Python | జకార్తా, జూన్ 9: కనిపించకుండా పోయిన ఓ మహిళ ఒక రోజు తర్వాత ఒక కొండచిలువ పొట్టలో విగత జీవిగా కనిపించిన విషాద ఘటన ఇండోనేషియాలో జరిగింది. స్థానిక అధికారి శనివారం వెల్లడించిన వివరాల ప్రకారం దక్షిణ సులాసి ప్రావిన్స్లోని కలెంపాగ్ గ్రామానికి చెందిన ఫరీదా(45)ను శుక్రవారం ఆమె భర్త, స్థానికులు 5 మీటర్ల పొడవున్న ఒక కొండచిలువ కడుపులో కనుగొన్నారు.
గురువారం రాత్రి నుంచి ఫరీదా కనిపించకపోవడంతో వెతుకులాట ప్రారంభించామని గ్రామాధిపతి మీడియాకు తెలిపారు. ఫరీదాకు చెందిన వస్తువులు దొరికిన ప్రాంతంలో వెతగ్గా.. పెద్ద కడుపుతో ఉన్న కొండచిలువ వారికి కనిపించింది. దాన్ని కోసి చూడగా వేసుకున్న దుస్తులతో సహా ఫరీదా వారికి కనిపించింది. ఇండోనేషియాలో ఏటా ఇలాంటి ఘటనలు ఒకటి, రెండు చోటు చేసుకోవడం ప్రజల్లో ఆందోళన కలిగిస్తున్నది.