు బ్లాకులను ప్రైవేట్ వ్యక్తులకు అప్పగించే పనిలో పడ్డడు. ఇప్పటికే దేశ వ్యాప్తంగా 144 బొగ్గు బ్లాకులను వేలం వేసిన్రు. మంత్రి కేటీఆర్ ఇచ్చిన పిలుపులో భాగంగా శనివారం కొత్తగూడెం, సీసీసీ, గోదావరిఖని, భూపాలపల్లి ఏరియాల్లో మహాధర్నాతో మోదీకి దిమ్మతిరిగేలా భారీ మహాధర్నాలు నిర్వహిస్తున్నాం.
– కెంగెర్ల మల్లయ్య, టీబీజీకేఎస్ వర్కింగ్ ప్రెసిడెంట్