Sircilla | రాజన్న సిరిసిల్ల, జూలై 16 (నమస్తే తెలంగాణ): సిరిసిల్ల మానేరు తీరం కళ తప్పుతున్నది. ఎక్కడికక్కడ నిలిచిన పనులతో అధ్వానంగా కనిపిస్తున్నది. చుట్టూ గుట్టలు.. మధ్యలో నీటి గలగలలు.. పచ్చల హారాల్లాంటి ఉద్యాన వనాలతో ఈ ప్రాంతాన్ని పర్యాటక కేంద్రంగా తీర్చిదిద్దాలని గత కేసీఆర్ ప్రభుత్వం సంకల్పించి పనులు చేపట్టగా, ప్రస్తుత కాంగ్రెస్ సర్కారు గాలికొదిలేసింది. మానేరు బ్రిడ్జి కుడివైపున 30కోట్లతో కరకట్ట మీటరు ఎత్తు వరకు నిర్మించడం, ప్రస్తుతం పట్టించుకునేవారే లేకపోవడంతో కోట్లు పెట్టి పోసిన మట్టి వాగుపాలయ్యే ప్రమాదం కనిపిస్తున్నది. ఇప్పటికైనా ప్రభుత్వం స్పందించాలని, పనులు పూర్తి చేసి దశాబ్దాల తమ కల నెరవేర్చాలని ప్రజానీకం కోరుతున్నది.
సిరిసిల్ల మానేరు సహజ సిద్ధ అందాలతో అలరారుతున్నది. అయితే మధ్యమానేరు నిర్మాణం, ఆ తర్వాత ఎదురెక్కి వచ్చే గోదావరి జలాల పరవళ్లతో జలకళను సంతరించుకున్నది. చుట్టూ గుట్టలు.. మధ్యలో నీటి గలగలలు.. పచ్చల హారాల్లాంటి ఉద్యాన వనాలతో కనువిందు చేసేది. ఓ వైపు రామప్ప గుట్టలు, మధ్యలో పరుచుకున్న మానేరు వాగుతో సూపర్లోకేషన్గా మారింది. ఈ క్రమంలో మానేరు వాగు, రామప్ప గుట్టలను కలుపుకుని పర్యాటక కేంద్రంగా అభివృద్ధి చేయాలని గత కేసీఆర్ ప్రభుత్వ హయాంలో స్థానిక ఎమ్మెల్యే, అప్పటి మంత్రి కేటీఆర్ సంకల్పించారు. హైదరాబాద్ ప్రజలకు వీకెండ్ స్పాట్గా తీర్చిదిద్దాలని భావించారు.
విశాఖ బీచ్ను తలపించేలా మానేరు బ్రిడ్జి కుడివైపు నుంచి అయ్యప్ప ఆలయం దాకా 100ఫీట్ల కరకట్ట నిర్మించాలని ప్రతిపాదనలు చేయగా, 60 ఫీట్లకు కుదించారు. అందుకు ఇరిగేషన్, మున్సిపాలిటీ శాఖల సంయుక్త ఆధ్వర్యంలో సర్వేలు చేసి మొదటి విడతగా 30కోట్ల అంచనాలతో ప్రణాళికలు సిద్ధం చేసి పనులు ప్రారంభించారు. ఇదేగాక మానేరు బ్రిడ్జి వద్ద, బతుకమ్మ ఘాట్, నెహ్రూనగర్ అంభ భవానీ ఆలయం, అయ్యప్ప ఆలయం వద్ద పార్కులు, సైకిల్ ట్రాక్, చిన్నారుల ఆటస్థలాలు, ఫౌంటేయిన్లు, ఓపెన్ జిమ్ల ఏర్పాటు.. ఇలా సందర్శకులను ఆకట్టుకునే పనులకు మాజీ మంత్రి ప్రత్యేక చొరవ చూపారు. మానేరులో షికారుకు బోటును సైతం ప్రారంభించారు. కానీ, ప్రభుత్వం మారడంతో టూరిజం ప్రాజెక్టు నిలిచిపోయింది.
రూ.కోట్లు వాగుపాలేనా?..
పర్యాటక కేంద్రంగా మార్చే క్రమంలో అయ్యప్ప ఆలయం నుంచి మానేరు కుడివైపు బ్రిడ్జి వరకు మూడు కిలోమీటర్ల మేర మానేరు వాగు పక్కన కరకట్ట నిర్మించారు. గతేడాది జనవరిలోనే పనులు ప్రారంభించారు. కోట్లు ఖర్చుపెట్టి 60ఫీట్ల రోడ్డు కోసం మట్టి పోశారు. మీటరు ఎత్తు వరకు పనులు చేశారు. అయితే ప్రభుత్వం మారగానే నిలిచిపోయాయి. ఇప్పటికే రోడ్డుపైన గుంతలు పడి వర్షపు నీరు పారుతుంది. పిచ్చిమొక్కలు మొలిచి 60ఫీట్ల రోడ్డు సగానికి చేరుకుంది. అయితే భారీ వర్షాలకు వాగొచ్చి కోట్లు వ్యయం చేసిన పోసిన మట్టి కొట్టుకు పోయే ప్రమాదమున్నది. ఇప్పటికైనా ప్రభుత్వం స్పందించి కరకట్ట పనులు ప్రారంభించి, తమ కల సాకారం చేయాలని ప్రజలు కోరుతున్నారు.