గంగాధర, ఏప్రిల్ 11 : అసెంబ్లీ ఎన్నికల ముందు ఇచ్చిన ఆరు గ్యారెంటీలు అమలు చేయకుండా ప్రజల వద్దకు వెళ్లి ఓట్లడిగే అర్హత కాంగ్రెస్ నాయకులకు లేదని చొప్పదండి మాజీ ఎమ్మెల్యే సుంకె రవిశంకర్ ధ్వజమెత్తారు. కాంగ్రెస్ పార్టీ అభ్యర్థి ఎవరో తెలియకుండానే మంత్రి పొన్నం ప్రభాకర్ కొండగట్టు అంజన్నకు ముడుపులు కట్టడం హాస్యాస్పదంగా ఉందని ఎద్దేవా చేశారు.
గంగాధర మండలం మధురానగర్లో గురువారం ఏర్పాటు చేసిన విలేకరుల సమావేశంలో ఆయన మాట్లాడారు. తాము కేసీఆర్ ప్రభుత్వం అమలు చేసిన సంక్షేమ పథకాలను వివరించి ప్రజలను ఓట్లు అడుగుతామన్నారు. కానీ, ఆరు గ్యారెంటీలు అమలు చేయకుండా ప్రజల వద్దకు వెళ్లగలరా..? అని కాంగ్రెస్ నాయకులను ప్రశ్నించారు.
పొన్నం ప్రభాకర్ కరీంనగర్ ఎంపీగా ఉన్న సమయంలో పార్లమెంట్ అభివృద్ధికి ఎన్ని నిధులు తెచ్చాడో చెప్పి ఓట్లడగాలని డిమాండ్ చేశారు. కరీంనగర్ పార్లమెంట్ నియోజకవర్గ అభివృద్ధికి మాజీ ఎంపీ వినోద్కుమార్ ఏమీ చేయలేదని పొన్నం మాట్లాడడం విడ్డూరంగా ఉందన్నారు. కరీంనగర్కు స్మార్ట్సిటీని, కొత్తపల్లి-మనోహరాబాద్ రైల్వేలైన్ను, జాతీయ రహదారులను, చొప్పదండికి సైనిక్ స్కూల్ ను తీసుకువచ్చిన ఘనత వినోద్కుమార్కే దక్కుతుందన్నారు.
సమావేశంలో బీఆర్ఎస్ మండలాధ్యక్షుడు మేచినేని నవీన్రావు, మార్కెట్ కమిటీ మాజీ చైర్మన్ సాగి మహిపాల్రావు, నాయకులు వేముల అంజి, రామిడి సురేందర్, దూలం శంకర్గౌడ్, వడ్లూరి ఆదిమల్లు, దోమకొండ మల్లయ్య, సామంతుల శ్రీనివాస్, సముద్రాల అజయ్, గంగాధర కుమార్, ద్యావ సంజీవ్, గడ్డం స్వామి, గంగాధర మోహన్, తూం రవి పాల్గొన్నారు.