జగిత్యాల, జూలై 16 : ఇటీవలి కాలంలో సైబర్ నేరాలు పెరుగుతున్నాయి. రోజుకో తరహాలో ఆన్లైన్ మోసాలు భయపెడుతున్నాయి. కొద్ది రోజులుగా ఫేక్ ఫోన్పే ఫ్రాడ్స్ కలవరపెడుతున్నాయి. మహిళలు నడిపించే షాపులను టార్గెట్ చేసి, చీరలో.. మరే వస్తువో కొని.. డబ్బులు పంపానని ఫేక్ మెసేజ్ చూపి గాయబ్ అవుతున్న ఘటనలు వెలుగు చూస్తున్నాయి. ఇలాంటి తరహాలోనే మోసానికి పాల్పడిన ఓ వ్యక్తిని తాజాగా జగిత్యాల పోలీసులు అరెస్ట్ చేశారు. అందుకు సంబంధించిన వివరాలను టౌన్ సీఐ వేణుగోపాల్ వెల్లడించారు. మంచిర్యాల జిల్లా హాజీపూర్ మండలం రాపల్లి గ్రామానికి చెందిన రామగిరి సురేశ్ నయా మోసానికి తెరతీశాడు.
శుక్రవారం నంబర్ప్లేట్ లేని పల్సర్పై జగిత్యాలలో ఒక బట్టల షాపునకు వెళ్లాడు. 2200 విలువైన మూడు చీరెలను కొనుగోలు చేశాడు. తన వద్ద నగదు డబ్బులు లేవని, ఫోన్పే చేస్తానని చెప్పాడు. అలాగే తనకు డబ్బులు అత్యవసరం ఉందని మరో 7800 తీసుకున్నాడు. మొత్తం 10 వేలు పంపిస్తానని చెప్పాడు. స్కానర్తో పంపితే రావడం లేదని, ఇంకో ఫోన్ నంబర్ చెప్పాలని యాజమానురాలిని అడిగాడు. ఆమె మరో నంబర్ చెప్పడంతో డబ్బులు పంపించానని ఫేక్ మెసేజ్ చూపించి ఉడాయించాడు. తన భర్త వచ్చిన తర్వాత ఫోన్పేలో డబ్బులు వచ్చాయా..? అని అడగ్గా.. రాలేదని చెప్పడంతో మోసపోయామని గ్రహించారు. ఆదివారం టౌన్ పోలీసులకు ఫిర్యాదు చేశారు. దీంతో పోలీసులు దర్యాప్తు చేపట్టారు. మంగళవారం విద్యానగర్ బైపాస్ రోడ్డులో అనుమానాస్పదంగా తిరుగుతున్న సురేశ్ను పట్టుకుని విచారించారు. అతడి వద్ద నుంచి 5వేలు నగదును రికవరీ చేసి, అరెస్టు చేసి రిమాండ్కు తరలించారు.