వాషింగ్టన్: ప్రపంచాన్ని వణికించిన మంకీపాక్స్ కేసులు తగ్గుముఖం పట్టాయి. ప్రపంచ ఆరోగ్య సంస్థ (డబ్ల్యూహెచ్వో) ఈ విషయాన్ని గురువారం వెల్లడించింది. గత వారం ప్రపంచ వ్యాప్తంగా మంకీపాక్స్ కేసులు 21 శాతం మేర తగ్గాయని పేర్కొంది. దీంతో గత నెల రోజులుగా విజృంభించిన ఈ వైరస్ కేసులు ప్రస్తుతం తగ్గుముఖం పట్టాయని గురువారం తెలిపింది. ప్రధానంగా 90 శాతం కేసులున్న ఐరోపాలో కూడా పరిస్థితి మెరుగుపడుతున్నదని వెల్లడించింది. అయితే మంకీపాక్స్ వైరస్ ఇతర దేశాల్లో వ్యాపిస్తుండటంపై డబ్ల్యూహెచ్వో డైరెక్టర్ జనరల్ టెడ్రోస్ అధనామ్ ఘెబ్రేయేసస్ ఆందోళన వ్యక్తం చేశారు.
కాగా, డబ్ల్యూహెచ్వో నివేదిక ప్రకారం గత వారం ప్రపంచ వ్యాప్తంగా కొత్తగా 5,907 మంకీపాక్స్ కేసులు నమోదయ్యాయి. అయితే ఇరాన్, ఇండోనేషియాలో తొలిసారి ఈ వైరస్ కేసులు వెలుగులోకి వచ్చాయి. ఈ ఏడాది ఏప్రిల్ నుంచి ఇప్పటి వరకు 98 దేశాల్లో 45 వేలకుపైగా మంకీపాక్స్ కేసులు నమోదైనట్లు డబ్ల్యూహెచ్వో పేర్కొంది. అత్యధికంగా అమెరికాలో 60 శాతం, ఆ తర్వాత ఐరోపాలో 38 శాతం కేసులు నమోదయ్యాయని వెల్లడించింది.