సమైక్య రాష్ట్రంలో సాగునీటి రంగంపై దారుణమైన వివక్ష ఉండేది. అందుకు మిడ్మానేరు జలాశయమే పెద్ద ఉదాహరణ. ఉమ్మడి కరీంనగర్, వరంగల్ జిల్లాల్లోని రెండు లక్షలకుపైగా ఎకరాలకు సాగునీరు అందించాలన్న లక్ష్యంతో 2006లో మిడ్మానేరు ప్రాజెక్టు నిర్మాణానికి పునాది రాయి పడింది. మూడేళ్లలో పనులు పూర్తి కావాల్సి ఉన్నా కాంగ్రెస్ ప్రభుత్వం అంతులేని నిర్లక్ష్యం చూపింది. కాంట్రాక్టు సంస్థలను మారుస్తూ.. గడువు పొడిగిస్తూ పోయినా 20 శాతం కూడా పూర్తి చేయలేకపోయింది. పదేళ్లు గడిచినా పనులు కొసెళ్లలేదు. కానీ, బీఆర్ఎస్ సర్కారు అధికారంలోకి వచ్చిన తర్వాత రైతుల మీద ప్రేమతో మూడేళ్లలోనే ప్రాజెక్టును పూర్తి చేసి చూపింది. పనులతోపాటు నిర్వాసితుల పరిహారం కోసం 500 కోట్లకుపైగా ఖర్చు చేసింది. కాళేశ్వర జలాలతో నిండుకుండలా మార్చి రైతన్నకు భరోసానిచ్చింది.
కాంగ్రెస్ పాలనలో మళ్లీ వివక్ష కొనసాగుతున్నది. పదేళ్ల కిందట ఎలా ఉన్నదో.. ఇప్పుడు అలాంటి దుస్థితే కనిపిస్తున్నది. ఉమ్మడి జిల్లా రైతులు సాగునీటి కోసం తండ్లాడాల్సి వస్తున్నది. సాగునీటి ప్రణాళిక అమలులో సర్కారు వైఫల్యమే కారణమని రైతాంగం ఆరోపిస్తున్నది. మేడిగడ్డ వద్ద కుంగిన పిల్లర్లను సాకుగా చూపుతూ.. నీళ్లివ్వడంలో పూర్తిగా నిర్లక్ష్యం చేస్తున్నదని మండిపడుతున్నది. నాడు సమైక్య రాష్ట్రంలో కాంగ్రెస్ ప్రభుత్వం మొదలు పెట్టి వదిలేసిన మధ్యమానేరు ప్రాజెక్టును కేసీఆర్ సర్కారు కేవలం మూడేళ్లలోనే పూర్తి చేసిందని గుర్తు చేస్తున్నది. కానీ, ప్రస్తుత కాంగ్రెస్ ప్రభుత్వం మేడిగడ్డ వద్ద మరమ్మతులు ఎందుకు చేయడం లేదని ప్రశ్నిస్తున్నది. రాజకీయ కక్షకు వెళ్లడంతోనే ఈ దుస్థితి వచ్చిందని ఆగ్రహిస్తున్నది. ఈ ప్రభుత్వం తమపై కక్ష తీర్చుకుంటున్నదని, ఇలా చేయడం చేతగానితనానికి నిదర్శమని మండిపడుతున్నది.