కలెక్టరేట్/ హుజూరాబాద్ టౌన్/వీణవంక/ మానకొండూర్ రూరల్/ చిగురుమామిడి/ కరీంనగర్ రూరల్, మే 12: లోక్సభ ఎన్నికల్లో భాగంగా నేడు పోలింగ్ జరుగనుండగా, ఇందుకోసం అధికార యంత్రాంగం సర్వం సిద్ధం చేసింది. జిల్లాలోని 2,194 పోలింగ్ కేంద్రాలు వద్ద పటిష్ట భద్రత ఏర్పాటు చేయడంతో పాటు ఎండల తీవ్రత దృష్ట్యా ఓటర్లకు ఇబ్బందులు కలుగకుండా అన్ని సౌకర్యాలు కల్పించింది. కాగా, డిస్ట్రిబ్యూషన్ సెంటర్ల నుంచి పోలింగ్ సామగ్రితో ఎన్నికల సిబ్బంది ఆదివారం సాయంత్రం వరకే కేటాయించిన కేంద్రాలకు చేరుకున్నారు.
నగరంలోని ఎస్సారార్, మహిళా పాలిటెక్నిక్ కళాశాలల్లో కరీంనగర్, చొప్పదండి, మానకొండూర్ అసెంబ్లీ నియోజకవర్గాలకు ఈవీఎంలు, ఎన్నికల సామగ్రి పంపిణీ కార్యక్రమం నిర్వహించగా, జిల్లా ఎన్నికల అధికారి పమేలా సత్పతి పర్యవేక్షించారు. ఈ సందర్భంగా ఆయా కేంద్రాల్లో చేపట్టిన ఏర్పాట్లపై అధికారులను అడిగి తెలుసుకున్నారు. కూలర్లు, విద్యుత్తు సక్రమంగా ఉండేలా చూసుకోవాలన్నారు. పోలింగ్ కేంద్రాలకు కేటాయించిన బ్యాలెట్, కంట్రోల్ యూనిట్లు, వీవీప్యాట్లు తీసుకుని జాగ్రత్తగా తమకు కేటాయించిన పోలింగ్ కేంద్రాలకు వెళ్లాలని ఆదేశించారు. ఎలాంటి తప్పిదాలకు ఆస్కారం ఇవ్వకూడదని, సమస్యలు ఏవైనా ఉంటే తమ దృష్టికి తేవాలని తెలిపారు. ఈవీఎంలు తరలించే వాహనాలకు జీపీఎస్ అనుసంధానం చేసినట్లు పేర్కొన్నారు. పోలింగ్ పూర్తయిన అనంతరం ఎన్నికల సామగ్రిని జాగ్రత్తగా నగరంలోని స్ట్రాంగ్ రూములకు తరలించాలని కోరారు. డీఈవోతో పాటు కరీంనగర్ పార్లమెంటు సాధారణ ఎన్నికల పరిశీలకుడు అమిత్ కటారియా పాల్గొన్నారు. వీరి వెంట అదనపు కలెక్టర్లు ప్రఫుల్ దేశాయ్, లక్ష్మీకిరణ్, ఆర్డీవోలు కే మహేశ్వర్, రమేశ్బాబు, ఇతర అధికారులు ఉన్నారు.
హుజూరాబాద్ నియోజకవర్గంలోని మొత్తం 305 పోలింగ్ స్టేషన్లకు ఆదివారం సాయంత్రంలోగా ఈవీఎంలు చేరేలా కట్టుదిట్టమైన ఏర్పాట్లు చేశారు. నియోజకవర్గంలో మొత్తం 2,50,0429 మంది (పురుషులు 1,21,809 మంది, మహిళలు 1,28,613 మంది), ఇతరులు ఏడుగురు తమ ఓటు హక్కును వినియోగించుకోనున్నారు. ఎన్నికల కోసం 1525 మంది సిబ్బంది విధులు నిర్వహిస్తున్నట్లు అసిస్టెంట్ రిటర్నింగ్ అధికారి ఆర్డీవో రమేశ్బాబు తెలిపారు. కాగా, పట్టణంలోని ప్రభుత్వ జూనియర్ కళాశాలలో ఏర్పాటు చేసిన ఈవీఎంల డిస్ట్రిబ్యూషన్ సెంటర్ను జిల్లా ఎన్నికల అధికారి పమేలా సత్పతి పరిశీలించారు. అధికారులను పలు వివరాలు అడిగి తెలుసుకున్నారు. ఇక్కడ హుజూరాబాద్ నోడల్ అధికారి కే విజయ్కుమార్, ఈవీఎంల నోడల్ అధికారి, మున్సిపల్ కమిషనర్ సమ్మయ్య, ఏసీపీ శ్రీనివాస్జీ, సీఐలు బీ రమేశ్, కే రవి, వెంకటేశ్వర్లు, ఎన్నికల అధికారులు, సిబ్బంది ఉన్నారు.
వీణవంక మండలంలో మొత్తం 26 గ్రామ పంచాయతీల పరిధిలో 42,514 మంది ఓటర్లు ఉన్నారు. మొత్తం 55 పోలింగ్ కేంద్రాలు ఉండగా, 220 మంది సిబ్బందిని నియమించారు. ఎస్ఐ తిరుపతి ఆధ్వర్యంలో స్థానిక పోలీసులు, కేంద్ర బలగాలతో భద్రతా ఏర్పాట్లు పూర్తి చేశారు.
మానకొండూర్ మండల పరిధిలో 78 పోలింగ్ కేంద్రాలు ఉండగా, వాటి వద్ద అన్ని ఏర్పాట్లు పూర్తి చేసినట్లు మానకొండూర్ అసిస్టెంట్ ఎన్నికల అధికారి సీహెచ్ రాజు తెలిపారు. కేంద్రాల పరిసర ప్రాంతాల్లో 144 సెక్షన్ అమలులో ఉంటుందని, ప్రతి ఒక్కరూ ఎన్నికల నియమ నిబంధనలు పాటించాలని మానకొండూర్ సీఐ రాజ్ కుమార్ సూచించారు.
చిగురుమామిడి మండలంలోని 17 గ్రామాల్లో గల 40 పోలింగ్ బూత్లను ఆదివారం ఎన్నికల బందోబస్తు ఇన్చార్జి సీఐ బిల్ల కోటేశ్వర్ ఎస్ఐ బండి రాజేశ్తో కలిసి పరిశీలించారు. భద్రతా ఏర్పాట్లకు సంబంధించి పోలీస్ సిబ్బందికి పలు సూచనలు సలహాలు ఇచ్చారు. ఎన్నికల సందర్భంగా గ్రామాల్లో ఎవరైనా మద్యం, డబ్బులు పంచితే కేసు నమోదు చేస్తామని సీఐ కోటేశ్వర్ హెచ్చరించారు.
కరీంనగర్ మండలంలో 55,011 మంది ఓటర్లకు గానూ 24 పోలింగ్ కేంద్రాలు ఏర్పాటు చేశారు. నగునూర్, గుంటూర్పల్లిలో మహిళా మోడల్ పోలింగ్ కేంద్రాలు ఏర్పాటు చేశారని తహసీల్దార్ నవీన్కుమార్, ఎంపీడీవో సంజీవరావు తెలిపారు. వాటిని ప్రత్యేక అలంకరణతో తీర్చిదిద్దారు. నగునూర్, గుంటూర్పల్లి పోలింగ్ బూత్లను ఎంపీడీవో సంజీవరావు, ఎంపీవో జగన్మోహన్రెడ్డి పరిశీలించారు.