రాజన్న సిరిసిల్ల, జూలై 24 (నమస్తే తెలంగాణ) : నేతన్నలతో రాజకీయాలు చేయడం సరికాదని నాఫ్స్కాబ్ మాజీ చైర్మన్ కొండూరి రవీందర్రావు హితవు పలికారు. వస్త్ర పరిశ్రమ అభివృద్ధి కోసం బీఆర్ఎస్ సర్కారు ప్రవేశపెట్టిన సంక్షేమ పథకాలను యథావిధిగా కొనసాగించాలని కాంగ్రెస్ ప్రభుత్వాన్ని డిమాండ్ చేశారు. వస్త్ర పరిశ్రమను ఆదుకోవాలని సిరిసిల్ల అంబేద్కర్ చౌరస్తాలో నేతన్నలు చేపట్టిన దీక్షలు బుధవారం మూడో రోజుకు చేరుకోగా..
కొండూరి, మున్సిపల్ చైర్పర్సన్ జిందం కళ, బీఆర్ఎస్ పట్టణాధ్యక్షుడు జిందం చక్రపాణి ఆధ్వర్యంలో నాయకులు, కౌన్సిలర్లు సంఘీభావం తెలిపారు. ఈసందర్భంగా కొండూరి మాట్లాడుతూ, కేసీఆర్ సర్కారు చేపట్టిన సంక్షేమ పథకాలతోనే వలసబాట పట్టిన కార్మికులంతా వాపస్ వచ్చారని, సంతోషంగా పనిచేసుకున్నారని గుర్తు చేశారు. కానీ, కాంగ్రెస్ ప్రభుత్వం అధికారంలోకి వచ్చిన 8 నెలల్లో వస్త్ర పరిశ్రమ సంక్షోభంలోకి వెళ్లి నేతన్నలు ఇబ్బంది పడుతున్నారని ఆందోళన వ్యక్తం చేశారు. అయినా ప్రభుత్వం పట్టించుకోక పోవడం దారుణమన్నారు.
ఎన్నికల్లో రాజకీయాలుంటాయని, గెలిచిన తర్వాత ప్రజల మేలు కోరి పథకాలు అమలు చేయాల్సిన అవసరం ప్రభుత్వాలపై ఉంటుందన్నారు. కాంగ్రెస్ ప్రభుత్వం వివక్ష చూపుతున్నదని, బతుకమ్మ చీరలు, ఆర్వీఎం ఆర్డర్లు ఇవ్వక పోవడం, విద్యుత్ రాయితీలు రద్దు చేయడంతో వస్త్ర పరిశ్రమ సంక్షోభంలో కూరుకు పోయిందని ఆవేదన చెందారు.
మున్సిపల్ చైర్పర్సన్ జిందం కళ మాట్లాడుతూ, మాజీ మంత్రి కేటీఆర్ వస్త్ర పరిశ్రమకు అనేక రాయితీలు ఇచ్చి నేతన్నలకు అండగా నిలిచారన్నారు. బతుకమ్మ చీరల స్థానంలో మరేవైనా ఆర్డర్లు ఇచ్చి నేతన్నలకు ఉపాధి కల్పించాలని కోరారు. కార్యక్రమంలో మున్సిపల్ వైస్చైర్మన్ మంచె శ్రీనివాస్, కౌన్సిలర్లు దార్నం అరుణ, దిడ్డి మాధవీ, నాయకులు బొల్లి రాంమోహన్, సెస్డరెక్టర్ దార్నం లక్ష్మీనారాయణ తదితరులు పాల్గొన్నారు.