బ్యాంకాక్, మే 15 : థాయ్లాండ్ రాజధాని బ్యాంకాక్ నుంచి వేరొక చోటుకు తరలిపోక తప్పదా? అంటే ఔనని అధికారులు చెప్తున్నారు. సముద్ర మట్టం పెరుగుతుండటంతో ఈ శతాబ్దం చివరికల్లా బ్యాంకాక్ మునిగిపోయే ప్రమాదం ఉందని అంటున్నారు. ఇప్పటికే వర్షాకాలంలో ప్రజలు వరదలతో అనేక ఇబ్బందులు పడుతున్నారని గుర్తు చేస్తున్నారు.
థాయ్లాండ్ వాతావరణ శాఖ అధికారి పవిచ్ కేశవవోంగ్ మాట్లాడుతూ తమ దేశంలో ప్రస్తుత ఉష్ణోగ్రతలు పారిశ్రామికీకరణకు పూర్వపు ఉష్ణోగ్రతల కన్నా 1.5 డిగ్రీల సెల్సియస్ పెరిగిపోయినట్లు తెలిపారు. ఈ పరిస్థితులే కొనసాగితే బ్యాంకాక్ మునిగిపోయినట్లేనన్నారు. రాజధాని, ప్రభుత్వం, వ్యాపార ప్రాంతాలను వేరు చేయడం ఉత్తమమని చెప్పారు. ప్రభుత్వ రాజధాని నగరంగా బ్యాంకాక్ను కొనసాగిస్తూ, వ్యాపార రంగాన్ని వేరొక చోటుకు తరలించాలన్నారు. దీనిపై ఆలోచన ప్రాథమిక దశలోనే ఉందని వివరించారు.