జకార్తా: ఒక మహిళ అదృశ్యమైంది. మూడు రోజుల తర్వాత కొండచిలువ కడుపులో ఆమె మృతదేహాన్ని గుర్తించారు. (woman found dead inside python) ఈ నేపథ్యంలో కొండచిలువ పొట్ట కోసి ఆ మహిళ మృతదేహాన్ని బయటకు తీశారు. ఇండోనేషియాలో ఈ సంఘటన జరిగింది. దక్షిణ సులవేసి ప్రావిన్స్లోని కలెంగాంగ్ గ్రామానికి చెందిన 45 ఏళ్ల ఫరీదా ఈ నెల 6న గురువారం రాత్రి అదృశ్యమైంది. బయటకు వెళ్లిన ఆ మహిళ ఇంటికి తిరిగి రాలేదు. దీంతో ఆందోళన చెందిన ఆమె భర్త, స్థానికుల సహాయంతో వెతికాడు.
కాగా, శనివారం ఒకచోట ఫరీదా వస్తువులను ఆమె భర్త కనుగొన్నాడు. దీంతో ఏదో జరిగి ఉంటుందని అనుమానించాడు. ఈ నేపథ్యంలో గ్రామస్తులు ఆ ప్రాంతంలో వెతికారు. కదలలేని స్థితిలో ఉన్న 16 అడుగుల కొండచిలువను వారు చూశారు. పొట్ట భాగం ఉబ్బి ఉండటంతో ఫరీదాను అది మింగి ఉంటుందని అనుమానించారు. ఈ నేపథ్యంలో ఆ కొండచిలువ కడుపు కోయగా పూర్తి దుస్తుల్లో ఉన్న ఆ మహిళ మృతదేహం బయటపడినట్లు గ్రామ పెద్ద తెలిపాడు. ఇండోనేషియాలో గతంలో కూడా ఇలాంటి సంఘటనలు జరిగినట్లు వెల్లడించాడు.