కరీంనగర్, మే 10 (నమస్తే తెలంగాణ ప్రతినిధి) / రాజన్న సిరిసిల్ల (నమస్తే తెలంగాణ) : కరీంనగర్ నుంచి బీఆర్ఎస్ అభ్యర్థి బోయినపల్లి వినోద్కుమార్ గెలిస్తేనే సిరిసిల్ల జిల్లా ఉంటుందని, ఇక్కడి చేనేత కార్మికులకు బతుకుదెరువు ఉం టుందని బీఆర్ఎస్ అధినేత, తెలంగాణ తొలి ముఖ్యమంత్రి కేసీఆర్ స్పష్టం చేశారు. కాంగ్రెస్ పాలనలో మరమగ్గాలు మూలనపడే పరిస్థితి వచ్చిందని, చేనేత కార్మికులు సచ్చిపోయే దుస్థితి వచ్చిందని, ఏ ఒక్కరినీ ఆదుకోలేదని, అన్ని వర్గాల ప్రజ లను మోసం చేసిందని ధ్వజమెత్తారు. దేశంలో మొట్టమొదటి సారి చేనేతపై జీఎస్టీ వేసిన మొదటి ప్రధాని నరేంద్ర మోడీ అని, ఇప్పటి వరకు ఏ ప్రధాని ఇలా చేయలేదని మండిపడ్డారు. ఈ పార్లమెంట్ ఎన్నికల్లో ఆగం కావద్దని, ఆలోచించి ఓటేయాలని విజ్ఞప్తి చేశారు.
బీఆర్ఎస్ అభ్యర్థులను గెలిపిస్తే మన కోసం పనిచేస్తారని, కరీంనగర్లో వినోద్ కుమార్ను బ్రహ్మాండమైన మెజార్టీతో గెలిపించాలని కోరారు. పార్లమెంట్ ఎన్నికల ప్రచా రంలో భాగంగా శుక్రవారం రాత్రి గులాబీ బాస్ సిరిసిల్ల నేతన్న చౌరస్తాలో రోడ్షో నిర్వహించారు. ఈ సందర్భంగా అశేషంగా తరలివచ్చిన జనవాహినిని ఉద్దేశించి ఉద్వేగభరిత ప్రసంగం చేశారు. కరీంనగర్ గడ్డపై నుంచి బీఆర్ఎస్ అభ్యర్థి వినోద్ కుమార్ ఎంపీగా గెలువాల్సిన అవశ్యకతను ప్రజలకు పూసగుచ్చి నట్టుగా వివరిస్తూనే.. ఇదే సమయంలో బీజేపీ, కాంగ్రెస్ తీరుపై మండిపడ్డారు. నిత్యం దేశం కోసం, ధర్మం కోసం అని మాట్లాడే మోడీ మొన్న వేములవాడకు వచ్చినప్పుడు అభివృద్ధి కోసం నిధులు ఎందుకు కేటాయించలేదని సూటిగా ప్రశ్నించారు.
పొద్దున లేస్తే హిందూ హిందూ.. అని మాట్లాడే బండి సంజయ్.. పక్కనే ఉండి కూడా దేవస్థానం బాగు కోసం నిధులు ఎందుకు అడుగలేదని నిలదీశారు. దేవుడి పేరు చెప్పే సంజయ్ ఒక్క రూ పాయి అడగలేదని, ఆయన కూడా ఇయ్యలేదని మండిప డ్డారు. కానీ, తాను ఇక్కడకు వచ్చి, చెరువులోంచి దాదాపు 35 ఎకరాలు స్థలం ఇప్పించి డెవలప్ చేశామని చెప్పారు. ప్రస్తుత కాంగ్రెస్ ప్రభుత్వం అమలు కాని హామీలిచ్చి, అరచేతిలో వైకుంఠం చూపి గద్దెనెక్కిందని ఘాటుగా విమర్శించారు.
మహిళలకు రూ.2500 రాలేదని, రైతులకు రూ.2 లక్షల రుణమాఫీ కాలేదని, రైతుబంధు కింద రూ.పది వేలు రాలేదని, ఏ ఒక్కటీ కాలేదని, కరెంట్, నీళ్లు కూడా రాలేదని ఆగ్రహించారు. ఒకే ఒక ఉచిత బస్ పెట్టిందని, దాంతో బస్సుల్లో ఆడోళ్లు సర్కస్ చేసినట్టు తన్నుకుంటున్నారని, ఆటోరిక్షా కార్మికులేమో ‘అన్నమోరామచంద్రా’ అని ఏడుస్తున్నా రని ఆవేదన చెందారు. రైతుబంధు ఇవ్వడానికి వెనుకాడిన ప్రభుత్వం ఇవాళ ధాన్యం కూడా కొంటలేదని, అకాల వర్షాలకు కల్లాల్లో తడిసిపోతే కూడా అడిగే దిక్కులేదని, కొనే దిక్కులేదని ఆగ్రహించారు. కాంగ్రెస్, బీజేపీని నమ్మితే మరోసారి మోసపోతా మని హెచ్చరించారు. మన కోసం కొట్లాడే, మన కోసం పనిచేసే బీఆర్ఎస్ అభ్యర్థులను గెలిపించుకోవాలని విజ్ఞప్తి చేశారు.
పదేండ్ల కిందట మోడీ ఓ చెప్పిండు. విదేశాల్లో ఉన్న నల్లడబ్బు తెచ్చి మనిషికి 15లక్షలు ఏస్త అన్నడు. సిరిసిల్ల వాళ్లకు వచ్చినయట కదా? బండి సంజయ్ తెచ్చిచ్చిండట కదా? 15 లక్షలు రాలె.. 15 రూపాయలు రాలె. ఏమీ కాలె. అంతటా వట్టిదే. అంతా గ్యాసు.. ట్రాషు! ఎవరికీ న్యాయం జరగలె. ఒక వేళ మోడీ మరోసారి గెలిస్తే పెట్రోల్, డీజిల్ ధర 400 దాటుతది. మోసపోతే గోసపడుతం. జాగ్రత్తా!
నరేంద్ర మోడీ అన్నీ తీసేసిండు. చేనేత కార్మికులకున్న ఇన్సూరెన్స్, ఇతర పథకాలను రద్దు చేసిండు. మోడీకి చేనేత కార్మికులంటే లెక్కనే లేదు. బీజేపీ ఎజెండాలో పేదలు, కార్మికులు, రైతులు, ఆటోరిక్షా కార్మికులు ఉండరు. పేద వాళ్ల ఎజెండా అసలే ఉండదు. పెద్ద పెద్ద గద్దల ఎజెండా మాత్రమే ఉంటది. అంబానీ, అదానీ, లక్షల కోట్ల శ్రీమంతులు వాళ్లకు కార్పొరేట్ టాక్స్లు రద్దు చేస్తరు తప్ప పేద వాళ్లకు కాదు.
ఒకనాడు సిరిసిల్లలో చేనేత చనిపోతుంటే నేను బాధపట్టలేక ఏడ్సిన. పార్టీ నుంచి రూ.50 లక్షలు తెచ్చి, ట్రస్ట్ ఏర్పాటు చేసిన. మీరు చనిపోవద్దు అని బతకాలని బతిమిలాడిన. రాష్ట్రం వచ్చిన తర్వాత ఇదే కేటీఆర్ ఆధ్వర్యంలో అనేక స్కీంలు తెచ్చుకున్నం. కార్మికులకు బతుకు దెరువు చూపినం. సిరిసిల్లకు ఒక టెక్స్టైల్ పార్క్ కావాలని మోడీని అడిగినా ఇయ్యలే.
అయినా కూడా ఉన్నంతలో బతుకమ్మ చీరలో.. రంజాన్ గిఫ్ట్లో.. స్కూల్ యూనిఫాంలో ఏదో ఒకటి ఇచ్చి మిమ్మల్ని కాపాడుకున్నం. మరమగ్గాల కార్మికులను కూడా కాపాడుకున్నం. కనీసం నెలకు 15 వేలు, 20 వేలు జీతం వచ్చేలా పని కల్పించినం. నేడు ఈ సర్కారు అన్నీ బంద్ పెడుతున్నది. పాత బకాయిలు, కొత్త ఆర్డర్లు ఇవ్వడం లేదు. పేదలకు బట్టలు దొరుకుతయని, చేనేత కార్మికులకు ఇంత పని దొరుకుతుందని మేము ఆర్డర్లు ఇస్తే ఈ సర్కారు ఎందుకు బంద్ పెట్టింది. గుడ్డిగా ఓట్లేయడం కాదు, ఎవరో చెబితే వేయడం కాదు, మనబతుకేంది? మనమేంది ఆలోచన చేయాలి.
బండి సంజయ్కి వినోద్కు ఏమైనా పోలిక ఉన్నదా? సంజయ్ మాట్లాడితే మనకేమైనా అర్థమైతదా? ఆయన మాట్లాడేది ఏం భాష? అది హిందా.. ఇంగ్లిషా.. తెలుగా? అదే వినోద్ కుమార్ కరీంనగర్ పార్లమెంట్ అభివృద్ధికి ఎంతో కృషి చేసిండు. 2001 నుంచి నాతో పాటు ఉద్యమంలో ఉన్నడు. రాష్ర్టాన్ని సాధించడంలో కీలక పాత్ర పోషించిండు. అంతేకాదు, దివంగత న్యాయవాది, మాజీ ఎమ్మెల్యే సీహెచ్ రాజేశ్వర్రావు మేనల్లుడే మన వినోద్ కుమార్. కమ్యూనిస్ట్ కుంటుంబం నుంచి తెలంగాణ కోసం కొట్లాడి, ఈ రాష్ర్టాన్ని ముందుకు తీసుకెళ్లడంలో నావెంట పనిచేసిన వ్యక్తి. చదువుకున్న వ్యక్తి. పార్లమెంట్లో మన కోసం కొట్లాడిన వ్యక్తి. కరీంనగర్ సీటుతోపాటు చాలాచోట్ల మనమే గెలువబోతున్నం. ఎంపీ సీట్లలో మనదే మెజార్టీ. కరీంనగర్లో నంబర్వన్ మెజార్టీ ఇచ్చి గెలిపించాలి.
రాజన్న సిరిసిల్ల జిల్లా బిడ్డల్లారా మీకో మాట చెబుతున్న. మీ ఆకాంక్షను గౌరవించి నేను రాజన్న సిరిసిల్ల జిల్లా ఏర్పాటు చేసిన. దేవుడి పేరు ఉండాలని వేములవాడ రాజన్న పేరు జిల్లాకు పెట్టుకున్నం. ఇప్పుడు ముఖ్యమంత్రి రేవంత్రెడ్డి సిరిసిల్ల జిల్లా రద్దు చేస్తామంటున్నడు. సిరిసిల్ల జిల్లా ఉండాల్నా? పోవాల్నా? సిరిసిల్ల జిల్లా ఉండాలంటే ఇక్కడ వినోద్కుమార్ గెలువాలి. ఎందుకంటే రేపు తీసేస్త అంటే కూడా అడ్డంపడి కొట్లాడేటోడు, యుద్ధం చేసేటోడు కావాలి. మీరు నాకు బలం ఇస్తే సిరిసిల్ల జిల్లా కాపాడే బాధ్యత నాది. ఎంతకైనా యుద్ధం చేద్దాం. సిరిసిల్ల జిల్లాను కాపాడుకోవాలన్నా.. జలాలు కాపాడుకోవాలన్నా.. నేత కార్మికుల బతుకులు మునుపటి లెక్క బాగుండాలన్నా కచ్చితంగా ఈ పార్లమెంట్ ఎన్నికల్లో వినోద్కుమార్ను అత్యధిక మెజార్టీతో గెలిపించాలి.
ఇది చేనేత కార్మికులు ఎక్కువగా నివసించే పట్టణం. గతంలో ఇక్కడ చాలా ఆత్మహత్యలు జరిగినయి. అప్పుడు నేను కండ్ల నీళ్లు పెట్టుకున్న. చాలా బాధపడ్డ. బీఆర్ఎస్ గవర్నమెంట్ వచ్చిన తర్వాత అనేక స్కీంలు తెచ్చిన.. బతుకమ్మ చీరలు కావొచ్చు, విద్యార్థుల డ్రెస్లు కావొచ్చు, క్రిస్మస్, రంజాన్కు ఇచ్చే కానుకలు కావొచ్చు.. ఇలా కార్మికులను ఆదుకున్నాం. కానీ, ఐదు నెలల్లో అంతా తారుమారైంది. ఇక్కడ కార్మికులకు రూ.370 కోట్ల బకాయిలు రావాల్సి ఉన్నయి. వాటిని చెల్లించాలని అడిగితే.. ‘మీకెందుకు మీరు నిరోధ్లు, పాపడాలు అమ్ముకోండి’ అని పద్మశాలీ, నేత కార్మికులను అవమానిస్తే నాకు కోపం వచ్చింది. ఒక్క మాట అంటే నామీద 48 గంటల నిషేధం పెట్టిన్రు. ఇది మీరు గమనించాలి. మంచి చేసేదెవరో ఆలోచించాలి.
కరీంనగర్ గడ్డ చాలా చైతన్యవంతమైనది. ఒకనాడు కాంగ్రెస్ తెలంగాణను అవమానిస్తే నేను పార్లమెంట్ స్థానానికి రాజీనామా చేసిన. అప్పుడు మీరే అందరు సద్ది కట్టి, రెండున్నర లక్షల మెజార్టీతో గెలిపించిన్రు. తెలంగాణ ఉద్యమ గౌరవాన్ని పెంచిన గడ్డ కరీంనగర్. మళ్లీ ఇప్పుడు క్లిష్ట పరిస్థితుల్లో ఈ కరీంనగర్ గడ్డ తెలంగాణ గౌరవం కాపాడాలె.
దయచేసి మీరంతా ఆలోచించి ఓటేయాలె. ఆగమాగం కావద్దు. ముఖ్యంగా యువకులు, విద్యార్థులు, విద్యావంతులు ఆలోచించాలి. సిరిసిల్లలో మంచి రచయితలు ఉన్నరు. పెద్దింటి అశోక్ కుమార్ వంటి మేధావులున్నరు. మీరందరూ ఆలోచన చేయాలి. ఇవాళ మోడీ వచ్చి మన గోదారిని ఎత్తుకుపోత అంటున్నడు.
మనం గోదావరి నుంచి నీళ్లు తెచ్చి అప్పర్ మానేరు ఎలా చేసుకున్నమో.. మానేరు నదిని సజీవ నదిలా ఎలా చేసుకున్నామో.. మిడ్మానేరు ఎంత బ్రహ్మాండంగా కళకళలాడుతుండెనో.. ఇప్పుడు మొత్తం ఎండబెట్టిన్రు. మన గోదావరి నది పోతే ఎక్కన్నుంచి నీళ్లు రావాలె. మనం ఏ విధంగా బతకాలె. ఇక్కడ కాంగ్రెస్ అన్ని వర్గాల ప్రజలను మోసం చేసింది. దయచేసి మనం ఇవన్నీ ఆలోచన చేయాలె. ఏం చేయకుండానే వట్టిగనే ఓటేస్తమంటే మన బతుకులు కూడా గావర గావర అయితయి తప్ప ఏం జరగదు. మంచిగా చర్చించి ఓటేయాలి.