ఓదెల, మే 15: ఈత నేర్చుకోవడానికి వెళ్లిన ఇంటర్ విద్యార్థి అనుకోని రీతిలో మృత్యుఒడికి చేరాడు. తల్లిదండ్రులకు తీరని దుఃఖాన్ని మిగిల్చాడు. పోలీసుల వివరాల ప్రకారం.. జీలకుంటకు చెందిన దొడ్డిపెల్లి కుమారస్వామి- రేణుక దంపతులకు ఇద్దరు కొడుకులు. అందులో పెద్దోడు అరవింద్ (19) ఓదెల మోడల్ స్కూల్లో ఇటీవలే ఇంటర్మీడియెట్ ఫస్టియర్ పూర్తి చేశాడు.
ప్రస్తుతం వేసవి సెలవులు కావడంతో ఈత నేర్చుకోవాలనుకున్నాడు. బుధవారం స్నేహితులతో కలిసి గ్రామ శివారులోని వ్యవసాయ బావి వద్దకు వెళ్లాడు. నడుముకు ఖాళీ ప్లాస్టిక్ ఆయిల్ క్యాన్లు కట్టుకుని కొద్దిసేపు బావిలో ఈత నేర్చుకునే ప్రయత్నం చేశాడు. ఇంటికి వెళ్లే క్రమంలో అందరితోపాటు అరవింద్ కూడా బావి పైకి వచ్చాడు. కాలికి బురద అంటడంతో బండరాయి మీద నిల్చొని కడుక్కుంటున్న సమయంలో ప్రమాదవశాత్తు కాలుజారి బావిలో పడ్డాడు.
గమనించిన స్నేహితులు రక్షించే ప్రయత్నం చేసినా ఫలితం లేకుండా పోయింది. నీటిలో మునిగి చనిపోయాడు. కుటుంబసభ్యులు, గ్రామస్తులకు సమాచారం అందించడంతో వెంటనే అక్కడికి చేరుకున్నారు. బావిలో నుంచి అరవింద్ మృతదేహాన్ని బయటికి తీయడంతో తల్లిదండ్రులు ఒక్కసారిగా గొల్లుమన్నారు. మృతదేహంపై పడి గుండలవిసేలా రోదించారు. పొత్కపల్లి ఎస్ఐ అశోక్రెడ్డి ఘటనా స్థలానికి వెళ్లి ప్రమాదం జరిగిన తీరును పరిశీలించారు. తండ్రి కుమారస్వామి ఇచ్చిన ఫిర్యాదు మేరకు కేసు నమోదు చేశారు.