“రైతుబంధు పథకానికి అర్హులమైన మేము రైతు రుణమాఫీకి అర్హులం కాదా?. తీసుకున్నది రూ.లక్ష లోపే అయినా సర్కారు ప్రకటించిన మొదటి లిస్ట్లో మా పేరెందుకు లేదు?. ఏకకాలంలో రూ.2లక్షల రుణమాఫీ చేస్తామని కొర్రీలు ఎందుకు పెడుతున్నరు?” అంటూ ఉమ్మడి కరీంనగర్ జిల్లాలో అర్హత ఉన్నా రుణమాఫీకి నోచుకోని రైతులు సర్కారు తీరుపై మండిపడుతున్నారు. తీసుకున్న క్రాప్ లోన్ రూ.లక్ష లోపే అయినా వందలాది మంది పేర్లు మాఫీ జాబితాలో లేక పోవడంతో ఆందోళన చెందుతున్నారు. తమకు రుణ మాఫీ వర్తిస్తుందా? లేదా? అని అనుమానం వ్యక్తం చేస్తున్నారు. మరోవైపు ఇప్పటికే అనేక కొర్రీలు పెట్టి జాబితాను వడబోస్తున్న ప్రభుత్వం మార్గదర్శకాల ప్రకారం అర్హులైన వారికి కూడా ఇవ్వడం లేదనే విమర్శలు వస్తున్నాయి.
-కరీంనగర్, జూలై 21 (నమస్తే తెలంగాణ)
రైతు రుణమాఫీ పథకం కింద మొదట రూ.లక్ష వరకు ఉన్నవి మాఫీ చేస్తున్నామని రాష్ట్ర ప్రభుత్వం ఇచ్చిన జాబితాలో కొందరి పేర్లు మాత్రమే ఉండడంతో రైతులు ఆందోళనలో పడ్డారు. ఒక్కో గ్రామంలో వందల మంది రైతులు ఉంటే పదుల సంఖ్యలో మాత్రమే రుణ మాఫీ వర్తించడంతో తీవ్ర నిరాశకు గురవుతున్నారు. రాష్ట్ర ప్రభుత్వ తీరుపై ఆగ్రహంతో కనిపిస్తున్నారు. రైతుబంధు పథకానికి అర్హులమైన తాము రుణమాఫీకి ఎందుకు అర్హులం కాదని, తామేం పాపం చేశామని నిలదీస్తున్నారు.
అంతే కాకుండా, ఏక కాలంలో రూ.2 లక్షల రుణ మాఫీ చేస్తామని చెప్పిన రాష్ట్ర ప్రభుత్వం ఇప్పుడు మూడు విడతల్లో ఇస్తామని మాట మార్చడాన్ని తప్పుబడుతున్నారు. రూ.లక్ష వరకు ఉన్న రైతులకు ఒకసారి, రూ.1.50 లక్షల వరకు ఉన్న రైతులకు రెండోసారి, రూ.2 లక్షల వరకు ఉన్న రైతులకు చివరి సారిగా రుణమాఫీ చేస్తామని ప్రభుత్వం చెప్పడాన్ని రైతులు తప్పుబడుతున్నారు.
అర్హత ఉండి రుణమాఫీ జాబితాలోకి రాని రైతులకు మరోసారి అవకాశం ఇస్తున్నామని, రైతు వేదికల్లో ఏఈవోల వద్ద బుక్లో తమ పేర్లు రాయించుకోవాలని జిల్లా అధికారులు చెబుతున్నారు. అయితే, తమ వివరాలన్నీ బ్యాంకులో ఉన్నాయని మళ్లీ పేర్లు రాయించుకోవడం దేనికని, ఈ రకంగా మరోసారి కాలయాపన చేసేందుకే ఈ విధంగా వ్యవహరిస్తోందనే విమర్శలు వస్తున్నాయి.
గొల్లపల్లిలో సగం మందికి ఎగనామం
గొల్లపల్లి, జూలై 20: గొల్లపల్లి సహకార సంఘం పరిధిలో రూ.లక్షలోపు రుణం తీసుకున్నవారు 687 మంది ఉండగా, అందులో 349 మందికి మాత్రమే మాఫీ వర్తించింది. చెందోలి సంఘం పరిధిలో 426 మందికిగాను 196 మంది రైతులకు మాత్రమే మాఫీ జరిగింది. మొత్తంగా 1,113 మందిలో 568 మందికి ప్రభుత్వం ఎగనామం పెట్టిందని రైతులు వాపోయారు.
ఆరు సంఘాల్లో సగంలోపే..
కోరుట్ల/ కోరుట్ల రూరల్, జూలై 20: కోరుట్ల మండలంలోని ఆరు సంఘాల పరిధిలో సగంమందికి రుణమాఫీ అందలేదు. కోరుట్ల ప్రాథమిక సహకార సంఘంలో రూ.లక్షలోపు లోన్లు తీసుకున్నవారు 671 మంది ఉండగా, 250 మందికి మాత్రమే మాఫీ జరిగింది. ఎఖీన్పూర్లో 681 మందికిగాను 183 మందికి, మాదాపూర్ సంఘంలో 626 మందికిగాను 137 మందికి, పైడిమడుగులో 849 మందికిగాను 136మందికి, చిన్నమెట్పల్లిలో 640 మందికిగాను 269 మందికి, అయిలాపూర్ సంఘంలో 429 మందికిగాను కేవలం 103 మందికి మాత్రమే మాఫీ జరిగింది. మొత్తంగా 3896 మందిలోన్ తీసుకుంటే 1078 మందికే రద్దు కాగా, మిగిలిన 2818 మంది ఆందోళన చెందుతున్నారు.
ఏటా రెన్యువల్ చేస్తున్నా మాఫీ కాలే..
నాకు ఒక ఎకరం 10 గుంటల వ్యవసాయ భూమి ఉంది. మంథని ఎస్బీఐ(ఏడీబీ) బ్యాంకులో 2019లో క్రాప్లోన్ తీసుకున్నా. ఏటా వడ్డీ చెల్లిస్తూ రెన్యువల్ చేయించుకుంటున్న. నాకు ప్రతి ఏడాది రైతు బంధు, పీఏం కిసాన్ డబ్బులు వస్తున్నయ్. ప్రస్తుత సర్కారు రుణమాఫీ కోసం విధించిన అన్ని నిబంధనలు లోబడి ఉన్నా నా లోన్ మాత్రం మాఫీ కాలే. బ్యాంకు అధికారులను అడిగినా ఎలాంటి స్పందన లేదు.
– ఆకుల సాయి, రైతు, కాకర్లపల్లి, మంథని మండలం(మంథని రూరల్)
అర్హత ఉన్నా లిస్ట్ల పేరు రాలే..
నేను చిన్న సన్నకారు రైతును. నాకు రెండెకరాల వ్యవసాయ భూమి ఉన్నది. జూలపల్లి బ్యాంక్ల రూ.80 వేల క్రాప్లోన్ తీసుకున్న. కాంగ్రెస్ సర్కార్ ప్రతి రైతు కుటుంబానికి రూ.రెండు లక్షల రుణ మాఫీ చేసినట్లు ప్రకటించింది. గురువారం రూ.లక్ష వరకు మాఫీ చేస్తమని చెప్పింది. కానీ, సర్కారు ఇచ్చిన మొదటి జాబితాల నా పేరు లేదు. ఎందుకు రాలేదో అని అడిగితే ఎవరూ తెల్వదంటున్నరు.
– అమరగాని లింగయ్యగౌడ్, రైతు, పెద్దాపూర్ (జూలపల్లి)
ఎందుకు కాలేదో అర్థమైతలేదు..
దుర్శేడ్ ఇండియన్ బ్యాంకుల నేను రూ.68 వేల క్రాప్ లోన్ తీసుకున్న. ఏటా వడ్డీ కట్టుకుంట వస్తున్న. అయినా నాకు రుణమాఫీ కాలే. ఏమైందని బ్యాంకు అధికారులను అడిగితే ఇంకా నాలుగైదు రోజుల వరకు పూర్తిగా తెల్వదన్నరు. అప్పటివరకు ఏం చెప్పలేమంటున్నరు. మరి మాకు ఎందుకు కాలేదో అర్థం కావడం లేదు.
– గాండ్ల శంకరయ్య, తండ్రి మల్లయ్య, చేగుర్తి (కరీంనగర్ రూరల్)
మాఫీ కాలే.. మేస్సేజ్ రాలే..
బొమ్మకల్లోని వ్యవసాయ భూమిపై రెండేండ్ల క్రితం దుర్శేడ్ ఇండియన్ బ్యాంకులో రూ. 60 వేల లోన్ తీసుకున్న. ప్రభుత్వం రెండు రోజుల క్రితం రూ. లక్ష దాకా పంట రుణాలు మాఫీ చేస్తామని చెప్పగానే మస్తు ఖుషీ అయిన. మొన్న చీకటిపడినంక ఫోన్ జూసుకుంటే మెస్సేజ్ రాలే. నిన్న ఎంతో అత్రుతతో బ్యాంకుకు వెళ్లి తెలుసుకుంటే నీ రుణం మాఫీ కాలేదని చెప్పిన్రు. అగో గిట్లేట్ల ఉండదని సార్లను అడిగితే మాకేం తెలియదు అధికారుల దగ్గరికి వెళ్లమని చెప్పిన్రు. ప్రభుత్వం గిట్ల జేత్తదని అనుకోలేదు.
– మంద నారాయణ, గోపాల్పూర్, (కరీంనగర్ రూరల్)
అన్ని అర్హతలున్నా కాలే..
నేను కమాన్పూర్ కేడీసీసీ బ్యాంకులో ఎకురం 27 గంటల భూమిపై 2021 సెప్టెంబర్లో రూ.59 వేలు క్రాప్ లోన్ తీసుకున్న. కానీ, రుణమాఫీ జాబితాలో నా పేరు లేదు.. నాకు తెల్ల రేషన్ కార్డు ఉంది. ఐటీ లేదు. సర్కారు నౌకరీ అంతకన్నా లేదు. ఎవుసం చేసుకుంటున్న.. మరి నాకెందుకు మాఫీ కాలే? రూ.లక్ష లోపు ఉన్నవారికి రుణమాఫీ చేశామని సీఎం, మంత్రులు గొప్పగ చెబుతున్నరు. కానీ, నాకు రూ.59 వేలే మాఫీ కాలే. ప్రభుత్వ మార్గదర్శకాల ప్రకారం నాకు అన్ని అర్హతలు ఉన్నయ్ కదా?. బ్యాంకు, వ్యవసాయ అధికారులను అడిగితే స్పష్టంగా చెప్తలేరు. పెద్దపల్లి కలెక్టరేట్లో ఏర్పాటు టోల్ ఫ్రీ నెంబర్కు రెండు రోజల కిందనే ఫోన్ కూడా చేసిన. పేరు, సెల్ నంబర్, అధార్ నెంబర్ అడిగిండ్రు. కానీ, ఇప్పటి వరకు ఎలాంటి మెస్సేజ్ రాలే. ఎవరిని అడగాలో అర్థం కావడం లేదు. మాఫీ చేస్తరా? చేయరా? చెప్పండి. కాలయాపన చేస్తూ రైతులను అయోమయానికి గురి చేయద్దు.
– కొయ్యడ మారుతి, రైతు, రొంపికుంట, కమాన్పూర్ మండలం(పెద్దపల్లి)
నాకెందుకు కాలేదో తెలుస్తలేదు..
నాకు ఓడేడ్ శివారులో ఎకరం భూమి ఉంది. ప్రాథమిక వ్యవసాయ సహకార సంఘంలో రూ.40 వేల క్రాప్ లోన్ తెచ్చుకున్న. లక్ష లోపు రుణాలు అన్నీ మాఫీ అవుతయ్ అన్నరు. నా అప్పు కూడా పోతుందనుకుని సంబురపడ్డ. కానీ, వాళ్లు ఇచ్చిన లిస్టుల నా పేరు లేదు. నా కన్నా ఎక్కువ ఉన్నోళ్లకు మాఫీ వచ్చింది. నాకెందుకు రాలేదో తెలుస్తలేదు. ఇైట్లెతే ఎట్ల?. నాకు మాఫీ అయ్యెటట్టు చూడాలె.
– మచ్చ దేవేంద్ర, మహిళా రైతు (ముత్తారం )