మంథని రూరల్, జూలై 26 : మంథని మండలం ఎక్లాస్పూర్ ప్రభుత్వ జడ్పీ ఉన్నత పాఠశాల అధ్వానంగా మారింది. కొద్ది రోజులుగా పడుతున్న వర్షాలకు ఆవరణ చెరువులా మారడం, స్కూల్కు వచ్చే రోడ్డు బురదమయంగా తయారవడంతో పిల్లలు ఇబ్బందులు పడాల్సి వస్తున్నది. గ్రామంలోని జడ్పీ ఉన్నత పాఠశాల, ప్రాథమిక పాఠశాలలు ఒకే కాంపౌండ్లో ఉన్నాయి. హైస్కూల్లో సుమారుగా 150 మంది, ప్రాథమిక పాఠశాలలో 60 మంది అభ్యసిస్తున్నారు. చిన్నపాటి వాన పడినా చాలు ఆవరణ అంతా నీటితో నిండిపోతున్నది.
తరగతి గదులకు రావాలంటే నీటిలో ఏర్పాటు చేసిన ఇటుకలపై నడుస్తూ సర్కస్ ఫీట్లు చేయాల్సిన పరిస్థితి దాపురించింది. ఇంకా తరచూ వర్షపు నీరు నిలుస్తుండడంతో పిచ్చి మొక్కలు పెరగడంతోపాటు దోమలు ఉధృతి కూడా పెరుగుతుండడంతో పిల్లలు చదువుకోలేకపోతున్నారు. ఈ నెల 4న కలెక్టర్ కోయ శ్రీహర్ష ఎక్లాస్పూర్లోని జడ్పీ, ప్రాథమిక పాఠశాలను సందర్శించి, గ్రౌండ్లో నీరు నిల్వ ఉండటాన్ని గమనించి ఆగ్రహించా రు. గ్రౌండ్ లెవలింగ్ పనులు చేపట్టి వెంటనే చేపట్టాలని ఆదేశించారు. కానీ, రోజులు గడుస్తున్నా పట్టించుకునేవారు కరువయ్యారు. మళ్లీ కలెక్టర్ దృష్టి సారిస్తేనే సమస్య పరిష్కారమవుతుందని విద్యార్థుల తల్లిదండ్రులు చెబుతున్నారు.