కొత్తపల్లి, సెప్టెంబర్ 23: కరీంనగర్ మరో ప్రతిష్టాత్మక క్రీడా పోటీలకు వేదికైంది. వచ్చే నెల 17 నుంచి 21 దాకా నగరంలోని వైశ్యభవన్లో ఆల్ ఇండియా ఫిడే రేటింగ్ చెస్ టోర్నమెంట్ను నిర్వహిస్తున్నట్లు నిర్వాహకులు పేర్కొన్నారు. శనివారం పోటీలకు సంబంధించిన బ్రోచర్ను మంత్రి గంగుల కమలాకర్ మీసేవ కార్యాలయంలో ఆవిష్కరించారు. ఈ సందర్భంగా ఆయన మాట్లాడారు. రాష్ట్రంలో హైదరాబాద్ తర్వాత గొప్ప నగరంగా అభివృద్ధి చెందుతున్న కరీంనగర్ జాతీయ, అంతర్జాతీయ స్థాయి పోటీలకు వేదికకావడం అభినందనీయమన్నారు.
పోటీలకు తనవంతుగా పూర్తి సహాయ సహకారాలు అందిస్తామన్నారు. జిల్లా పర్యాటకంతో పాటు క్రీడారంగంలో దూసుకుపోతున్నదన్నారు. అనంతరం పోటీల నిర్వాహకులు మాట్లాడుతూ విశ్వనాథ్ చెస్ అకాడమీ ఆధ్వర్యంలో తెలంగాణ చదరంగ సమాఖ్య సౌజన్యంతో ఐదు రోజుల పాటు పోటీలు జరుగుతాయని, కరీంనగర్ జిల్లాలో అంతర్జాతీయ స్థాయి రేటింగ్ టోర్నీని మొదటిసారిగా నిర్వహిస్తున్నట్లు చెప్పారు. ఇందులో పాల్గొనే క్రీడాకారులు అంతర్జాతీయ చెస్ రేటింగ్ పొందే అవకాశం ఉంటుందని, స్విస్లీగ్ పద్ధతిలో పోటీలు జరుగుతాయన్నారు.
విజేతలకు రూ.2 లక్షల నగదు బహుమతులు అందజేయనున్నట్లు చెప్పారు. అండర్- 9,11,13,15 విభాగాల్లో పోటీపడే వారికి ప్రత్యేక బహుమతులు అందజేస్తామన్నారు. ఆసక్తి ఉన్న క్రీడాకారులు పేర్ల నమోదు, ఇతర వివరాలకు 9030177607, 9849154488 నంబర్లలో సంప్రదించాలని సూచించారు. కార్యక్రమంలో టోర్నమెంట్ డైరెక్టర్ విశ్వనాధ్ప్రసాద్, కమిటీ సభ్యులు బీ.రమణారావు, ఎ రాజేంద్రపసాద్, ప్రద్యుమ్నకుమార్, రాజాభాను చంద్రప్రకాశ్, బీ రాజమల్లయ్య, కేవీ ఆనంద్ ఉన్నారు.