కలెక్టరేట్, మే 13 : నగరంలోని లోక్సభ ఎన్నికల పోలింగ్ కేంద్రాలను జిల్లా ఎన్నికల అధికారి పమేలా సత్పతి సోమవారం సందర్శించారు. సుభాష్నగర్ ప్రభుత్వ ఉన్నత పాఠశాలతో పాటు పలుచోట్ల జరుగుతున్న పోలింగ్ తీరును పరిశీలించారు. పోలింగ్ సరళిని గమనించిన అనంతరం ఓటర్ల వివరాలు నమోదు చేసే రిజిస్టర్ తనిఖీ చేశారు. పోలింగ్ కేంద్రాల్లో చేపట్టిన ఏర్పాట్లపై ఓటర్లను అడిగి తెలుసుకున్నారు. ఓటు హక్కు వినియోగించుకునేందుకు వచ్చిన ట్రాన్స్జెండర్లతో కొద్దిసేపు ముచ్చటించారు. ఈ సందర్భంగా మాట్లాడుతూ, పార్లమెంట్ పరిధిలో ఉన్న ట్రాన్స్జెండర్లంతా ఓటు హక్కు వినియోగించుకునేలా చూడాలని సూచించారు.
18ఏళ్లు దాటి ఓటు హక్కు వచ్చిన ప్రతి ఒక్కరూ ఓటేయాలని పిలుపునిచ్చారు. పార్లమెంట్ నియోజకవర్గ వ్యాప్తంగా ప్రశాంత వాతావరణంలో పోలింగ్ కొనసాగుతున్నదని వెల్లడించారు. కాగా, అంతకుముందు ఉదయం ఏడు గంటలకే కలెక్టర్ దంపతులు నగర పాలక సంస్థ కార్యాలయంలోని పోలింగ్ కేంద్రానికి వచ్చి తమ ఓటు హక్కు వినియోగించుకున్నారు. పోలింగ్ కేంద్రం వద్ద ఏర్పాట్లు, అందుబాటులో ఉన్న సదుపాయాలు పరిశీలించి, అధికారులకు సూచనలు చేశారు. అనంతరం కలెక్టరేట్లోని తన చాంబర్ నుంచి వెబ్కాస్టింగ్ ద్వారా పార్లమెంట్ ఎన్నికల ప్రక్రియను పర్యవేక్షించారు. డీఈవో వెంట డీఆర్డీవో శ్రీధర్, మెప్మా పీడీ రవీందర్, జిల్లా సంక్షేమాధికారి ఎం సరస్వతి, స్వీప్ నోడల్ అధికారి రామాచారి తదితరులు పాల్గొన్నారు.