సర్కారు బడులు సమస్యల వలయంలో కొట్టుమిట్టాడుతున్నాయి. మొన్నటిదాకా సకల వసతులు, రోజూ తీరొక్క బ్రేక్ఫాస్ట్, మధ్యాహ్నం మిడ్డేమీల్స్, సబ్జెక్టు టీచర్లతో ఆహ్లాదకరంగా సాగిన చదువులు, కాంగ్రెస్ సర్కారు ఆరు నెలల పాలనలోనే అటకెక్కుతున్నాయి. పాఠశాలల నిర్వహణ గాలికి వదిలేయడం వల్ల విద్యార్థులే కాదు, ఉపాధ్యాయులు, మధ్యాహ్న భోజన నిర్వాహకులకు అన్నీ ఇబ్బందులే ఎదురవుతుండగా, మాజీ మంత్రి హరీశ్రావు లేఖతో వాస్తవాలు బయటకొస్తున్నాయి. ఈ క్రమంలో మంగళవారం ‘నమస్తే తెలంగాణ’ క్షేత్రస్థాయిలో పరిశీలించగా అనేక సమస్యలు, లోటుపాట్లు వెలుగులోకి వచ్చాయి. పదోన్నతులతో ఏర్పడిన బోధకుల కొరత, వేతనాలు రాక, బిల్లులు మంజూరుకాక వంట ఏజెన్సీలు పడుతున్న బాధలు.. ఇలా అనేక సమస్యలు వెలుగుచూశాయి.
కరీంనగర్, జూలై 9 (నమస్తే తెలంగాణ): ఉమ్మడి జిల్లాలోని ప్రభుత్వ పాఠశాలల్లో మధ్యాహ్న భోజన నిర్వాహకులైన కుక్లు, హెల్పర్లకు గతేడాది డిసెంబర్ వరకే గౌరవ వేతనం అందింది. ఈ యేడాది జనవరి నుంచి గౌరవ వేతనాలు అందలేదు. నెలల తరబడి బిల్లులు పెండింగ్లో ఉన్నాయి. 9,10 తరగతుల మధ్యాహ్న భోజన బిల్లులు ఫిబ్రవరి, మార్చి, ఏప్రిల్, జూన్ నెలలవి పెండింగ్లో ఉన్నాయి. ఇటు 1 నుంచి 8వ తరగతి ఏప్రిల్ వరకు మాత్రమే వచ్చాయి. గత నెలవి పెండింగ్లో ఉన్నాయి. కోడి గుడ్ల బిల్లులు ఫిబ్రవరి నుంచి పెండింగ్లోనే ఉన్నాయి. ఇలాంటి పరిస్థితుల్లో మధ్యాహ్న భోజనం నిర్వహించలేక పోతున్నామని, అప్పులు చేయాల్సి వస్తోందని నిర్వాహకులు వాపోతున్నారు. బిల్లులు రాక కుటుంబ పోషణ భారంగా మారిందని ఆవేదన వ్యక్తం చేస్తున్నారు. ఇటు పిల్లలు కూడా మధ్యాహ్న భోజనం అందక ఆకలితో అలమటిస్తున్నారని చెబుతున్నారు. అలాగే సర్వశిక్ష అభియాన్, ఐఈఆర్పీల వేతనాలు కూడా రెండు నెలలుగా వేతనాలు అందక ఇబ్బందులు ఎదుర్కొంటున్నారు. మంగళవారం ‘నమస్తే తెలంగాణ’ పాఠశాలలను సందర్శించగా, మధ్యాహ్న భోజన నిర్వాహకులు, సర్వశిక్ష అభియాన్ రిసోర్స్ పర్సన్స్, విద్యార్థులు తమ ఆవేదనను వెలిబుచ్చారు.
గతంలో పాఠశాలల పారిశుధ్య నిర్వహణ పంచాయతీల సిబ్బంది ద్వారా నిర్వహించేది. ఇప్పుడు ఆ బాధ్యతలను అమ్మ కమిటీలకు అప్పగిస్తున్నామని రాష్ట్ర ప్రభుత్వం ప్రకటించింది. కానీ ఇది అమలుకు రాలేదు. దీంతో అనేక పాఠశాలల్లో పారిశుధ్య సమస్యల తీవ్రత కనిపించింది..
గతంలో ఒక్కో నియోజకవర్గంలో కొన్ని పాఠశాలలను తీసుకుని సీఎం బ్రేక్ ఫాస్ట్ కింద విద్యార్థులకు ప్రతి రోజూ అల్పాహారం ఇచ్చేది. ఇప్పుడు ఏ పాఠశాలలో అల్పాహారం పథకాన్ని అమలు చేయడం లేదు. ఇంటి నుంచి వచ్చే ముందు ఎలాంటి ఆహారం తీసుకోకుండా బడికి వచ్చే పేద పిల్లలకు ఈ పథకం ఎంతో ప్రయోజనకరంగా ఉండేది.
పాఠశాలలకు ఉచిత విద్యుత్తు అందిస్తామని సీఎం రేవంత్ రెడ్డి హామీ ఇచ్చారు. కానీ ఈ హామీ ఇప్పటి వరకు నెరవేర లేదు. అధికారిక ఉత్తర్వులు లేక పోవడంతో కొన్ని చోట్ల విద్యుత్తు అధికారులు సరఫరా నిలిపి వేస్తున్నారు. ఈ విషయాన్ని ఉన్నతాధికారుల దృష్టికి తీసుకెళ్లినా పట్టించుకోని పరిస్థితి ఏర్పడింది..
ఎస్జీటీలకు స్కూల్ అసిస్టెంట్లుగా పదోన్నతులు కల్పించిన కారణంగా ప్రాథమిక పాఠశాలల్లో అనేక ఖాళీలు ఏర్పడ్డాయి. పాఠాలు బోదించే వారు లేక పోవడంతో విద్యార్థులు ప్రైవేట్ పాఠశాలలకు వెళ్లాల్సి వస్తోంది. ప్రైవేట్ పాఠశాలలకు వెళ్లలేని విద్యార్థులు నష్టపోయే పరిస్థితి ఏర్పడింది.
నిధులు రాక టిఫిన్ పెడుతలేం..
సీఎం బ్రేక్ ఫాస్ట్ స్కీమ్కు నిధులు రాకపోవడంతో ఆపేసినం. గతంలో ఒకసారి మూడు నెలల బిల్లు వచ్చింది. ఆ డబ్బులతోనే జూన్ 26 దాకా పిల్లలకు టిఫిన్లు పెట్టినం. నిధులు ఇస్తే మళ్లీ టిఫిన్లు చేసి పెడుతం. ఇప్పటికే మేం సొంతంగా కొన్ని నెలల నుంచి డబ్బులు పెట్టుకున్నం. టిఫిన్లు చేసినప్పుడు విద్యార్థులు తొందరగ వచ్చేటోళ్లు. ఇప్పుడు లేటుగా వస్తున్నరు. కొందరు ఏమీ తినకుండా వస్తున్నరు. మధ్యాహ్న భోజనం చేసే సరికి ఒంటి గంటవుతుంది. అప్పటి దాకా కొందరు పిల్లలు పస్తులుంటున్నరు. సీఎం బ్రేక్ ఫాస్ట్ పథకం మళ్లీ ప్రారంభించాలి. మాకు ఎలాగైనా డబ్బులు వచ్చేలా అధికారులు చర్యలు తీసుకోవాలి.
– కొంతం భాగ్యమ్మ, మధ్యాహ్న భోజన వర్కర్, మండల పరిషత్ ప్రాథమిక పాఠశాల, (పెద్దపల్లి)
ఈ స్కూల్ కరెంట్ బిల్ రూ.30 వేలు దాటింది!
ఇబ్రహీంపట్నం మండల కేంద్రంలో ఉన్న జడ్పీ హైస్కూల్కు మంగళవారం ‘నమస్తే తెలంగాణ’ వెళ్లిన సమయంలో ప్రధానంగా మూడు సమస్యలు కనిపించాయి. 270 మంది విద్యార్థులు చదువుతున్న ఈ పాఠశాలలో 15 మంది ఉపాధ్యాయులు, ఒక ప్రధానోపాధ్యాయుడు పనిచేస్తున్నారు. ఆరు నుంచి పదో తరగతి వరకు తెలుగు, ఆంగ్ల మాధ్యమాల్లో తరగతులు నిర్వహిస్తున్నారు. విశాలమైన స్థలంలో ఉన్న పాఠశాలలో చాలినన్ని తరగతి గదులు కనిపించాయి. అయితే, హెచ్ఎం రాజయ్యతో మాట్లాడిన సమయంలో పాఠశాల విద్యుత్ బిల్లుల చెల్లింపు పెద్ద సమస్యగా మారినట్లు తెలిపారు. ఇప్పటికే రూ.30 వేలకు పైగా బకాయి ఉందన్నారు. విద్యుత్ బిల్లుల చెల్లింపు కోసం ప్రభుత్వం ప్రత్యేకంగా నిధులు ఇవ్వడం లేదని, దీంతో ఏ క్షణంలో కరెంట్ కనెక్షన్ కట్ చేస్తారో తెలియడం లేదన్నారు.
“మన ఊరు.. మన బడి” పథకంలో భాగంగా పాఠశాలలో అదనపు తరగతి గదుల నిర్మాణంతో పాటు, పాఠశాలలోని తరగతి గదుల్లో ఎలక్ట్రిఫికేషన్ చేశారని, ప్రతి తరగతి గదితో పాటు స్టాఫ్, హెచ్ం గదుల్లో ఫ్యాన్లు అమర్చారారని, ప్రతి గదికి రెండు నుంచి మూడు ట్యూబ్ లైట్లు ఏర్పాటు చేసినట్లు గుర్తు చేశారు. వీటితో పాటు పాఠశాలలకు నీటి సౌకర్యం కోసం బోరు వేయించారని చెప్పారు. బోరు, ట్యూబ్లు, ఫ్యాన్ల వినియోగంతో ప్రతి నెలా పెద్ద మొత్తంలో కరెంట్ బిల్లు వస్తున్నదని, నిధులు లేకపోవడంతో చెల్లించడం లేదన్నారు. పాఠశాలలో మరుగుదొడ్లు, మూత్ర శాలల కొరత తీవ్ర స్థాయిలో ఉందన్నారు. స్టాఫ్, పిల్లలతో కలిసి దాదాపు 300 మంది ఉంటే, కేవలం రెండు మూత్రశాలలు మాత్రమే ఉండటం సమస్యగా ఉందన్నారు. ముఖ్యంగా అమ్మాయిలు తీవ్ర అవస్థలు పడుతున్నట్లు తెలిపారు.
సమస్యల నిలయంగా ధర్మపురి స్కూల్
ధర్మపురి, జూలై 9 : ధర్మపురి పట్టణంలోని జిల్లా పరిషత్ బాలికల ఉన్నత పాఠశాల సమస్యలకు నిలయంగా మారింది. మంగళవారం ‘నమస్తే తెలంగాణ’ జరిపిన క్షేత్ర పరిశీలనలో పలు సమస్యలు గుర్తించింది. 400లకు పైగా విద్యార్థులు ఉన్న ఈ పాఠశాలలో పారిశుధ్యం సమస్య ప్రధానంగా ఉన్నది. పాఠశాల పక్కనే గల కాలనీకి సంబంధించిన మురుగు కాలువ తరగతి గదుల పక్క నుంచే పారుతుండడంతో విపరీతమైన దుర్గంధం వస్తున్నది. విద్యార్థుల సంఖ్యకు తగ్గట్లుగా గదులు లేక ఇబ్బందులు పడుతున్నారు. మూడు గదులు శిథిలావస్థకు చేరగా, వాటిని ప్రస్తుతం స్టోర్ రూములుగా ఉపయోగిస్తున్నారు. వాటి స్థానంలో అదనపు గదులు నిర్మించాల్సి ఉంది. గత విద్యా సంవత్సరంతోపాటు ఈ విద్యాసంవత్సంలో మొత్తం నాలుగు నెలల మధ్యాహ్న భోజన కార్మికుల వేతనాలు పెండింగ్లో ఉన్నాయి. కూరగాయల బిల్లులు కూడా నాలుగు నెలలుగా రావడం లేదు. పాఠశాలలో కార్యాలయ పనులు నిర్వహించేందుకు ఒక జూనియర్ అసిస్టెంట్, అలాగే స్వీపర్ పోస్టులను మంజూరు చేయాల్సి ఉంది. విద్యార్థినుల సంఖ్యకు తగ్గట్లుగా టాయ్లెట్స్ లేవు.
ఇది సిరిసిల్ల జిల్లా కేంద్రంలోని నెహ్రూనగర్ జడ్పీ పాఠశాల. ఇక్కడ చదివేది మొత్తం నేత కార్మికుల పిల్లలే. ఒకప్పుడు చిన్న చిన్న గదులతో శిథిలావస్థలో కొట్టుమిట్టాడే ఈ స్కూల్లో 140 మంది అభ్యసించేవారు. గత కేసీఆర్ ప్రభుత్వం ‘మన ఊరు- మనబడి’ కింద పాత భవనాన్ని తొలగించి సకల హంగులతో ఆధునిక భవంతిని నిర్మించింది. చిన్నారులకు ఉదయం బ్రేక్ఫాస్ట్, కడుపు నిండా సన్న బియ్యంతో మధ్యాహ్న భోజనం పెట్టింది. ఏడాదిలోనే విద్యార్థుల సంఖ్య 307కి పెరిగింది. కానీ కాంగ్రెస్ సర్కారు వచ్చిన తర్వాత పట్టింపులేక పాఠశాల నిర్వీర్యమైపోతున్నది. మధ్యాహ్న భోజన నిర్వాహకులకు బిల్లులు ఆగిపోయాయి. జీతాలు కూడా రావడం లేదు. బ్రేక్ ఫాస్ట్ పూర్తిగా బంద్ అయిపోయింది. కేవలం రాగి అంబలి ఇస్తున్నా, విద్యార్థులు తాగలేక ఆకలితో అలమటిస్తున్నారు. ప్రార్థన సమయంలో ఒంట్లో సత్తువ లేక కిందపడి పోయిన ఘటనలు కూడా ఉన్నాయి. ఇక 150 మంది బాలికలకు ఒక్కటే బాత్రూం ఉండడం ఇబ్బందికరంగా మారింది. అందరూ వెళ్లి వచ్చేసరికి క్లాసులకు ఆలస్యమవుతుందని బాలికలు ఆవేదన వ్యక్తం చేశారు. స్కూల్లో కంప్యూటర్లు ఉన్నా నేర్పించేవారు వారు లేక చెడిపోతున్నాయి. అటెండర్ కూడా దిక్కులేడు. ఆయన చేసే పనులన్నీ టీచర్లే చేసుకునే దుస్థితి నెలకొంది. ఇలా ఈ ఒక్క స్కూలే కాదు జిల్లాలోని అన్ని పాఠశాలలన్నింటిలోనూ ఇదే పరిస్థితి కనిపిస్తున్నది.
బాత్రూంలు లేక ఇబ్బంది పడుతున్నం
స్కూల్లో 150 మంది బాలికలున్నాం. ఒక్కటే బాత్రూం ఉంది. చాలా ఇబ్బందవుతుంది. ఎప్పుడూ చాలా లైన్ ఉంటది. వెళ్లి రావాలంటే తరగతులకు ఆలస్యం అవుతుంది. నీళ్లు తాగితే బాత్రూంకి వెళ్లాల్సి వస్తుందని, నీళ్లు కూడా సరిగా తాగడం లేదు. ఇంకో నాలుగు బాత్రూంలు నిర్మించాలి
– లహరి, 9వ తరగతి, సిరిసిల్ల నెహ్రూనగర్ స్కూల్
ఫిజిక్స్ టీచర్ పోస్టు ఖాళీ.. హెచ్ఎం సారే మాస్టారు
ఈ చిత్రంలో పిల్లలకు ఫిజిక్స్ తరగతులు బోధిస్తున్నది అల్మాస్పూర్ ప్రభుత్వ ఉన్నత పాఠశాల హెచ్ఎం కుమార స్వామి. ఈ స్కూల్లో పదేండ్ల నుంచి ఫిజిక్స్ టీచర్గా పనిచేసిన విక్రమ్రెడ్డి గత జూన్ 7వ బదిలీపై వెళ్లగా, ఆయన స్థానంలో మరో ఉపాధ్యాయుడు చేరకపోవడంతో ఆ పోస్టు ఖాళీగానే ఉంది. ఫిజిక్స్ పాఠాలు ముందుకు సాగక విద్యార్థులు ఇబ్బంది పడుతున్నారు. దీంతో హెచ్ఎం కుమార స్వామి తనకు తోచిన మేరకు ఫిజిక్స్ క్లాస్ తీసుకుంటున్నారు. విద్యా సంవత్సరం మొదలు కావడంతో పాఠశాలలో అడ్మిషన్లు, పాఠశాల నుంచి కళాశాలకు వెళ్లే విద్యార్థులకు టీసీలివ్వడం, దాంతో పాటు అనేక పనులతో బిజీగా ఉండే ఆయన, అనుకున్న స్థాయిలో దృష్టి పెట్టలేని పరిస్థితి ఏర్పడుతున్నది. భౌతిక శాస్త్ర ఉపాధ్యాయుడు బదిలీపై వెళ్లారని, ఆయన స్థానంలో మరో ఉపాధ్యాయుడు వచ్చేదాకా విద్యార్థులు సబ్జెక్టు నష్టపోవద్దనే ఉద్దేశంతో కష్టమైనా క్లాసులు తీసుకుంటున్నానని హెచ్ఎం చెబుతున్నారు.
ఆరు నెలలైనా ఇంకా జీతం రాలే..
మాది జగ్గయ్యపల్లె. నేను 11 ఏండ్ల సంది మానకొండూర్ పెద్దబడి (జడ్పీహెచ్ఎస్)లో స్వీపర్గా పనిచేస్తున్న. అప్పటి నుంచి నాకు నెలకు రూ.2500 జీతం ఇస్తున్నరు. కేసీఅర్ సారు ఉన్నప్పుడు నెల నెలా జీతం కరీంనగర్ బ్యాంకులో పడేది. కరోనా వచ్చినకాన్నుంచి వస్తలేదు. గ్రామపంచాయతీ నుంచి ఇస్తున్నరు. అది కూడా ఐదు నెలల కోసారి ఇచ్చేటోళ్లు. ఇప్పుడు జీతం బందైంది. ఆరు నెలల నుంచి వస్తలేదు. నేను రోజూ పొద్దునే బడికి వచ్చి మొత్తం రూంలు ఊడ్చి చెట్లకు నీళ్లు పడుతా. బాత్రూంలు కడుగుతా. పొద్దంతా బల్లేనే ఉంటా. చాలీచాలని జీతంతో బతుకుతున్న. జీతంపెంచి నెలనెల ఇత్తే బాగుంటది.
– నా పేరు మల్లం కనుకయ్య, స్వీపర్( మానకొండూర్)
ఏడు నెలల నుంచి బిల్లులు వస్తలేవు..
నేను కోనరావుపేట పెద్ద బడిలో చానా రోజుల సంది వంట చేస్తున్నా. గత ప్రభుత్వంలో ఎప్పటికప్పుడు బిల్లులు వచ్చేటియి. ఏ బాధా లేకుంట నడిపినం. కానీ కొత్త సర్కారు వచ్చింది. బిల్లులు ఆగినయి. ఏడు నెలల సంది వస్తలేవు. అప్పులు చేసి సరుకులు తెస్తున్నం. అసలే మాది పేద కుటుంబం. నెలల కొద్ది పైసలు రాకపోతే వంట ఎట్ల ఎల్లదీస్తం. మా ఇల్లు ఎట్లా గడుస్తది. బిల్లులు రాకపోవడంతో కాంట్రాక్టర్ కోడిగుడ్లు కూడా ఇస్తలేడు. వెంటనే బిల్లులు ఇవ్వాలె.
– వంగపల్లి వెంకవ్వ, మధ్యాహ్నభోజన నిర్వాహకురాలు (కోనరావుపేట)
జీతాలు ఇవ్వకుంటే ఎట్ల గడుస్తది
నేను మధ్యాహ్న భోజనం పథకం ప్రారంభమైనప్పటి నుంచి ధర్మారంలోని ప్రభుత్వ ప్రాథమిక పాఠశాలలో వంట మనిషిగా పని చేస్తున్న. దాదాపుగా 23 ఏండ్ల నుంచి చేస్తున్నా మాకైతే ఏమీ మిగలడం లేదు. మాకు రూ.3,000 జీతం ఇస్తున్నా అందులో ఒకసారి రూ.1000, ఇంకోసారి రూ.2000 ఇలా వేర్వేరు వేస్తున్నరు. ఆ ఇచ్చే జీతం ఒకేసారి వేస్తే మాకు ఉపయోగపడుతయ్. ఈ జీతం కూడా పోయిన నెల ఇవ్వనే లేదు. ఇట్లయితే మా ఇల్లు ఎట్ల గడుస్తది. ఈ సర్కారు వచ్చినంక కొత్త మెనూ రూల్ పెట్టిన్రు. దీని ప్రకారం మూడు రోజులు కోడి గుడ్లు పెడుతున్నం. అయితే, ప్రభుత్వం ఒక్కో గుడ్డుకు రూ.5 మాత్రమే ఇస్తున్నది. మేమే రూపాయిన్నర కలిపి రూ.6.50 ఒక గుడ్డు చొప్పున కొని పిల్లలకు పెడుతున్నం. దీని వలన తీవ్రంగా నష్ట పోతున్నం. ఒక్క విద్యార్థికి మధ్యాహ్న భోజనచార్జి రూ.5.45 మాత్రమే ఇస్తున్నరు. అవి ఏ మూలకూ చాలడం లేదు. వంట సామగ్రి, కూరగాయలు కొనడం ఎంతో ఇబ్బందిగా ఉంది. ఇప్పుడు ఇంకా అదనంగా రాగి జావ తయారు చేసి ఇస్తున్నం. పథకం ప్రారంభమైనప్పుడు ఇచ్చిన వంట సామగ్రి (బోళ్లు) పాడై పోయినయి. ఇప్పుడు కొత్తవి కొని ఇవ్వాలి. సిలిండర్ ఉచితంగా ఇవ్వాలి. మా జీతం రూ.15వేలకు పెంచి ఆదుకోవాలి.
– తోట సుగుణ, మధ్యాహ్న భోజన కార్మికురాలు,ప్రాథమిక పాఠశాల (ధర్మారం)